قصة ثمن ضحكتي بقلم مايا خالد
— بتغيري يا رنا؟
شهقت باستهجان.
— أنا؟! أغير منك إنت؟! يا راجل ده أنا كنت بفكر أطلب للبنت عصير عشان شكلها عطشانة وهي بتجري وراك!
ضحك فارس، وكانت دي أول مرة تسمع ضحكته الحقيقية.
ضحكة هادية، غير متكلفة، خلت ملامحه تبان أصغر وأقل قسوة.
رنا سكتت للحظة، وبعدين رجعت تبص في القائمة بسرعة.
فارس لاحظ.
— إيه؟ سكتّي ليه؟
— افتكرت إن الضحك مش لايق عليك.
— ليه؟
رفعت عينيها له.
— عشان لو فضلت كده، ممكن حد يفتكرك بني آدم طبيعي.
ابتسامته اختفت تدريجيًا، لكنه ما زعلش.
مد إيده ناحية طبقها، وقطع لها قطعة من اللحم، ثم رجع الطبق قدامها.
— كلي.
بصت للطبق، ثم له.
— إنت بتعاملني كأني طفلة.
— وإنتِ بتتصرفي كأنك عايزة تثبتي لكل اللي حواليكي إنك مش محتاجة حد.
ردت بعناد:
— فعلًا مش محتاجة حد.
فارس مال بجسمه للأمام.
— حتى لو كنتِ محتاجة؟
سكتت رنا.
السؤال جه في مكان موجع، لأنها من يوم ما أبوها تخلى عنها وهي بتحاول تقنع نفسها إنها مش محتاجة أي حد.
رفعت عينيها له وقالت بهدوء:
— خصوصًا لو الشخص ده إنت.
لأول مرة في الليلة دي، فارس ما لاقاش رد جاهز.
بعد العشا، خرجوا من المطعم.
كان فارس بيتكلم في الموبايل جنب العربية، ورنا واقفة بعيد عنه، لما شافت شابًا بيقرب منها.
— آنسة رنا؟
بصت له باستغراب.
— أيوه، حضرتك مين؟
ابتسم.
— أنا كريم، كنت معاكِ في المدرسة الإعدادية. مش فاكراني؟
رنا دققت في ملامحه، وبعد لحظة ابتسمت.
— كريم؟! إنت اختفيت فين كل السنين دي؟
اتكلموا لدقايق، وضحكت رنا لأول مرة من قلبها من يوم ما خرجت من بيتها.
لكن الضحكة ما كملتش.
فارس ظهر جنبها فجأة.
— رنا، العربية جاهزة.
بصت له.
— دقيقة، أنا بسلم على كريم.
فارس مد إيده لكريم ببرود.
— فارس.
كريم صافحه باحترام، ثم بص لرنا.
— اتبسطت إني شوفتك. ممكن آخد رقمك نتكلم؟
قبل ما رنا ترد، فارس قال:
— لأ.
رنا لفتت له بصدمة.
— نعم؟!
كريم ارتبك.
— أنا كنت بسأل رنا.
فارس رد بنفس البرود:
— وأنا برد عليك.
رنا حسّت بدمها بيغلي.
— إنت مالك؟! أنا اللي أقرر أدي رقمي لمين!
فارس بص لها، وعينيه ضاقت.
— رنا، العربية.
— مش راكبة غير لما تعتذر له!
كريم حاول يتدخل:
— خلاص يا جماعة، مفيش مشكلة…
لكن رنا كانت مصممة.
فارس قرب منها وقال بصوت منخفض، لكنه حاسم:
— مش هكرر كلامي قدام الناس.
رنا رفعت وشها بعناد.
