رواية متاهة مشاعر(الفصل الخامس والثلاثون إلى الأخير)بقلم نهى طلبة | Complete Novel – Reading App

ـ أنتِ كويسة؟..

أومأت برأسها وهي تبتسم بشقاوة:

ـ جرى ايه يا مازن هو أنا عروسة جديدة لسه!

اقترب ليضمها بين ذراعيه ويرفع ذقنها لتتلاقي عيونهما وتتواصل النظرات معبرة عن عشق كاد أن يكتمل لولا ذلك الظل القاتم بداخلها والذي يحثها حثاً لمصارحته خاصة وهي تلمس صدق مشاعره وانفتاحه الكلي معها.. تعلم أنه منحها الليلة قلبه وكيانه وجسده بالكامل وجاءت همسته لتؤكد مشاعرها وتزيد من احساسها بالذنب:

ـ أيوه.. الليلة أنتِ عروستي.. اعتبري الليلة بداية حياتنا سوا..

لم تعد قادرة على الكتمان.. لتصارحه ويبدآ معاً بداية حقيقية تلك المرة:

ـ مازن.. أنا..

ضاعت باقي كلماتها بين شفتيه وهو يعود ليكتسحها تلك المرة بعاطفة مجنونة.. كان يعبر عن مشاعره بجموح وجنون.. جنون بادلته إياه وهي تهمس باسمه دون انقطاع مما زاد جنونه جنوناً..

تلك المرة لم يبتعد عنها بل ظل متمسكاً بها هامساً في أذنيها بكل ما ذكر في قاموس العشق والغرام.. عرى مشاعره أمامها وهو يهمس بوله:

ـ بحبك با نيرة.. حبك هو الشيء الوحيد اللي ثابت جوايا.. يمكن حبي ليكي اتقدر من قبل ما نتولد احنا الاتنين.. دايماً كنتِ بالنسبة لي شمسي اللي بتنور دنيتي.. لا.. شمس ايه.. أنتِ أساساً دنيتي كلها.. الحب بيبدأ مع نيرة.. وعمره ما هينتهي أبداً يا حبي.. ساعات بحس أنه قدري.. قدري أنك تكوني ليا.. وأحلى قدر..

صمت للحظة ليطبع قبلة رقيقة على وجنتها وأردف:

ـ هقولك على حاجة ما حدش يعرفها أبداً.. أنا كنت بدأت أجهز ورقي للهجرة لما اتخطبتي.. كنت مقرر أني أسافر بعد فرحكوا على طول..

ابتسم بشجن وأكمل:

ـ مش عايز أفكر في الأوقات دي تاني.. أنا كنت بتحرق من جوايا مع كل لحظة بتمر وأنتِ مش معايا.. وبعد جوازنا.. قلبي وعقلي كانوا هيجننوني معاهم.. كنت بهرب منك ليكي.. عقلي بيقولي ابعد وقلبي بيشدني شد ناحيتك.. طاوعت عقلي لأني كان ممكن اتجنن فعلاً لو سيبت مشاعري ليكي تتحكم فيا.. ضغطت على نفسي كتير وأجبرتها على البعد.. لحد.. لحد اللحظة اللي كنت هفقدك فيها.. يااااه..

سكت قليلاً ليبتلع غصة كادت أن تخنقه:

ـ لحظات سودا ما أتمنهاش لألد أعدائي.. لحظات قلبي كان بيصرخ ويتقطع ويلوم عقلي.. كان بيصرخ فيا ايه معنى حياتك من غيرها.. انتقمت لكبريائك وكرامتك؟.. ضيعتها وعاقبتها؟.. ياه يا نيرة.. أنا كان ممكن اقدم أي حاجة وترجعي لي تاني.. بس تكوني موجودة في دنيتي..