رواية روح و ريحان(الفصل الثالث والثلاثون إلى السابع والثلاثون)بقلم ايناس عادل | New Episode – Read Online

بينما أخذت “ريحانة” في البكاء .. فذهبت نحوها “رنيم” وجلست تحتضنها بحنو قائلة :
– ريحانة يا قلبي .. لو فكرتي في الموضوع على مزاجك وعقدتيه هيتعقد .. هونها تهون .. انتي دلوقتي فرحانة افرحي .. العمر مش كتير علشان نقضيه حزن وكآبة .. كل اللي جواكي قوليهوله .. ان شاء الله لو هتض*ر*بيه علشان ترتاحي اض*ر*بيه ولا يهمك ..

ثم أبعدتها عنها وهي تحتضن وجهها .. فابتسمت “ريحانة” وهي تقول دامعة :
– انا خايفة افرح .. انا عمري ما فرحت كدة .. خايفة فرحتي متكملش ..

جاء الدور على “ريم” التي تقدمت منها وعبراتها تخنقها قائلة :
– بس يا هبلة .. يعني هو دة ظنك في ربنا .. ان فرحتك متكملش .. والله لو تعرفي هو عمل ايه علشانك .. بس هو مآمني على سره لولا كدة انتي عارفة لساني ..

ابتسمت “رنيم” قائلة :
– وانتي يعني متعرفيش تتكلمي من غير ما تشتمي ..

ضحكت “ريحانة” وهي تمسح آخر ما بقي من دموعها .. طرق الباب فوقفت فزعة .. فطمأنتها “رنيم” قائلة :
– هتقولي موافقة وتمضي بس .. احنا هندخل البلكونة لغاية ما تخلصي .. علشان دي فيها قطع رقاب لو فيه حد مع يوسف ..

تشبثت “ريحانة” في يدها .. فأمسكت “ريم” يدها قائلة :
– تعالي ..

ذهبت معها .. ولم تجد “رنيم” مفر من الوقوف جوارها .. فعلت ما قالته “رنيم” وهي تقول بصعوبة :
– مــ.. وافــ..قــة ..

ضحكت “ريم” وهي تقول :
– انا حاسة اني همشي مشوار بين الفاء والقاف ..

وبعد دقائق جاءها “يوسف” قائلا :
– تعالي اعمامك عاوزين يسلموا عليكي ..

نظرت له بخوف فضحك قائلا :
– افردي وشك هيقولوا اننا غاصبينك ..

ابتسمت وهي تخرج معه متعلقة بذراعه .. تحاشت بكل قوة النظر إلى “باسل” .. فرحتها رسمت على وجهها دون تصنع أو مجاملة .. فلم يعد في نفوس أعمامها شئ .. ولم تترك يد “يوسف” مطلقا .. مرت على “باسل” فتجاوزته .. وهي تتلقى تهنئة أبناء عمها .. ولم يطيلوا جلستهم بعد وانصرفوا .. بمجرد خروجهم هرولت لغرفتها .. وتركت “جدها و”باسل” و”يوسف” و”طارق” في صمت ..

دخل “يوسف” وراءها قائلا :
– مكانتش جوازة دي وانا متمرمط وراكي كدة ..

ابتسمت أمه التي كانت تهنئ “ريحانة” ثم نظرت لـ”ريم” و”رنيم” قائلة :
– يلا روحوا لعيالكم ..

ردت “ريم” متضررة :
– عيالكم .. يعني انا بقيت ام العيال وبقيت عزول بقن وكدة ..