رواية طعنات الغدر والحب(الفصل السادس والخمسون إلى الأخير) بقلم الكاتبة إيمي | Complete Novel – Reading App
يا حبيبي من حبي فيك لا هتكلم ولا أغنيلك
من اليوم ده هأحبك حب جديد يخليني حبيبي أدعيلك
يا حبيبي من حبي فيك لا هتكلم ولا أغنيلك
من اليوم ده هأحبك حب جديد يخليني حبيبي أدعيلك
الله يباركلي فيك يا أغلى من عينيا … الله يخليني ليك و اجيبلك الدنيا ديا
الله الله … الله الله يحميك حبيبي يا عمري يا غالي ويخليك ليا
بعد انتهاء الحفل صلى كل منهم العشاء وسلمت دادة على نيرمين واوصتها على سيف واوصت سيف عليها كما سلمت ماجدة وعم حسين ومريم على منى وودعوا بعضهم وانطلقوا الى المطار للالحاق بالطائرة ليصلوا فى معاد الطائرة بالضبط
واقلعت بهم الطائرة لتصل بهم الى شرم بعد حوالى اربعين دقيقة
………………………….
رجع خالد الى البيت بعد هذه السهرة الرائعة ودخل وهو يبتسم
عندما راى اخته سارة بانتظاره فاقترب منها وملس على شعرها بحنان قائلا:خير يا سوسو سهرانة لحد دلوقت ليه
سارة بتردد:الحقيقة يا أبيه فى حاجة كنت عايزة اقولك عليها
بس خايفة ابلة سلمى تزعل منى
خالد بقلق:اتكلمى يا حبيبتى فى ايه
سارة:انا دخلت عند ابلة سلمى علشان كنت عايزاها تترجملى جملة بالانجليزى فلقيتها….
خالد:لقيتيها ايه اتكلمى
سارة:لقيتها بتشم حاجة معرفش هى ايه؟
تغير وجه خالد وقال:بتشم بودرة بيضة؟؟
سارة:ايوة وعلى فكرة هى اترجتنى مجيبلكش سيرة وخايفة اوى احسن تزعل منى
خالد:طب روحى انتى يا حبيبتى
سارة:طب متعرفهاش انى قولتلك حاجة علشان متزعلش
هز خالد راسه وقال:طب روحى نامى وانا هتصرف
غادرت سارة بينما توجه خالد الى غرفة سلمى وطرق الباب
فتحت له سلمى وعندما راته قالت بابتسامة :خالد!!!
هى الحفلة خلصت ولا ايه؟؟
تجاهل خالد سؤالها ودخل الغرفة ونظر حوله كانه يبحث عن شئ ما
سلمى:مالك يا خالد بدور على حاجة؟؟
نظر اليها بحدة ثم استكمل البحث والقى الوسائد وازاح المرتبة فوجد عدة اكياس صغيرة فكانوا حوالى اربعة اكياس
امسكهم ونظر اليها بحدة وقال بغضب:ممكن تفهمينى ايه دول؟؟
ابتلعت سلمى ريقها بخوف وقالت:دول…
خالد:مافيش فايدة
انا بحاول اساعدك وانتى مصممة تدمرى نفسك
على العموم انا قابلت دكتور بيشتغل فى المصحة اللى هوديكى فيها
وقالى انك لازم اوديكى ضرورى انا كنت هخليه يتولى علاجك عندى بس الظاهر انه كان عنده حق لما قال ان حالتك مينفعش تتعالج هنا
تركها وذهب فوقفت على الباب قائلة:استنى بس يا خالد ارجوك متزعلش منى
انا والله مكنش قصدى اكدب عليك بس انا عنتهم معايا على اساس انى لو فشلت فى انى اتحمل الالم هلجألها بس انا كان جوايا رغبة انى مخدش الحاجات دى تانى
ارجوك صدقنى
نظر اليها وهو قاطب وجهه قائلا:سواء صدقتك او مصدقتكيش
كده كده هتروحى المصحة وده لمصلحتك وكان لازم اعمل كده من زمان واحط عليكى حراسة تحميكى وخلاص
بس ملحوقة من بكرة هتبدأى العلاج هناك
تركها خالد وذهب الى غرفته بينما جلست سلمى وهى تشعر بالخوف من ذهابها الى المصحة كما شعرت بالحزن لانها اغضبت خالد بسبب كذبها عليه
دخل خالد غرفته وفك ازرار قميصه ثم خلعه والقاه على السرير وجلس عليه وهو يدلك وجهه بحزن
هنا سمع صوت طرق الباب فظنها اخته فقال:تعالى يا سارة
فتحت سلمى الباب واغلقته خلفها وهى تقول:انا مش سارة
انا سلمى
انتفض خالد من مكانه وقال :سلمى!!ايه اللى جابك هنا؟؟
افرضى حد شافك عندى يقول علينا ايه؟؟
سلمى وهى تقترب:متخافش انا همشى حالا
انا بس معرفتش انام لانك زعلان منى صدقنى يا خالد انا مكونتش ناوية اخد الحاجات دى تانى بس ضعفت
انت متعرفش الالم اللى بتعرضله لما بتتمنع عنى
خالد:خلاص يا سلمى مافيش داعى للكلام ده دلوقت اللى حصل حصل
سلمى:بس شكلك لسة زعلان
خالد:وزعلى هيفرق معاكى فى ايه
سلمى:ازاى بقى
اقتربت وهى تقول :انت متعرفش غلاوتك عندى ولا ايه؟؟
انتبه خالد الى نفسه فكان واقفا بدون القميص فامسكه واخذ يرتديه وهو يقول لها:طب كفاية كده بقى احنا شكلنا كده مش لطيف
سلمى:اوك انا همشى
بس عايزة منك طلب بلاش تودينى المصحة ارجوك يا خالد
انا هنا ممكن استحمل الالم لانك جنبى لكن هناك مش هلاقى حد يصبرنى على العذاب اللى هشوفه
خالد :متخافيش يا سلمى انا مش هسيبك وهفضل جنبك حتى لو روحتى المصحة
سلمى بفرحة:بجد يا خالد!!
خالد:طبعا
سلمى:طب ممكن اعرف انت ليه بتعمل معايا كده مع انى مش قريبتك ولا اهمك فى حاجة؟؟
خالد:ازاى بقى انتى مش تبقى قريبة اعز اصدقائى؟؟
تنهدت سلمى بضيق قائلة:بس!!
علشان كده بس!!
خالد:لأ مش كده بس
سلمى:اومال ايه كمان
خالد:لانك زى اختى والمفروض انى متخلاش عنك حتى لو متقربليش
سلمى بضيق:بس انا مش اختك
خالد:ما انا عارف
سلمى وقد بدا عليها الضيق اكثر:لأ مش عارف
انا بحبك عارف يعنى ايه بحبك افهم بقى
نظر اليها خالد بصدمة ومنعته المفاجأة من الرد
سلمى:مالك بتبصلى كده ليه؟؟
خالد:ارجوكى يا سلمى امشى دلوقت
سلمى:حاضر انا همشى
بس فى حاجة نفسى اقولهالك قبل ما امشى
خالد:عايزة تقولى ايه؟؟
نظرت سلمى فى عينيه لحظات ثم قالت:
عايزاك تعرف انى اول مرة احب حد من قلبى
وانت الوحيد اللى دخلت قلبى من اول لحظة شوفتك فيها
وعارفة انى مش فى بالك خالص ويمكن تكون مبتحبنيش
بس ده ميمنعش انى افضل احبك العمر كله
اقتربت منه وطبعت قبلة سريعة على خده وخرجت مسرعة من عنده واغلقت الباب خلفها
بينما ظل خالد واقفا غير مصدق لما حدث
فوضع يده على موضع القبلة وهو فى غاية الصدمة من جرأتها
…………………………….
وصل العروسين الى الفندق الفخم الذى حجزوا فيه جناحين لكل منهما
جلست كل من نيرمين ومنى وهما تنتظران قدوم سيف وعمر اللذان ذهبا لمعرفة رقم الجناح المحجوز
ولكنهما اكتشفا خطأ قد وقع بشأن الجناح الخاص بعمر فلم يتم حجز جناح له
كانت نيرمين ومنى مازالتا جالستين وهما لا يفهمان سبب تأخيرهما
نظرت نيرمين الى منى وقالت بصوت مرتبك ومنخفض بعض الشئ:
منى!!
انتى…
انتى مبسوطة؟
منى بسعادة:جدا
نيرمين وبدا عليها التوتر:طب الحمد لله
منى:مالك يا نيرمين؟حاساكى مش مبسوطة
نيرمين:بالعكس انا مبسوطة جدا بس..
منى:بس ايه؟
نيرمين:بس خايفة
منى:من ايه؟!!
نيرمين:مش عارفة حاسة ان قلبى مقبوض وخايفة
منى:خايفة من ايه بس دى ليلة العمر والموضوع بسيط خالص
هى بس عايزة شوية جرأة وكله هيعدى
تنهدت نيرمين واخفضت بصرها لتنظر الى دبلتها وهى تحركها
منى:نيرمين!!!
انتى لسة بتفكرى فى الست اياها؟؟اوعى يا نيرمين متنكديش على نفسك وعلى سيف فى ليلة زى دى
سيف بيحبك واديكى شايفة هو فرحان قد ايه
نيرمين بصوت هادئ حزين:لأ يا منى انا مبفكرش فيها خالص انا خلاص
اقتنعت بان اللى فات لازم انساه مادام هو بيحبنى
المشكلة انى كنت الاول نفسى اتجوز سيف بسرعة لانى بحبه وكنت اتمنى اكون انا وهو مع بعض تحت سقف واحد
بس من ساعة ماعرفت اللى حصل لسلمى ووصفتلى قد ايه اتعذبت وانا بقيت بخاف
من سيف ومش عايزاه يقربلى تفتكرى انا كده بقيت معقدة؟؟
منى:كلام ايه ده يا نيرمين لأ طبعا انتى مش معقدة متوهميش نفسك
وبعدين مافيش وجه مقارنة اساسا بينك وبين حالة سلمى
طب هى اتعرضت لاغتصاب وعنف لكن سيف بيحبك واكيد هيكون حنين عليكى ولا يمكن هيئذيكى ابدا بالعكس انتى هتلاقيها ليلة رومانسية وهادية وانتى نفسك هتبقى فى دنيا غير الدنيا
نيرمين بقلق:ربنا يستر
علم سيف رقم جناحه وقام احد العاملين بتوصيل الحقائب الى جناحه
بينما ظل عمر منتظرا قدوم مدير الفندق لحل المشكلة
ثم وقف سيف مع عمر ليحل تلك المشكلة وجاء مدير الفندق وحدثوه عن الامر وكانا فى غاية الضيق من هذا الاهمال الذى حدث فطمأنهم بانه سيتصرف بتجهيز جناح آخر لعمر فورا وسيكون عشاء تلك الليلة مجانا كتعويض له عن الخطأ غير المقصود وطلب منه الانتظار لحظات
هنا قال سيف :طب استأذن انا بقى يا عمر
سلام
عمر رافعا حاجبيه بتعجب:ايه ده ايه ده انت هتبيعنى وتمشى ولا ايه؟
سيف ممازحا:مع نفسك يا حبيبى انا مش هضيع وقت اكتر من كده
ربنا معاك
تركه واتجه الى نيرمين
ابتسم عمر قائلا بصوت عالى بعض الشئ ليسمعه:هى بقت كده؟؟ماشى ماشى مردودالك برده
ثم تنهد قائلا:حظك من السما
اتجه عمر خلفه ذهابا الى عروسه هو الآخر
نظر سيف الى نيرمين قائلا:يا لا يا نيرمين
نظرت نيرمين الى منى بخوف ثم قالت لسيف:على فين؟؟
سيف:جرالك ايه هنطلع الجناح بتاعنا
ابتلعت نيرمين ريقها بقلق فابتسمت لها منى وقالت لها بصوت مطمئن:يالا يا نيرمين مستنية ايه؟
قامت نيرمين وشبكت زراعها بزراع سيف ووقفا ينتظرا نزول الاسانسير
نظر عمر الى منى قائلا:شوفتى الحظ؟؟
اهم دلوقت هيطلعوا قبلنا واحنا هنفضل مستنيين
يارب سهل
حظوظ!!!
