رواية متاهة مشاعر(الفصل الثلاثون إلى الرابع والثلاثون)بقلم الكاتبة نهى طلبة | New Episode – Read Online

أومأ موافقاً:

ـ حاضر يا ستي.. اتفضلي..

ووضع في يدها الأوراق التي أخرجها لتوه من الخزينة.. فألقت عليها نظرة سريعة متسائلة:

ـ ايه دول!.. ورق ايه ده؟..

سكت للحظات قبل أن يخبرها بهدوء:

ـ دي عقود ملكيتك للمزرعة.. لأ.. لأ.. ما تقاطعنيش واسمعيني للآخر.. المزرعة دي حق من حقوقك.. أنا قبل كده اتنازلت عن أرضك لأعمامك.. اتجوزتك من غير مهر.. و..

قاطعته بسرعة:

ـ المزرعة أكبر من أرضي ومن مهري.. و..

كان دوره لمقاطعتها:

ـ بس هي بيتك.. أنا عارف أنك بتحبيها.. ومن جواكي دايماً بتعتبريها بيتك.. حتى لو كنتِ بتفكري فيها أنها المنفى اللي بعدتك فيه ماما.. بس رغم كده لها مكانة مختلفة جواكي..

ثم غمز بشقاوة:

ـ وبعدين الولاد محتاجين مكان واسع يلعبوا فيه يمكن أعرف أخطفك لنفسي شوية!..

رغم تساقط دموعها إلا أنها ابتسمت بحنان.. فلم تتصور أنه بدأ يفهمها.. يستوعب علياء الطفلة الخائفة المتنكرة في جسد علياء الأنثى التي تسلب عقله وتزعزع ثباته.. لقد منحها عن قصد صك أمان كانت في أمس الحاجة له ولم تعلم بحاجتها تلك إلا وعقد ملكيتها لمنزلها الخاص بين يديها..

لفت ذراعيها خلف عنقه هامسة:

ـ ربنا يخليك ليا.. بس ده كتير.. كتير قوي..

ضمها لصدره بقوة:

ـ ما فيش حاجة تغلا عليكِ..

زادت وتيرة بكائها وتعالت شهقاتها وهي تضم نفسها له أكثر وأكثر فشاكسها مداعباً:

ـ ايه البكى ده كله.. ليكون في باشا جديد هيشرفنا.. أنتِ انفعالاتك بتزيد في الحمل..

وكزته في كتفه بقوة وهي تمسح دموعها:

ـ أنت ما تعرفش تكملها جد أبداً..

أخذ نفساً عميقاً وهو يصطنع الجدية:

ـ ايه ده.. يعني ما فيش نونو جاي.. طيب تعالي بقى نشوف حل للموضوع ده..

رفعها بين ذراعيه وتوجه بها نحو الفراش وهي تطلق ضحكات عالية وتهتف به لينزلها أرضاً..

وضعها على الفراش برقة وأسقط نفسه بجوارها ليهمس في أذنها:

ـ عندي اعتراف أخير..

سألته بقلق:

ـ خير؟..

أبعد بصره عنها ليخبرها بخفوت:

ـ أنا سجلت المزرعة باسمك أول ما وصلتِ واحد وعشرين سنة.. بس.. بس اترددت أقولك..

توسعت عيناها بدهشة ولكنه أكمل بسرعة:

ـ عارف أنك هتقولي عليّ أناني.. بس خفت تبعدي عني.. خفت تفكري أنه بقى عندك مكان تختفي فيه عني..

سألته بغموض:

ـ وايه اللي اتغير؟..

هز كتفه بحيرة:

ـ مش عارف.. يمكن بدأت أفهم أنك لو اختفيتِ هتختفي معايا مش عني..