رواية متاهة مشاعر(الفصل الخامس والثلاثون إلى الأخير)بقلم نهى طلبة | Complete Novel – Reading App

ابتسم وهو يجبها:

ـ حتى لو اتغيرت.. تغييرها لنفسها.. ما يهمنيش في حاجة..

أغمضت عينيها وهي تسأله:

ـ حتى لو كانت الصفات اللي بتكرهها فيها اختفت؟..

اقترب ليرفع ذقنها ويأمرها بهمس:

ـ افتحي عينيكِ.. افتحيهم يا صبا..

فتحت عينيها على مضض ليفاجئها بسؤاله:

ـ كلامك ده معناه أنك بتفكري في ارتباطنا وقلقانة على مشاعر نيرة؟.. ولا..

همست ورائه كالمخدرة:

ـ ولا ايه؟..

أجابها بتوق:

ـ ولا غيرة من ذكرى أنثى مرت في حياتي..

أبعدت وجهها عنه وكأنها استفاقت من حلم ناعم لتهمس بارتباك:

ـ غيرة!.. وأنا هغير ليه؟..

أجابها برقة:

ـ ليه!.. عشان أنتِ الست الوحيدة اللي مسموح لها تغير عليَّ.. وتسألني.. وتطالب بأجوبة.. وأنا هجاوب بكل طاعة وسعادة كمان..

رمشت بعينيها تحاول كسر شرنقة الغزل التي يلفها بها إلا أنه لم يمنحها الفرصة وأكمل بنبرة أكثر حسماً:

ـ نيرة كانت بالنسبة لي حبيبة أخويا ومراته..

رددت بحيرة:

ـ كانت؟..

أومأ موافقاً وهو يغمزها:

ـ أيوه.. دلوقتِ بقيت أخت حبيبتي.. اللي هتبقى قريب قوي حبيبتي ومراتي..

أبعدت وجهها الذي تورد خجلاً وتجاهلت الرد عليه فهي لم تعرف ما عليها قوله أو فعله.. فهو يفهمها بشدة.. يستوعب مخاوفها ويفتتها بكلماته.. وما يزعجها أنها تدرك صدقه..

ابتلعت لعابها بصعوبة ووجنتيها تزدادان احمراراً والتفتت لتنظر من النافذة المجاورة لها وهي تشير له بارتباك:

ـ دور العربية بس خلينا نروح لها بسرعة.. آه.. هي في فيلا دنيا.. مش في بيت مازن..

ظهر ذهول حسن بهتاف عالٍ:

ـ فيلا دنيا!!!.. ازاي..

جمعت صبا ذراعيها حول منى التي بدأت تنزعج من الصوت العالي وأخبرته وقد عاودها حنقها على مازن:

ـ ما اعرفش ازاي.. اهو ده اللي حصل.. عارف الطريق ولا أوصفهولك.. شكلك هتوهنا والله..

ابتسم بمداعبة وهو يفتح باب السيارة:

ـ ما تتفضلي أنتِ تسوقي وأنا هقعد جنبك زي التلميذ الشاطر المؤدب..

احتقن وجهها وهي تخبره بهمس:

ـ أنا ما بعرفش أسوق..

هتف بعجب:

ـ بجد!.. في حاجة ما بتعرفيش تعمليها..

لتجبه بطريقة طفولية لم تخلُ من الدلال:

ـ مش غلطتي طبعاً.. بس امتحان السواقة ده غبي.. ازاي يعني متوقعين أني أمر بين الــ كونز من غير ما توقع.. ده ولا السحر..

ابتسم لها بعبث:

ـ وأنتِ أروع ساحرة قابلتها..

أشارت له بحنق حتى لا يبدأ في الغزل: