رواية نبضات لا تعرف المستحيل(26_32)بقلم أميرة أحمد
لم تعقب ليلي ولم ترد عليه، لكن وجهها ارتسمت عليه علامات الضيق والغضب، أردف أنس بنفس النبرة: كنت بحبها….. بسنت كانت معايا في الكلية… بس سابتني وأتجوزت المعيد بتاعنا علشان هو اللي يقدر يجيبلها العربية اللي هي عايزاها و الشقة في الكومبوند اللي بتحلم بيه….. تنهد أنس بألم وقال: انا كنت قاعد مستنيكي لقيتها داخلة المطعم، بقالي حوالي ١٠ سنين مشفتهاش… جت قعدت معايا… فضلت تحكيلي عن جوزها وقد ايه كانت تعيسة معاه وانها اتطلقت من سنتين …. بس انا مكنتش حاسس ناحيتها حاجة… لما رفعت عيني ولقيتك قاعدة بعيد حسيت ان قلبي رايحلك انتي… محستش غير وانا قايم ماشي ناحيتك.
تنهدت ليلي وقالت بنبرة مختنقة بالدموع: انت حر في حياتك…
صمتت ليلي، تنظر الي البحر … كان صمتها أقوى من أي عتاب واقسي عليه من أي لوم.
تنهد أنس وقال: مكنتش عايز اشوفها ومكنتش فارقة معايا.
ابتسمت ليلي بمرارة وقالت وهي تنظر اليه نظرة منكسرة: علشان كده سيبتها تمسك ايدك؟
أنس: هتصدقيني لو قولتلك أنى حتى محستش بلمسة ايديها…. كنت مستغرب نفسي اوي ازاي واحدة كنت بحبها كده وقاعدة قدامي مش حاسس بحاجة ناحيتها… حتي اما مسكت ايدي كل اللي كنت بفكر فيه انتي اتأخرتي ليه..
صمتت ليلي فأردف: انتي الوحيدة اللي مكنتش عاوزها تشوفني وانا قاعد مع بسنت …. خصوصا أنى…… ابتلع أنس كلماته وصمت.
تنهدت ليلي وعيناها علي البحر وقالت: بس واضح انها لسة مأثرة فيك.
أنس: خالص…. ولا فارقة.
نظر لها أنس طويلا، على وجهه ابتسامة صغيرة، مد أصابعه يبعد خصلة من شعرها طارت فالتصقت بوجهها وقال: انتي الوحيدة يا ليلي اللي بكون علي طبيعتي معاها…. بتعرفي تطلعي أحسن ما فيا…. وأسوأ ما فيا.
ابتسمت ليلي أخيرا وقالت: وده مدح ولا ذم؟
لم يجب على سؤالها، صمت قليلا يتأملها وقال بنبرة هادئة: لو بسنت كانت كومبارس في الحكاية…. فأنتي القصة وما فيها.
صمت كلاهما، عيناهم تتابعان أمواج البحر المتلاحقة، اخيرا نظر اليها أنس وقال: نقوم نتمشي ولا لسة زعلانة؟
رفعت ليلي حاجبها بتحد واضح وقالت: وأزعل ليه؟
ابتسم أنس ومد يده امسك بكفها بين راحته ومشي الي جوارها علي شاطئ البحر… سحبت يدها من بين كفه بهدوء وقالت وهي تعقد ذراعيها امام صدرها: مش عارفة موضوع انك تمسك ايدي ده جديد النهاردة و انا مسمحتش بيه.
