قصة الحلم والسراب(الفصول الأخيرة) بقلم إيمان عطية

آه بالحق… جارنا الأستاذ عادل هيسيب الشقة بجد؟
_ أيوة يابني هينقل الشهر الجاي.
_ طب كويس أوي… هانزل أكلم صاحب العمارة علشان آخدها وألحق أظبطها وادهنها… سلام ياأمي… دعواتك.
_ ربنا يسهل لك الحال يابني.. ويوقفلك ولاد الحلال.

مر أسبوع وخلاله… جددت لماما الأنتريه اللي إدتني فلوسه وقت جوازي الأول…. وجبت هدية دهب قيمة لفرح بنت أختي…
وفي يوم إتكلمنا أنا وبابا وسألني عن رأيي النهائي في الجوازة وقولتله إني صليت استخارة والحمد لله حاسة براحة من ناحية زياد.. لكن بردوا اللي يشوفه بابا أنا هعمله… قاللي توكلنا على الله… كلميه وقوليله الخيرة فيما اختاره الله.. وربنا يابنتي يجعلها جوازة العمر ويهدي سرك ويسعدك…
أمنت عالدعاء وقمت أكلم زياد وأفرحه… وفعلا فرح جدا وقاللي أخيرا ياعمو اتكرمت ووافقت…

المهم جم تاني يوم هو ومامته واتفق مع بابا إننا نروح نتغدا عندهم الأسبوع الجاي ونشوف الشقة اللي هنتجوز فيها… هي كانت لسة فيها الساكن القديم بس شوفنا شقة زياد ومامته وتقريبا الاتنين نفس النظام….

إتغدينا معاهم أنا وماما وبابا غدوة سمك متينة… سنجاري وسمك مقلي وجمبري وشوربة سي فود وسلطات ورز صيادية… الأكل كان جاهز من مطعم مشهور في اسكندرية.. بس كان تحفة… وهو بصراحة…
وبعد الغدا شربنا شاي بنعناع من إيدين طنط كان جميل أوي.. نزلنا بعدها إشترينا الشبكة والدبل… واتمشينا عالبحر وبعدين زياد عزمنا على رز بلبن تحفة من عند الشيخ وفيق… بصراحة اليوم كان جميل جدا بكل تفاصيله.. وحبيت اسكندرية جدا بشوارعها وناسها وجوها وكل حاجة فيها…

بقينا بعد المغرب وبابا قال كفاية كدة نروح بقا… زياد صمم يوصلنا لحد بيتنا في المنصورة… روح مامته الأول وبعدين وصلنا… بابا كان رافض خالص مش عاوز يتعبه لكن زياد صمم هو كمان ووصلنا فعلا… بابا عزم عليه يطلع معانا شوية يرتاح من الطريق… طلع فعلا شرب قهوة مع بابا ونزل تاني عشان يلحق يوصل اسكندرية بدري….
أول ماوصل البيت فضل يكلمني طول الليل ومبسوط من اليوم الجميل اللي قضيناه مع بعض…
فضلنا نتكلم كل يوم ويسمعني أجمل كلام…
بعد زيارتنا لاسكندرية بأسبوعين عملنا حفلة الخطوبة عالديق ولبسنا الدبل…. وبدأنا بعدها نوضب الشقة ونشتري الجهاز.. كنت حاسة إنها أول جوازة ليا… نسيت أحزاني ووجعي وعيشت أجمل فترة خطوبة…. ربنا يسرلنا كل حاجة وخلصنا الشقة والجهاز وكل حاجة في حوالي شهرين… إتفقنا على موعد الفرح وقبله بأسبوع…. سامية كانت قاعدة عندنا هي وفرح وماهر كان بييجي كل يوم يتغدا معانا ويروح… وفي اليوم ده حكالنا إن أحمد إتصل بيه بيحاول يصالحه ويعتذرله عاللي حصل وإنه ندمان وتعبان… طلق مراته بعد ماطلعت عينه وزهقته في عيشته من طلباتها اللي ملهاش آخر وإنه عرف قيمتي ونفسه أسامحه وارجعله… ماهر قاله شيل بلوتك لوحدك.. ده اختيارك وقرارك.. وقاله إني هتجوز خلال ايام.. وحتى لو كنت لسة مش مخطوبة… عمري ماكنت هوافق أرجعله ولا حد من أهلي ولا ماهر نفسه كان هيوافق إني أرجعله… بصراحة زعلت عاللي حصلله… ورجعت فكرت وقلت سبحان الله. لعل الخير يكمن في الشر… وزي أنا ماحياتي اتغيرت للأفضل بعد طلاقي منه… جايز هو كمان ربنا يعوضه خير بعد مافشل مرتين في جوازه… المهم النوايا الحسنة والتصرف السليم… ورب الخير لا يأتي إلا بالخير…