رواية متاهة مشاعر(الفصل الخامس والثلاثون إلى الأخير)بقلم نهى طلبة | Complete Novel – Reading App

بقي على تلك الحال كتمثال جامد مغمض العينين لا يتحرك منه إلا بضع دمعات تجري على وجنتيه وفي تلك المرة لم يبذل جهداً لايقافهم…

مرت فترة لا يدري إن كانت دقائق أو ساعات وأخيراً تحرك خطوات قليلة ليتهالك جالساً وقد ثنى ركبتيه وارتكز بمرفقيه عليهما محيطاً وجهه بكفيه وملتفتاً بكل كيانه نحو الصرح الرخامي الصامت رامقاً إياه بنظرة حنين ثم ابتلع ريقه هامساً:

ـ منى.. ملاكي.. وحشتيني قوي.. قوي.. ما فيش كلام ممكن يعبر عن اللي جوايا.. ياااااه يا منى.. جوايا كلام كتير.. كتير قوي.. مش عارف أبدأ منين..

هز رأسه بحيرة ثم أخرج صورة لابنته منى الصغيرة ليرفعها بمواجهة الرخام البارد ويكمل بخفوت:

ـ منى.. أعرفك بمنى الصغيرة.. أيوه اتجوزت.. استني بس.. مش زي ما أنتِ فاهمة.. عارفة لورا.. أكيد طبعاً فاكراها.. أيوه.. هي اللي اتجوزتها..

ضحك بمرارة ليكمل وكأنه سمع ردها:

ـ لا طبعاً مش جمالها هو السبب.. ولو أني ممتن للجمال ده لأن منى الصغيرة ورثته.. هكلمك بصراحة يا منى.. أنتِ الوحيدة اللي هتفهميني.. أنا اتجوزتها في لحظة ضياع.. غياب وعي وإدراك.. تعرفي أني جددت عقود جوازي بها بعد ما بلغتني بحملها..

هز رأسه بمرارة ليكمل:

ـ ليه؟.. بتسأليني ليه؟..

ابتسم بمرارة وهو يهز كتفيه:

ـ ما كنتش متأكد من صحة العقد الأول..

عادت نظراته لصورة ابنته وتحركت أنامله تتلمسها بحنان ثم شردت نظراته للمجهول:

ـ لا يا منى.. ما حبتهاش.. ما اقدرتش.. يا ريت الواحد كان ممكن يتحكم في قلبه.. لورا.. إنسانة كويسة جداً.. لكن غصب عني بتمثلي لحظة انعدام إرادتي.. لحظة هي اللي سيطرت فيها على حياتي.. أنا مش بلومها.. لكن من جوايا.. الراجل الشرقي التقليدي.. حاسس أنه كبريائه وكرامته تم اغتصابهم..

قهقه عالياً وهو يواجه الصرح الرخامي:

ـ بتضحكي.. أنا عارف… بس ده إحساسي.. وللأسف مش عارف أتغاضى عنه..

سكت للحظات ثم أكمل وكأنها أجابته:

ـ عندك حق.. مش ده اللي عايز أقوله.. في جوايا كلام تاني.. كلام يمكن كان لازم أقوله للورا الأول.. لكن.. منى.. أنا ما نسيتش ومش هنسى.. منى.. أنتِ كنتِ أحلى حاجة مرت في حياتي.. حبيتك.. حبيتك قوي.. فراقك.. فراقك دمرني.. غربني.. غربة كانت جوايا مش مجرد بعد عن أهلي وبلدي.. سنين وأنا مش عايش.. بتنفس.. وأكل وأشرب.. لكن مش عايش.. لحد ما.. ما شوفتها.. شوفتها بجد.. صبا.. صبا يا منى.. فاكراها..