رواية خطايا بريئة(الفصل الخامس والثلاثون إلى التاسع والثلاثون) بقلم ميرا كريم | Contemporary Fiction Chapter
نكس رأسه وابتلع غصته قائلًا بتراجع كي يلاحق زلفة لسانه وتسرعه:
-لأ اتغيرت وبُعدك عني علمني كتير بس غصب عني يا “رهف” أنا قولت كده من حُرقتي أنا هموت لو شوفتك مع حد غيري
-غيرك…مش ده الحق اللي أنت عطيته لنفسك قبل كده!
غامت عينه بالندم وقال راجيًا بعدما أزاح حدته وعجرفته جانبًا:
-“رهف” أنا ندمت وحياة ولادي ندمت وطلقتها ولسة عندي أمل تسامحيني أنا لسة بحبك
نفت برأسها بعدم اقتناع وردت بصمود وقناعات أصبحت راسخة بها بعد نكبتها:
-مشكلتي معاك مكنتش هي وبس…واظن مش محتاج إني اقولك نفس الكلام في كل مرة ومش كل مرة هقولك حاول تتقبل الوضع الجديد وتتعايش معاه
مرر يده بخصلاته الفحمية القاتمة وقال وهو يشعر أنه على حافة الجنون:
-طب ريحيني وقوليلي أيه اللي بينك وبينه؟
-قولتلك شغل وبس… وصدقني يوم ما هفكر أربط مصيري بواحد مرة تانية مش هخبي ومش هقدم حجج ومبررات ليك
قالتها وهي تتدلى من السيارة ليلحق هو بها ويتدلى مثلها ويتمسك بذراعها قبل أن تتخطاه قائلًا بحسرة وعينه تتوسل غُفرانها:
-“رهف”…بلاش ترجعيلي خدي وقتك وانا عندي أمل انك تسامحيني انا هستناكِ ومش هيأس بس علشان خاطر اللي كان بينا بلاش تعملي فيا كده أنا مش هستحمل اشوفك مع راجل غيري… ليتناول نفس مثقل عميق ويزفره محمل بعبق احتراق قلبه ويستأنف بنبرة مرتعشة راجية :
-اكرهيني، عاقبيني، ابعديني، اعملي فيا اللي يريحك؛ بس اوعي تحبي غيري…
ارتعش فمها ونزف جرحها الكامن مرة أخرى فور حديثه، و وجدت ذاتها تخبره بكل وضوح وبصوت مذبوح يقطر بأنين قلبها:
-قلبي مبقاش عنده طاقة ليك او لغيرك يا “حسن”…انا هعيش لولادي وشغلي ونفسي وبس وياريت متفتحش في جراح قديمة وحاول تتخطاني زي ما بحاول اتخطاك…
قالتها وهي تهرول من أمامه كي تصعد الدرج لتؤاذر تلك السيدة الحنون في مصيبة ولدها تاركته ينظر لآثارها بعيون غائمة وبملامح متهدلة بائسة تنم عن فداحة خسارته لها.
——————
وقفت واهنة تستند على زجاج العناية المشددة وعيناها تفيض بمخزونها تطالعه وهو مُمدد أمامها شاحب الوجه وبهيئة سَاكنة تحاكي الموتى بثباتها، فكل ما يدل على حياته هو طنين الاجهزة الطبية المتصلة بجسده ويتدلى من احدهم خراطيم الهواء تخترق فمه وانفه، أما عن صدره العاري فتم تغطيته كاملًا بشاش طبي حيث موضع الرصاصة التي اخترقته.
