رواية روح و ريحان(الفصل الثالث والثلاثون إلى السابع والثلاثون)بقلم ايناس عادل | New Episode – Read Online

وجمت قائلة :
– مازن اوعى تكون جايب لي حاجة غير الفضة ..

ابتسم قائلا :
– هي فعلا حاجة غير الفضة .. بس خمني ايه هي ..

عبست قائلة :
– بس انا قلت لك قبل كدة اني مبحبش تجيب حاجة غالية .. دة غير ان انا مش بحب غير الفضة ..

التقط أناملها الرقيقة يقبلها قائلا :
– وانا قلت لك ان اغلى كنوز الدنيا متساويش غلاوتك عندي .. بس اللي انا جايبه غير غير

ضحكت قائلة :
– جايبه .. مش جايبها ..

ضحك قائلا :
– اه وقعت بلساني ..

مدت يدها قائلة :
– هات الكتاب ..

أبعده عنها قائلا :
– ايه شغل النصب دة .. مفيش كتب ..

ابتسمت وهي تسحب يدها قائلة :
– واهون عليك يا حبيبي تخلي ايدي ترجع فاضية كدة ..

اتسعت ابتسامته وهو يأخذ يدها يقبل باطنها ثم يعطيها الكتاب قائلا :
– لا طبعا متهونيش عليا يا عمري .. طالما فيها حبيبي .. وبعدين الكتاب دة بالذات انا مستنيه يطبع من شهور ..

ابتسمت وهي تفك غلاف الكتاب قائلة :
– انا مش عارفة ليه بتغلف الهدية طالما كدة كدة مش هشوفها ..

نظر لها قائلا بشجن :
– عارف انك هتشوفيها بقلبك ..

ارتعش شئ في داخلها .. فكت غلاف الكتاب وبدت تتحسس بأناملها اسمه ثم بهتت قائلة :
– ايه دة .. دة عنوان الرسالة بتاعتي .. كتاب ايه دة ..
ثم تحركت أناملها بسرعة على بقية الكلمات لتتسع عينيها عن آخرهما قائلة :
– دة اسمي .. انا مش فاهمة حاجة ..

تنهد وهو ينظر لعينيها قائلا :
– دة موضوع الرسالة بتاعتك ..انا طبعت لغاية الجزء اللي انتي توقفتي عنده .. علشان تقرئيه وتكملي الرسالة .. وبدل ما تكتبي هتسجلي الكلام صوت .. وانا هاخده علشان يطبع ع الورق بنفس الطريقة .. وتاخدي الدكتوراه ان شاء الله ..

الدكتوراة .. حلمها الذي دفن منذ سنوات .. منذ مرضت .. حلمها الذي طال انتظاره وقبل أن يتحقق حدث لها ما حدث فوئد حيا .. تستطيع تحقيقه الآن .. لا تصدق .. ما منعها في السنين الماضية ليس قلة إمكانيات .. ولكن فتور أصابها في الهمة والعزيمة وكل شئ .. والآن عاد تفكيرها فيمَ نوت وقويت عزيمتها أن تفعل .. فحدثت “مازن” عمَّ تريد البوح به .. ولكن لم تصدق أنه سيساعدها .. كانت تريده أن يسمعها فقط .. ولكن لم يكتفي بسماعها .. بل ساعدها أيضا ..

ابتسمت بشدة .. ابتسامة أنعشت روحه .. فقبل رأسها وأسندها على صدره .. تعلقت بجيبه وهي تشعر بامتنان عظيم ..