رواية وصية صفية(الفصل الخامس عشر إلى الحادي والعشرون)بقلم منال أم إبراهيم مرجان | New Episode – Read Online

الفصل الخامس عشر انهت لبنى إمتحانها الأخير وخرجت لتجد نورا في إنتظارها امام باب الكلية ... اقتربت منها نورا قائلة: - ها يا لولو عملتي إيه النهاردة? تنهدت لبنى قبل ان تجيبها قائلة بإرتياح: - الحمد لله يا نورا...انا مش مصدقة ان النهاردة كان اخر يوم في الإمتحانات - معاكي حق...الحمد لله كان هم واتزاح...يلا بينا بقى - يؤسفني اقولك انك حتروحي من غيري النهاردة...معلش بقى يا نورا - نورا بدهشة: ليه يا لبنى ? خير في حاجة طمأنتها لبنى قائلة بإبتسامة : - كل الحكاية ان احمد حيوصل كمان شوية من دمياط...هو قالي بما إن النهاردة اخر يوم في الإمتحانات حييجي عشان نخرج سوا ونتفسح شوية...وكمان جاي عايز عمو صفوت فموضوع مهم تساءلت نورا قائلة في حيرة: - ماتعرفيش هو عايز بابا فإيه? رفعت لبنى كتفيها قائلة : - علمي علمك...هو قالي لما نتقابل حيقولي ثم نظرت أمامها لتجد احمد يقترب منهما فقالت بسعادة: - آهو احمد جه آهوه وقف احمد امامهما والقى السلام عليهما ثم صافح لبني وسأل نورا عن حالها فاجابت قائلة: - الحمد لله يا احمد...انت اخبارك إيه وأخبار عمتو الفت وادهم ايه? - كلنا كويسين الحمد لله...معلش بقى يا نورا مضطر اخد لبنى منك النهاردة - لا عادي براحتك ...المهم ان لبنى تكون مبسوطة سألت لبنى احمد مستفسرة: - هو احنا حنروح فين بالظبط يا احمد? - حافسحك فسحة عمرك ماحتنسيها شعرت نورا بالحرج فاستأذنت قائلة: - طيب يا جماعة عن إذنكوا أنا بقى عشان ما اعطلكوش التفتت إليها لبنى قائلة بجدية: - ماتيجي معانا يا نورا? - لا يا شيخة...طيب بس احسن اصدق وآجي معاكوا بجد - احمد: تنورينا والله...على فكرة انا ممكن اكلم علي او انتي كلميه واقوله ييجي ونخرج كلنا سوا - لا مافيش داعي...روحوا انتوا اتفسحوا واتبسطوا وماتفكروش فأي حاجة...وأنا حاروح البيت أنام عشان بقالي مدة من اول الإمتحانات مش بانام كويس ...يلا عن إذنكوا عرض عليها احمد توصيلها فاجابت قائلة: - مافيش داعي تتعب نفسك...وبعدين انا معايا عربيتي ودعتها لبنى قائلة بإبتسامة: - مع السلامة يا نونو وخلي بالك من نفسك - سلام ...ماتنسيش تكلميني فالتليفون لما تروحي غادرت نورا لتركب سيارتها فسأل احمد لبنى قائلا بقلق: - هيا مالها نورا يا لبنى...شكلها حزين اوي كده ليه? - مش عارفة يا احمد...بقالها فترة على كده...وكل ما اسألها تقولي المذاكرة والإمتحانات - ماتعرفيش هيا عاملةإيه مع علي? هزت رأسها نافية ثم قالت: - ما اعرفش والله يا احمد ...علي قالنا مش عايز حد يدخل بينهم ومن ساعتها بطلت اسألها عن حاجة وهيا مش من النوع اللي بيقول حاجة - ربنا يصلحلهم الحال...باقولك إيه سيبك بقى من أخوكي ومراته وخلينا فنفسنا شوية... تعرفي انك وحشتيني اوي خفضت رأسها واجابت قائلة بخجل: - وانت كمان على فكرة - طيب يلا بينا بقى عشان نلحق نتفسح وكمان عشان اقولك على الموضوع اللي عايز خالي صفوت فيه عادت نورا إلى المنزل لتجد سامح يجلس بمفرده بإنتظار قدوم نادية...ومن إن رأها حتى هب من مكانه واتجه نحوها قائلا: - ازيك يا نورا اجابت نورا قائلة في ضيق: - الحمد لله يا أستاذ سامح ... - إيه أستاذ دي? مش انا خلاص بقيت جوز أختك يبقى تقوليلي سامح...سامح وبس زفرت نورا بشدة ثم قالت في ضجر: - اسفة ماقدرش.. ثم قالت محاولة تغيير الموضوع: - هيا نادية عرفت ان حضرتك هنا? أومأ برأسه مؤكدا : - ايوه عرفت...الداده بتاعتكوا طلعتلها من نص ساعة وبلغتها وقالتلي انها نازلة حالا ولحد دلوقتي مانزلتش...عاجبك اللي هيا بتعمله معايا ده ? - اجابت بنفاذ صبر: والله دي حاجة ماتخصنيش انتوا احرار مع بعض...وعموما يعني اعتقد ان نادية محتاجة وقت عشان تنسى اللي حصل - بيتهيألي ان اللي حصل ده مش غلطتي لوحدي ...الغلط كان مشترك بيني وبينها ...وبعدين احنا خلاص حنتجوز يعني المفروض نادية تغير أسلوبها معايا شوية...تعرفي انها مش بتكلمني خالص لما بتشوفني فالكلية ...ده حتى زمايلنا مستغربيين من الموضوع ده...ودي أول مرة آجي الفيلا هنا بعد كتب الكتاب وشوفي سايباني لوحدي ازاي...حتى يوم العزومة رفضت تقعد وتتكلم معايا...انتي مش شايفة انها مزوداها شوية ...تعرفي يا نورا...أنا بحسد علي عليكي ... ياريت نادية كانت عاقلة وملتزمة زيك كده...اكيد ماكانش حاجة من دي حصلت...بس والله هيا اللي طمعتني فيها ...أو ياريتني شوفتك قبل ما أقابل نادية...ساعتها عمري ماكنت حاسيبك تضيعي من إيدي صرخت فيه نورا قائلة بإنفعال: - لو سمحت ياريت تلزم حدودك...ماتنساش ان أنا متجوزة...وماتنساش ان اللي بتتكلم عنهادي تبقى اختي...وأنا ما اسمحلكش تتكلم عنها بالطريقة دي ...وعن إذنك انا طالعة اناديلك نادية فوجئت نورا بنادية وهي تهبط الدرج ثم وقفت امامها وقالت بتهكم: - مافيش داعي يا نورا..انا هنا من بدري على فكرة...وكنت مستمتعة اوي بالحوار اللي كان بينكم ...لإنه اكدلي إني معايا حق فاللي بعمله معاه نقلت نورا بصرها بينهما لبرهة ثم قالت بخفوت: - عن اذنكوا صعدت نورا إلى غرفتها بينما بقيت نادية واقفة وهي تسدد نظراتها النارية نحو سامح التي تنم عن كره وإحتقار ثم مالبثت أن قالت في إشمئزاز: - كل يوم بتأكدلي اني كنت غبية اكتر من اليوم اللي قبله ارتسمت على جانب فمه إبتسامة ساخرة وهو يجيبها قائلا : - باقولك إيه يا نادية...بما إن موضوع جوازنا ده بقى أمر واقع خلاص...ماتيجي نهدي اللعب مع بعض شوية ونعقد إتفاقية سلام ونمضي معاهدة الصلح...أو على الأقل نخليها هدنة مؤقتة ولا انتي رأيك إيه? استدارت إليه بكامل جسدها لتصبح في مواجهته وقالت بغل: - ده بعينك...أنا لا يمكن انسى اللي انت عملته معايا ولو بعد مية سنة... وحتى لو فرضنا ونسيته ...حانسى كمان كلامك اللي قلته لعلي فالكلية ولا كلامك اللي سمعته بوداني من شوية - براحتك يا نادية...بس لازم تفهمي ان الحرب دي انتي اللي حتطلعي منها خسرانة ...وعلي فكرة انا كنت جاي عشان ابلغك ان بابا حيكلم والدك عشان يحددوا معاد الفرح بما إن الإمتحانات خلاص خلصت...أنا ماشي... سلام يا قطة -تامر: باقولك إيه يا برنس...ماتفكك من الجوازة دي وتريح دماغك... دي جوازة هم من اولها - ياريت كان بإيدي...انما اعمل إيه بقى ابويا هو السبب الله يسامحه ...مصمم إني اتجوزها بيقولي اللي غلط يتحمل نتيجة غلطته ولو كانت قدمت بلاغ كنا حنتفضح...واحنا مش اد ابوها لو حاربنا فشغلنا حنخسر لكن لو شاركناه حنكسب اكتر - جوازة مصلحة يعني? - مش بالظبط...ما انت عارف ابويا...بيقولي لو عندي بنت ماكنتش حاقبل ان حد يعمل معاها كده...انا بقى لو عندي اخت وراحت مع واحد شاليه مافيهوش حد غيرهم كنت دبحتها وشربت من دمها - انا مش فاهم نجيب باشا مكبر الموضوع اوي كده ليه...وبعدين هيا دي اول واحدة يعني تعمل معاها كده? - بس دي اول واحدة تتجرأ وتتكلم وانا ماكنتش عامل حسابي ان ده حيحصل ...كنت فاكر بنت الإيه حتخاف تجيب سيرة لأهلها لكن طلعت بجحة وعينها قوية وقالتلهم - بس دي باين عليها ناويالك على نية يا كبير ...شكلها كده حتطلع عينك وتكرهك فعشتك - مين دي... احنا بس نتجوز وتبقى تحت إيدي وساعتها حاخلص منها الجديد والقديم ...ويا انا يا انتي يا بنت الدمياطي ************************************ في الصباح كان علي يطرق باب مكتب عمه بالشركة بعد أن ارسل في طلبه ...دخل علي وألقي السلام ثم جلس قائلا: - خير يا عمي حضرتك طلبتني من شوية فيه حاجة? اشار له صفوت قائلا: - اقعد يا علي ...عايز اقولك على حاجة جلس علي فاردف صفوت قائلا: - أنا اتفقت مع نجيب الحسيني ان فرح نادية وسامح يكون بعد أسبوعين من دلوقتي...بما إن الإمتحانات خلاص خلصت يبقى التأجيل مالوش لزوم ...انا بصراحة حاسس ان الجوازة دي عمرها قصير وانهم مش حيكملوا مع بعض عشان كده باقول خلي البنت تلحق تتجوز وتطلق عشان تشوف حياتها ومستقبلها بعيد عنه ...أنا من بعد اللي عمله ده مابقتش طايق اشوف وشه ...وعشان كده أنا عمال اماطل أبوه فحكاية الشراكة دي ...مش عايز حاجة تربطنا بيهم اكتر من كده صدق علي على كلامه وقال بجدية: - مع حضرتك حق يا عمي ...أنا برضه شايف انهم مش طايقين بعض - يبقى علي خيرة الله...وعلى فكرة احمد كان عندي امبارح وكلمني فموضوع ومستني رأيك فيه - خير يا عمي - انت عارف طبعا ان احمد اشترى مني الشقة بتاعتكوا اللي فبيت العيلة عشان يتجوز فيها هو ولبنى ويفضل جنب والدته...وانا كنت عرضت عليه انها تكون هديتي ليه هوولبنى ...لكن هو رفض وصمم يدفع تمنها...ومن يومها وهو بيجهزها عشان الجواز وامبارح لما كان هنا قالي ان الشقة جاهزة خلاص عشان يتجوزفيها - يعني إيه يا عمي مش فاهم ? - مش فاهم إيه بالظبط ? اظن الكلام واضح ياعلي ...احمد عايز يتجوز اليومين دول بيقول مافيش داعي إنه يستنى سنة بحالها - طيب وكلية لبنى يا عمي حتعمل فيها إيه? - احمد قالي إنه حيحولها ورقها على جامعة دمياط وهو حتى قالي إنه أخد رأي لبنى وهيا موافقة ...واضح إنه عمل حساب كل حاجة...ومش فاضل غير موافقتك انت لأن أنا شخصيا ماعنديش مانع - خلاص يا عمي مادام حضرتك موافق واحمد عايز كده ولبنى هيا كمان ماعندهاش مانع يبقى انا كمان موافق - كويس اوي ...يبقى نخلي فرح احمد ولبنى مع سامح ونادية يعني بعد اسبوعين ...إيه رأيك? - والله يا عمي لو احمد موافق يبقى خلاص مافيش مشكلة - ماتقلقش احمد مش حيقولي لأ ... وكده بقى مايبقاش فاضل غير انت ونورا - فعلا كده مايبقاش فاضل غير أنا ونورا حدق فيه صفوت لبرهة ثم قال ساخرا: - هو إيه اللي آه فعلاً? هو انا باقولك عشان تقولي آه فعلا...انت مش ناوي تتجوز انت كمان ولا إيه? - مين...أنا ? - امال انا يعني! فيه إيه يا ابني مالك? انت اتخضيت كده ليه ? - ايوه يا عمي بس مش لما نورهان تخلص دراستها الأول اجابه صفوت قائلا في إعتراض: - طب ما هي لبنى حتتجوز وهيا فاضلها سنة زيها ...إيه المانع انها تكمل دراستها بعد الجواز يعني ? واضح كده انك بتتلكك اسرع علي يجيبه قائلا حتى ينفى هذا الأمر عن نفسه : - لا ابدا وانا حاتلكك ليه بس ...أنا بس خايف هيا اللي ماتوافقش - صفوت بحدة: وهيا حتكسر كلامي يعني? لو انت موافق يبقى خلاص اعتبر الموضوع منتهي وزي ماعملنا كتب كتابكوا مع بعض نعمل الفرح كمان مع بعض. - طيب انا باقول أخد رأيها الأول ...مش يمكن تكون موافقة وساعتها يبقى مافيش مشكلة... - وهو مين قال ان فيه مشكلة اصلا ? وعموما انا حاسيبك تكلمها ولو ان موافقتها من عدمها مش حتغير حاجة بالنسبالي ...لكن زي بعضه اتصل بيها دلوقتي قبل ما اكلم احمد وابلغه بالمعاد نكس علي رأسه وقال بتلعثم: - ايوه يا عمي بس .... - بس إيه يا علي? لو مكسوف تكلمها ادامي اتفضل روح على مكتبك وكلمها من هناك - لا يا عمي مش قصدي بس اصل يعني ........ - صفوت بضيق: يا ابني هو انا حاسحب منك الكلام ماتقول فيه إيه يا علي وتخلصني - العفو يا عمي...اصل أنا مش معايا نمرة تليفونها حدق فيه صفوت غير مستوعب لما قال ثم تحدث اخيرا قائلا : - انت قلت إيه يا علي? - قلت لحضرتك مش معايا تليفونها - نعم يا أخويا ! يا ابني انت بتشتغلني ولا بتتكلم جد? لو بتشتغلني انا ممكن اعديها لكن لو بتتكلم جد دي تبقى مصيبة - العفو يا عمي بشتغلك إيه بس? انا بتكلم بجد طبعا - ياريتك كنت بتشتغلني ... عارف يا علي يا ابن اخويا...البنت دي لو ماتت مشلولة بسببك تبقى معذورة...فيه حد يا ابني معاهوش نمرة مراته اللي كاتب كتابه عليها بقاله شهرين... طيب سيبك من انها مراتك...مش دي برضه بنت عمك ...طيب سيبك من انها بنت عمك...مش دي بنت خالتك مد صفوت يده بهاتفه إلى علي وقال بنفاذ صبر: - اتفضل تليفوني آهوه كلمها منه امتدت يده ليأخذ الهاتف وهو يقول: - طيب وليه من تليفون حضرتك?ماانا حاسجل النمرة عندي واكلمها من تليفوني - مش حينفع مش حترد عليك - على بدهشة: ليه يا عمي? - لأنها مابتردش على أرقام غريبة...فهمت ?اتفضل بقى على مكتبك كلمها وبلغني هيا قالتلك إيه? - حاضر يا عمي...عن إذن حضرتك ذهب علي إلى مكتبه واتصل بنورا من هاتف والدها ليأتيه صوتها قائلة: - السلام عليكم يا بابا - وعليكم السلام ورحمةالله بس انا مش بابا -تفاجأت نورا لسماع صوته فقالت متعجبة: علي! - كويس انك عرفتيني - اجابت قائلة بتهكم: ماتخافش...أنا صحيح ماسمعتش صوتك من مدة وصحيح ان دي اول مرة اسمعه فالتليفون بس لسه فاكراه كويس شعر بالضيق لنبرة السخرية في حديثها ولكنه تجاهل ذلك قائلا: - فاكرةمن امتى...من يوم ماسيبتيني ومشيتي وانا بكلمك يوم عزومة نجيب الحسيني - معلش يا علي اصل مش دايما بيبقى عندي نفس القدرة على الإحتمال ...بس خير ياتري إيه اللي خلاك تتنازل كده وتكلمني قالتليفون لأول مرة - عمي طلب مني اني اكلمك.... قاطعته نورا قائلة: - دي حاجة انا متأكدة منها - علي بدهشة: هيا إيه دي? - انك مش ممكن تكون عملت كده من نفسك لازم يكون حد طلب منك ...يعني حيكون صوتي وحشك مثلا فحبيت تسمعه - طب إيه رأيك إنه وحشني فعلا ...بصراحة انتي كلك على بعضك وحشتيني - اجابت قائلة بإقتضاب:متشكرة - هو إيه اللي متشكرة ...اقولك وحشتيني تقوليلي متشكرة - عادة يعني بيردوا على المجاملات بكلمة شكرا أو متشكرة - وانتي بقى شايفة إني باجاملك - انا مش بس شايفة ...ده انا متأكدة من كده شعر بأنه صبره قد بدأ بالنفاذ من هذه المكالمة السخيفة وهذه الفتاة المسماة بزوجته والتي لا يرضيها أي شئ ...قرر ان يتحدث في الموضوع الأصلي والذي اتصل بها من اجله فقال بحدة: - انا كنت بتصل عشان اقولك ان عمي حدد فرح نادية بعد أسبوعين ومعاه كمان فرح احمد ولبنى فنفس اليوم - ماهي لبنى قالتلي امبارح ان احمد حيكلم بابا فالموضوع ده ... - ماهو احمد كلمه وعمي وافق وحيتصل باحمد يبلغه - ربنا يسعدهم ...هما الاتنين يستاهلوا كل خير - طيب واحنا يا نورهان ? - احنا إيه يا علي? - مش غيرانة من صاحبتك وعايزة تعملي زيها? - لا مش عايزة اعمل زي حد - بس عمي كان بيقترح ان فرحنا احنا كمان يكون معاهم زي كتب كتابنا برضه ماكان معاهم تنهدت ثم قالت بضيق: - عمك بيقترح ... وانت طبعا وافقت عشان خاطر عمك بيقترح ...مش عشان انت عايز كده ...بس انا كمان مش عايزة كده يا علي...ومش موافقة اننا نتجوز دلوقتي ********************************* يعني إيه مش موافقة...بلاش كلام فارغ ودلع بنات ...هيا حتمشي كلامها علينا ولا إيه? انا موافق وانت موافق يبقى خلاص خلصت ومافيش نقاش فالموضوع ده مرة تانية واعمل حسابك ان فرحك بعد اسبوعين حاول علي أن يهدئ من ثورة عمه التي اعقبت علمه برفضها لفكرة تقديم موعد الزواج فقال بجدية: - يا عمي بعد إذن حضرتك أنا باقول مافيش داعي ان حضرتك تضغط عليها ...مادام هيا رفضت يبقى ماعندهاش إستعداد نفسي للموضوع ده في الوقت الحالي مطت شفتيه قائلا في إستياء: - بلاش الكلام الكبير ده يا علي الله يخليك ...إستعداد نفسي إيه وكلام فارغ إيه? أنا اللي أقوله يتنفذ من سكات...ولا بنت صفية فاكرة نفسها حتمشي كلامها عليا ...طب أنا بقى كبرت فدماغي وفرحكوا بعد أسبوعين يعني بعد اسبوعين - طيب حضرتك بس هدي نفسك واللي انت عايزه حيتنفذ إن شاءالله...اديني بس فرصة اتكلم معاها واعرف هيا رافضة ليه واحاول اقنعها - صفوت بإنفعال : برضه حيقولي اقنعها...ماشي يا علي...اما اشوف آخرتها مع بنت صفية إيه? *الفصل السادس عشر* - برضه حيقولي اقنعها....ماشي يا علي...لما اشوف آخرتها مع بنت صفية إيه? - طيب هو ليه حضرتك مستعجل على موضوع الجواز ده ليه ? انا شايف يعني ان نورهان من حقها انها تكمل تعليمها قبل الجواز خصوصا يعني ان دراستها مش سهلة - يا ابني انا عايز أجوزهم واخلص من مسئوليتهم بقى...أنا من ساعة اللي حصل لنادية وانا مش بعرف انام من القلق ومش عارف لو ماكناش قدرنا نلم الموضوع كان إيه اللي ممكن يحصل ... انا خايف اي حاجة تحصل قبل الفرح وتلخبط حساباتنا ... عايز اطمن عليهم قبل مايجرالي حاجة واشوف كل واحدة فيهم فبيت جوزها ومسئوليتها تتشال من على كتافي ... انا تعبت بقى ومن حقي اني ارتاح...انا مارضتش اتجوز بعد صفية ما ماتت واتفرغتلهم ...مش من حقي دلوقتي اني ارتاح ... العمر مابقاش فيه اد اللي راح يا علي . - بعد الشر عليك يا عمي ماتقولش كده...ربنا يديك طولة العمر ...بس فيه حاجة حضرتك مش واخد بالك منها...أنا لسه ماجبتش الشقة اللي حنتجوز فيها...ومش معقول حالحق اجيب شقة وافرشها واحجز قاعة واعمل كل ده فاسبوعين - ماهو ده الموضوع التاني اللي كنت عايز اتكلم معاك فيه ... انت مش حتجيب شقة ولا حاجة ...انت حتسكن معايا فالفيلا - علي بدهشة: اسكن مع حضرتك! - ايوه يا علي...انا كنت ناوي اكلمك فالموضوع ده وقتها...انا بعد ما البنات يتجوزوا مش معقول حاقعد فالفيلا الطويلة العريضة دي لوحدي ...عشان كده عايزكوا تعيشوا معايا انت ونورا ...انا طبعا ماقدرش اطلب الطلب ده من ابن الحسيني ... لكن انت ابن اخويا ومش معقول حترفض طلبي وتكسفني تنهد علي وقال في حيرة: - هو حضرتك مش شايف انك فاجئتني النهاردة اكتر من مفاجأة ماكنتش عامل حسابهم....ممكن تديني فرصة افكر وارد على حضرتك - صفوت بضيق: وهيا دي محتاجة تفكير برضه...انا زي ماقلتلك ماينفعش اطلب الطلب ده من ابن الحسيني ... لكن واضح كده اني باضغط عليك فحاجات كتير حاول علي ان يسترضي عمه قائلا : - ارجوك يا عمي انا مش عايز حضرتك تزعل مني ...وعموما إذا كان دي حاجة تسعد حضرتك وترضيك فانا ماعنديش مانع -يبقى على بركة الله...انا حاكلم احمد يبعت احسن اوضة نوم عنده فالمعرض واجهزلكوا اوضة من اوض النوم الكبيرة فالفيلا وافرشها ...وانت بقي جهز نفسك واتفق مع والدتك واختك قام صفوت من مكانه واتجه نحو الخزانة الموضوعة بجوار مكتبه ثم فتحها واخرج منها مبلغا من المال ومد يده به إلى علي قائلا: - امسك يا علي الفلوس دي اديها للبنى وقولها عمك بيقولك لو احتاجتي اي حاجة ماتتردديش انك تطلبيها منه ...انا عايزها خلال اسبوعين تجيب كل اللي هيا عايزاه ومايكونش ناقصها اي حاجة - مالوش لزوم يا عمي - هو ايه اللي مالوش لزوم ...دول هديتي للبنى ...وبعدين لبنى دي بنتي زيها زي نادية ونورا بالظبط.... واللي بعمله ده مش فضل مني ده دين عليا لأبوكوا الله يرحمه ...ابكوا اقف جنبي فاكتر وقت كنت محتاجله فيه...عشان كده انا اخدت عهد علي نفسي إن ولاده يكونوا ولادي من بعده ... - احنا كمان يا عمي بنعتبر حضرتك مكان والدي الله يرحمه - ربنا يباركلي فيكوا يا ابني... اسمع بقى...انا عايزك تنزل بنفسك تلف على القاعات وتشوف قاعة تكون كبيرة وكويسة وانا اللي حاتكفل بكل المصاريف - بس يا عمي كده كتير اوي - انتوا كلكوا ولادي يا علي...سواء نادية ونورا او انت ولبنى واحمد انتا الخمسة ولادي ...وان كان على ابن الحسيني فكله عشان خاطر نادية ...يلا اتفضل بقى على مكتبك عشان تخلص كل الشغل اللي وراك قبل ماتاخد اجازة شهر العسل - حاضر يا عمي عن إذن حضرتك &&&&&&&&&&&&&&&&&&&&&&&&& كان علي يتحدث في الهاتف مع احمد ويقول في عصبية: - انت ليه ماقلتليش قبل ما تكلم عمي على حاجة زي دي تعجب احمد من لهجته الحادة والتي لا يجد مببرا لها فقال بهدوء: - وفيها إيه يعني يا علي? ما انا سبق وخطبتها منه قبل ما اقولك ...وبعدين ما انا قلت ان خالي حيقولك فعادي يعني...هو احنا كنا حنتجوز من وراك ولا حاجة?! - ماسيادتك اتفقت مع لبنى وخالك وسايبني آخر من يعلم - انا مش فاهم فيه إيه لكل ده يا علي? - فيه ان سيادتك حطيتني فورطة ماعرفتش اخرج منها ازاي - طيب إهدي بس وفهمني إيه اللي حصل وخلاك منفعل بالشكل ده - اللي حصل يا سيدي ان خالك طلب مني اعمل فرحي انا ونورا معاكوا فنفس اليوم زي كتب الكتاب برضه - طيب دي فيها إيه ? ماانت كنت كده ولا كده حتتجوز...ولا انت كنت متفق على كتب كتاب بس - لا يا ظريف احنا كنا حنتجوز بس بعد سنة بعد ما ناخد على بعض واحس إني بحبها زي مابتحبني ...لكن دلوقتي حنتجوز ازاي واحنا مش طايقين بعض بالشكل ده? دي حتي هيا كمان رفضت وعمك مصمم ينفذ اللي فدماغه - كنت قوله انك مش موافق مافيهاش حاجة يعني - يا سلام بالبساطة دي عايزني اقوله مش عايز اتجوز بنتك دلوقتي اجابه احمد قائلا بحدة: - آه...فانت طبعا قولتله انك موافق وسيبتها هيا اللي تقول لأ وتبقى فوش المدفع مع عمك...وانت عارف اسلوبه معاها عامل ازاي... المهم انت تحسن صورتك ادامه وتبقى المطيع اللي بيسمع كلام عمه ...لو كان عندك الشجاعة كنت قلت انك انت اللي مش موافق مش تجيبها فنورا وتبقى انت ماعملتش حاجة...بقى هيا دي الرجوله يا علي ? - انت مش حتبطل اسلوبك المستفز ده معايا - ده بدال ما تحمد ربنا ان عندك صاحب زيي كده بيرجعك للحق بدال مايعينك على الغلط - والله يا احمد انا مافكرتش فيها كده...انا خفت اقول ايوه هيا تكون مش موافقة بسبب الصدامات اللي بتحصل بينا من اول الخطوبة ...وفنفس الوقت خفت ارفض هيا تعرف وتفتكر إني مش عايزها ...والله انا عملت كده عشانها...مافكرتش فاللي انت بتقوله ده...انا مش ندل اوي كده يا احمد - وهيا مش دي الحقيقة يا علي... وهو انت عايزها يعني ? ظل علي صامتا لفترة واحمد ينتظر منه جوابا لسؤاله حتي نطق اخيرا قائلا: - ايوه عايزها يا احمد عايزها ارتحت كده ابتسم احمد قائلا: - طب ومالك بتقولها كده ليه ? طيب امال إيه اللي قولته من شوية ده وانك مش عايز تتجوز دلوقتي مسح علي على وجهه واخذنفسا عميقا قبل ان يجيبه قائلا: - شوف يا احمد... هيا فيها شوية حاجات كده بتضايقني منها لكن ده مش معناه اني مش عايز اتجوزها... وده غير إني مش قادر احدد مشاعري من ناحيتها عاملة ازاي لحد دلوقتي...بص يا احمد انا متلغبط اوي ومش عارف انا عايز إ يه بجد...فاكر لما قلتلك انا بحس انها زي اختي...لحد دلوقتي حاسس إني مش قادر اتغلب على إحساسي ده شعر احمد بما يعتمل داخل صدره فرأى ان ذلك ليس الوقت المناسب لممارسة المزيد من الضغوط عليه فقال بهدوء: - اتجوزها يا علي ... اتجوزها وحاول تتكلم معاها بهدوء عن الحاجات اللي بتضايقك منها...سامعني بهدوء...بلاش تبقي مدب زي عادتك ... واكيد يعني لما تتجوزوا وتبقوا مع بعض اكيد يعني حتنسى حكاية اختك دي واظن انك فاهمني كويس بدا عليه الإقتناع وهو يجيبه قائلا: - طيب واتجوزها ازاي إذا كانت مش طايقة تبص فوشي فالوقت الحالي - انت عارف كويس انها بتحبك وان الكلام ده من ورا قلبها...او يمكن عايزة تسمعها منك انت وتحس انك عايزها فعلا...قرب منها يا علي وقولها الكلمة اللي نفسها تسمعها منك حتى لو مش حاسسها فعلا يجوز الكذب على الزوجةيا آخي...صدقني ممكن ساعتها تلاقيها هيا اللي بتقولك تعالى نتجوز دلوقتي ...ولو إني عارف ان بنت خالي محترمة ومش ممكن تقول كده شعر علي بالغيرة من كلمات احمد رغم علمه بمقصده منها فقال محاولا تغيير الموضوع: - ماشي يا اخويا...كفاية كلام بقى عن بنت خالك وقولي ناوي تعمل إيه فالأسبوعين اللي باقيين دول ? اخذ احمد يقص على علي ما ينتوي فعله في الأيام المقبلة وانه سوف يحضر إلى القاهرة بصحبة شقيقته أمنية ليصحبا لبنى لكي تقوم بشراء الشبكة وفستان الزفاف ...واخبره انه قد انتهى تماما من إعداد الشقة وتغيير ديكوراتها فسأله علي متعجبا: - انت ازاي لحقت تخلص الشقة فشهرين اتنين - ايه يا عم...هو انت فاكر ان انت لوحدك اللي مهندس ديكور شاطر ولا إيه اخبره علي بطلب عمه ان يبحث عن قاعة جيدة ليقام فيها حفل الزفاف وانه سيقوم بتحمل كافة التكاليف ...الأمر الذي رفضه احمد قائلا بإعتراض: - لا طبعا أنا مش موافق على حاجة زي كده - مافيهاش حاجة يا احمد...ده خالك وعمي انا ولبني ونادية ونورهان دول بناته ....عادي يعني...يا سيدي اعتبرها هدية الفرح...مش كفاية انك رفضت تاخد منه الشقة وصممت انك تشتريها اخذ احمد يشرح لعلي و جهة نظره قائلا: - انا كان لازم اعمل كده طبعا...انا ما اقبلش اني اسكن مراتي فشقة مش جايبها من عرقي وتعبي حتى لو كانت من خالي اللي هو عمها - امال حتقول عليا إيه لما تعرف ان عمك عايزنا نسكن معاه بعد ما نتجوز عشان مايبقاش فالفيلا لوحده بعد بناته مايتجوزوا - لا يا حبيبي الوضع مختلف...نورهان دي بنته يعني مافيهاش حاجة - طيب سلام بقى يا اخويا عشان الحق اروح عند عمي واتكلم مع نورهان واحاول اقنعها بموضوع الجواز عشان ماتعملش مشكلة مع خالك &&&&&&&&&&&&&&&&&&&&&&&&&&&&&& كان صفوت يتحدث مع نورا في أمر زواجها حين اخبرته برفضها وصممت عليه قائلة: - يابابا بعد إذن حضرتك ده رأيي وانا مش حاغيره اشعل ردها فتيل غضبه فاجابها بإنفعال: - انتي بتتحديني يا بنت...يعني إيه مش عايزة تتجوزي دلوقتي ?هو لعب عيال - يابابا انا مش عايزة اتجوز غير لما اخلص دراستي الأول اظن ده من حقي ...ومش معنى ان لبنى وافقت يبقى انا كمان لازم اوافق - اسمعيني كويس عشان الكلام ده حاقوله لأخر مرة ... انا اتفقت مع علي ان الفرح حيكون مع فرح اختك وبنت عمك وكلمة زيادة فالموضوع ده مش عايز احسن ما تبقي الجانية على روحك لم تجد نورا بدا من أن ترمي بورقتها الأخيرة فقالت : - يابابا حضرتك سبق واتجوزت غصب عنك وكانت النتيجة اللي احنا فيه دلوقتي ...يعني المفروض ان حضرتك تحترم رغبتي وماتضغطش عليا اكتر من كده ألجمته المفاجأة ولم يتوقع ان ترد عليه نورا بهذا الرد الحاسم الذي كان يرى انها محقة به تماما...لم يجد الكلمات المناسبة للرد عليه فقرر ان تكون يده لا لسانه هي المجيبة ... فاقترب منها وامتدت يده لتجذبها من خصلات شعرها الحريري المنسدل خلف ظهرها وهو يحركها يمنة ويسرة صارخا بإنفعال: - الظاهر كده اني ماعرفتش اربيكي كويس قبل كده عشان تقفي وتردي عليا بالشكل ده....ويظهر كمان انك عايزة تتربي من اول وجديد اغمضت عينيها متألمة وهي ترجوه أن يترك شعرها قائلة بألم: - شعري يا بابا شعري... ثم فجأة شعرت بيد قوية تضمها واشتمت رائحة عطر رجالي جذاب تعلم جيدا بالطبع لمن تكون ...فتحت عينيها لتجد علي الذي لم ينتبه أيا منهما إليه عندما طرق الباب لتفتح له الخادمة ثم يدخل ليفاجئ بهذا المشهد امامه وهو يضمها بإحدي يده وباليد الأخرى يحاول تحرير خصلات شعرها من قبضة عمه وهو يقول برجاء: - ياعمي لو سمحت مافيش داعي للي حضرتك بتعمله ده ... اديني فرصة بس اتكلم معاها وانا حاقنعها نجح علي أخيرا في مهمته بعد ان تركها صفوت قائلا بلهجة حادة: - البنت دي عايزة دماغها تتكسر عشان تحرم ترد عليا ...وتقنعها او ما تقنعهاش انا قلت كلمة ومش راجع فيها - اوعدك انها تعمل اللي حضرتك عايزه بس اديني فرصة بس ارجوك - انا طالع اوضتي دلوقتي واما اشوف كلام مين اللي حيمشي صعد صفوت إلى غرفته فقال علي : - تعالي نقعد بره فالجنينة ونتكلم براحتنا امتثلت نورا لطلبه فامسك علي بيدها وخرجا معا إلى الحديقة ثم جلس على احد الأرائك واجلسها إلى جواره دموعها تشق وديانا على خديها ...شعر علي بإرتجافة جسدها فضمها مجددا وهو يمسح على شعرها بحنان قائلا: - خلاص إهدي بقي عشان خاطري ...أنا اسف إني كنت السبب انك اتعرضتي للموقف ده... حقك عليا مد علي يده في جيب سترته واخرج محرما ورقيا ومد يده به إلى نورا قائلا: - امسحي دموعك دي عشان نعرف نتكلم اخذته منه ثم جففت دموعها فقال هو بإبتسامة: - هو المنديل ده مش بيفكرك بحاجة? لم تفلح دعابته في محو سحابة الحزن التي ظللت عينيها فقال بمزاح: - ياااه ...ده انا يظهر ان دمي تقيل اوي وضع علي يده اسفل ذقنها ورفع وجهها إليه ونظر إلى عينيها قائلا: - ممكن اعرف مش عايزة تتجوزيني ليه ? خفضت رأسها وقالت في اسى : - علشان انت كمان مش عايز تتجوزني يا علي - مين قالك كده بس? - تصرفاتك كلها بتقول كده يا علي... ده حتى بابا هو اللي طلب منك ان فرحنا يكون معاهم يعني دي مش رغبتك انت ..لو ماكانتش دي رغبتي انا كمان ماكنتش وافقت على طلب عمي - افهم من كده انك عايزنا نتجوز دلوقتي? - والله لو رفضك ده سببه إنك فاكرة ان ده على غير رغبتي يبقى عايز نتجوز دلوقتي...لكن لو رفضك ده سببه انك عايزة تخلصي دراستك الأول فاكيد مستقبلك يهمني...وساعتها انا حادخل لعمي اقوله إني مش عايز اتجوز دلوقتي واخليها تيجي مني أنا - علي انا عارفة كويسة ومتأكدة ان جوازي منك عمره ما حيعطلني ولا حيكون عقبة فطريق مستقبلي ...وانت عارف ان دي مجردحجة كنت باتحجج بيها - علي بإبتسامة: نورهان احنا فعلا محتاجين نتجوز عشان نقرب من بعض اكتر وكل واحد فينا يعرف الحاجات اللي بتضايق التاني ويبطل يعملها - مش ده لما يكون الحب موجود الأول عشان يبقى كل واحد فينا عنده إستعداد يتغير عشان التاني - ومين قالك إنه مش موجود بس? ثبتت نورا نظرها على عينيه وكلها لهفة لمعرفة إجابة سؤالها التالي: - يعني انت بتحبني بجد يا علي ?ريحني وقولي الحقيقة يا علي حتى لو كانت لأ...بس على الأقل هبقى عرفت اللي فيها وارتحت ظل صامتا لفترة يتأملها فاردفت قائلة بحزن: - هو السؤال صعب اوي للدرجةدي? ازدرد لعابه واجابها قائلا بصت يشبه الهمس: - اكيد بحبك يعني امال حتجوزك ليه بس ظلت عيناها معلقة بعينيه تحاول أن تستشف مدى صدقه منهما...لكم تعشق تلك العينين رغم ذلك الغموض الذي يكتنفهما...إلا أن السحر المطل منهما يفوق ذلك الغموض بكثير...ابتسم محاولا إخفاء توتره فبادلته الإبتسامة قائلة : - طيب نفسي اسمعها منك امسك علي بيديها ووضعهما بين كفيه وقال بتردد جاهد كثيرا ان يخفيه : - بحبك...بحبك يانورا جذبت يديها ووضعتهما على صدرها قائلة بفرحة: - بالراحة عليا أبوس إيدك...مفاجئتين فجملة واحدة ...بحبك ويا نورا ...ده انا كده ممكن يجرالي حاجة - لا بعد الشر عليكي ... مش كنتي عايزاني اقولك يا نورا...من هنا ورايح مش حاناديكي غير بالإسم اللي بتحبيه ...مبسوطة يا ستي? - مبسوطة بس ... ده انا حاسة إني طايرة من الفرحة...عن إذنك بقي حاطلع اتأسف لبابا واقوله إني موافقة خلاص على الجواز - طيب قبل ماتمشي ابقي اعملي حسابك عشان ننزل سوا بكرة او بعده نشتري الشبكة وفستان الفرح أومأت برأسها موافقة قبل ان تنطلق مسرعة إلى الداخل هي تكاد تطير ...بينما اغمض علي عينيه قائلا: - ياه يا نورا...معقول كلمة صغيرة زي دي تعمل فيكي كل اللي انا شايفه ده... معقول الحزن اللي كان مالي عنيكي اتحول للفرحة دي كلها فثواني...يارب ازرع حبها فقلبي وقدرني إني اسعدها &&&&&&&&&&&&&&&&&&&&&&&&&&& نادية: أنا مش حاروح معاك فأي حتة ومش حأشتري معاك أي حاجة...ريح نفسك سامح بضيق: انتي حرة...انا عملت اللي بابا طلبه مني وخلاص...حاروح اقوله انك رفضتي هو بقى يكلم باباكي يتفاهم معاه - أنت بتهددني ولا إيه? مش نادية صفوت اللي تتهدد يا بابا ...اتكلم على ادك يا اسمك إيه انت - قسما بالله يا نادية لو ما اتعدلتي معايا لتشوفي مني أيام سودة - تصدق خوفتني ... لما نشوف بقى مين اللي حيوري مين - اللهم طولك يا روح...اقولك على حاجة...إن شاءالله ماعنك روحتي ولا اشتريتي ولا اتجوزتي من اصله انهى سامح جملته الأخيرة ثم اغلق الهاتف في وجه نادية التي استفزتها فعلته فصرخت قائلة: - آه يا ابن ال.....ماشي يا سامح بقى انا تقفل السكة فوشي ...والله لاوريك &&&&&&&&&&&&&&&&&&&&& كان صفوت يلوم نادية على تصرفها مع سامح قائلا بحدة: - كده برضه يا نادية...هو ده اللي احنا اتفقنا عليه ...مش قولنا تهدي اللعب معاه شوية لحد ما الفرح يعدي على خير - يا بابا يرضيك يعني يقفل السكة فوشي - يا بنتي مش انتي اللي استفزيتيه فالكلام ورفضتي تروحي معاه...عايزاه يعمل إيه يعني? - يعني يا بابا إيه المطلوب مني دلوقتي? - المطلوب انك تكلميه وتتفقي معاه على معاد تنزلوا فيه تشتروا الشبكة وفستان الفرح - لا طبعا...انا لا يمكن اكلمه بعد ماقفل السكة فوشي...ثم انا مش عايزة اروح معاه فاي حتة - خلاص انا حاكلم والده عشان يخليه يتصل تاني بس ابقي اتكلمي معاه كويس ...لو مش عايزة تنزلي معاه لوحدكوا خدي اختك معاكي - نورا مش حتوافق تيجي معانا...ولو وافقت اكيد علي هو اللي حيرفض صرخ فيها صفوت قائلا بإنفعال: - انتوا عايزين تجننوني انتوا الاتنين...اخلص من واحدة تطلعلي التانية ...الحمد لله انكم حتتجوزوا واخلص منكوا ...انا مش فاهم انا فحضانة2 هنا ولا إيه? انا طالع انام احسن مايجرالي حاجة بسببكوا صعد صفوت إلى غرفته بينما بقيت نادية وهي تتمتم قائلة: - والله لأوريك يا سامح عشان خليت بابا يزعل مني........ * الفصل السابع عشر* اكتظت القاعة بالمدعوين من رجال أعمال واقارب وأصدقاء كل من سامح وعلي واحمد وصديقات نادية ونورا ولبنى وجلست كل عروس إلى جانب عريسها ...كانت نادية تحاول أن ترسم البسمة على شفتيها وهي تجلس إلى جوار سامح حتى لا يلاحظ احد مابها...تخلل الحفل بعض الأحاديث الجانبية كذلك الذي دار بين الفت وسمية وهي توصيها بلبنى قائلة: خدي بالك منها يا الفت ...وخليها تذاكر كويس لما الدراسة تبتدي مش عايزة تعب السنين اللي فاتت يروح على الفاضي أجابتها ألفت معاتبة: - معقول يا سمية توصيني برضه علي بنت أخويا ...دي فعنيا الاتنين ...وبعدين اطمني احمد عمره ما حيخليها تهمل فمذاكرتها بعد قليل استأذن ادهم قائلا لوالدته: - ماما أنا خارج بره اشم شوية هوا ...بعد إذنكوا - اتفضل يا ابني ****************************** مالت لبنى على أذن احمد قائلة بهمس: - احمد احنا مش حنرقص سلو مع بعض ولا إيه رفع احمد حاجبيه قائلا بإستنكار: - نعم يا اختي! انتي باين عليكي اتهبلتي يا لبنى...انتي عايزاني اخدك ونقوم نرقص ادام الناس ...انتي تحمدي ربنا إني وافقت احضر الفرح أساسا. -لا والله فعلا كتر خيرك انك وافقت تحضر فرحك - بتتريقي عليا يا لبنى...ماشي مقبوله منك...بس اشمعنا احنا يعني...ماكل اللي حوالين قاعدين ساكتين آهو ... مش احسن يبقى زينا زي العالم اللي حوالينا اللي يسدوا النفس دول - خلاص يا حبيبي اللي تشوفه ***************************** سامح: مش عايزة تقومي ترقصي ولا إيه? رمقته نادية بنظرة حادة ثم اشاحت بوجهها بعيدا في إشمئزاز فاردف قائلا: - براحتك...انا قلت أعمل بأصلي...عشان بس ماتقوليش إني حرمتك من حاجة ************************ كان علي يحاول جاهدا أن يرسم البسمة على شفتيه خشية أن تلاحظه نورا أو احدا غيرها....فلم يكن ليترك لها ذكرى سيئة اخرى في ذلك اليوم أيضا .فلم تغب تلك البسمة المصطنعة عن شفتيه طيلة الوقت ...سوى في بعض تلك الأوقات التي يشرد بها قليلا ... إلا أن احمد صديقه المقرب وشقيقته لبني كانا يشعران بذلك الجهد الذي يبذله ليبدو سعيدا ... وبالرغم من محاولاته المستميتة كانت نورا تشعر بذلك الضيق الذي يعتريه احيانا دون سبب واضح ...نظرت إليه قائلة بإبتسامة: - مالك يا علي? فيه حاجة مضيقاك? تصنع الإبتسامة وهو يجيبها قائلا: - لا يا حبيبتي مافيش حاجة كل الحكاية إني مرهق شوية عشان اليومين اللي فاتوا كان عندي فيهم ضغط شغل كبير اوي ...كان فيه شغل كتير لازم اخلصه قبل ما اخد الأجازة ونسافر - الف سلامة عليك يا حبيبي - الله يسلمك ********************** انتهى حفل الزفاف وصعد كل من علي ونورا واحمد ولبنى إلى غرفهم التي تم حجزها بالفندق الذي أقيم به حفل الزفاف ليبيتوا ليلتهم بها قبل أن يسافروا في الغد إلى مرسى مطروح لقضاء أسبوعين بالشاليه الذي يملكه صفوت ...بينما توجه سامح ونادية إلى شقتهم التي سيغادراها في الصباح متجهين إلى المطار للسفر إلى باريس حيث سيقضيان اسبوعين كهدية من نجيب والد سامح إلى ولده وعروسه...ولجت نادية إلى الداخل ثم أخذت تبحث بين الغرف عن غرفة النوم حتى وجدتها فدخلت لتقوم بتبديل ملابسها فتبعها سامح إلى الداخل فصرخت فيه قائلة: - تسمح تخرج بره - سامح بإستياء: ليه بقى إن شاءالله? وضعت نادية ذراعيها في خصرها ثم زفرت قائلة بضيق: - عايزة اغير هدومي - سامح ببرود: تصدقي ضحكتيني...انتي صدقتي نفسك إنك عروسة بجد ولا إيه? امال لو ماكناش دافنينه سوا وواخدين فيه العزا كمان اغمضت عينيها لبرهة وهي تحاول أن تحافظ على رباطة جأشها وتفوت عليه أي فرصة لإستفزازها ثم قالت : - ماتزعلش نفسك انا اللي سيباهالك حملت ملابسها وخرجت إلى غرفة النوم الصغيرة وابدلت ملابسها بملابس للنوم ثم اغلقت الباب من الداخل بالمفتاح وتمددت على الفراش ففوجئت بطرقات على باب الغرفة وسامح يستحثها قائلا بصوت عال: - مش كفاية كده بقى كل ده بتغيري هدومك ? اجابته قائلة بتأفف وهي تسحب الغطاء لتتدثر به جيدا: - نعم عايز إيه? اتفضل شوف وراك إيه عشان انا حانام هنا حاول سامح أن يفتح الباب فوجد أن نادية قد أوصدته من الداخل فصرخ فيها قائلا: - وكمان قافلة علي نفسك بالمفتاح أتاه صوتها من الداخل وهي تجيبه قائلة بلا مبالاة: - وانت مالك اصلا اقفل ولا افتح...ده شئ ما يخصكش - افتحي يا نادية احسنلك اجابت قائلة بتحدي: - مش حافتح ووريني حتعمل إيه - ماشي يا نادية...بس خليكي فاكرة انك انتي اللي ابتديتي والبادي أظلم *********************** دخل أحمد إلى الغرفة حاملا لبنى ...اغلق الباب بقدمه ثم وضعها على حافة الفراشة وقال بإبتسامة: - مبارك علينا يا حبيبتي اعتدلت لبنى في جلستها وقالت بخجل: - الله يبارك فيك يا احمد امسك احمد بيدها وقبلها قائلا بهيام: - ماتتصوريش أنا بحلم باليوم ده من امتى... من سنين طويلة اوي...من وانتي لسه عيلة صغيرة بضفاير وانا كنت بآجي ازوركوا فبيت العيلة مع ماما ...والحمد لله ان اليوم اللي حلمت بيه أخيرا جه... عشان كده احنا حنغير هدومنا ونصلي ركعتين مع بعض عشان نبدأ حياتنا بطاعة وبعدين أنا حاصلي ركعتين شكر لله عشان حققلي أغلى أمنية فحياتي...ثم قام حمل ملابسه وقام متجها نحو الحمام قائلا: - يلا غيري هدومك على ما اغير انا كمان واتوضى وارجعلك ************************** بعد أن فرغ احمد ولبنى من أداء صلاتهما سمعا طرقا على باب الجناح الخاص بهما فقالت لبنى بإندهاش: - إيه ده...مين اللي بيخبط علينا دلوقتي? - حيكون مين يعني...اكيد الروم سيرفس جايبلنا العشا ...انا حاطلعله وراجعلك علطول ان شاءالله فتح احمد باب الجناح الخاص بهما ليدخل أحد عمال الفندق وهو يدفع أمامه إحدي العربات التي تحمل طعام العشاء قائلا لأحمد: - الف مبروك يا فندم - الله يبارك فيك ...متشكراوي وضع العامل الطعام على الطاولة ثم انصرف مغادرا الغرفة فعاد أحمد إلى لبنى وقال بإبتسامة: - زي ما قلتلك ده العامل بتاع الروم سيرفس جايب العشا وبيقولي مبروك ...بيني وبينك أنا كنت عايز اشرحله الفرق بين مبروك ومبارك بس قلته مش وقته بقى خليها وقت تاني عقدت لبنى ذراعيها امام صدرها وقالت بتهكم: - ليه مالكش حق ماكنت تقعد تشرحله بالمرة اقترب منها احمد قائلا بإبتسامة: - مش وقته بقى...أصل بصراحة ورايا حاجات أهم رفعت كتفيها قائلة بلامبالاة: - براحتك ولا يهمني ...تقدري تنادي عليه وتشرحله اللي انت عايزه - طيب بالله عليكي دي كلمة ماتستحقيش تتعاقبي عليها وعقاب مضاعف كمان جرت لبنى بعيدا وهي تضحك قائلة: - خلاص يا احمد حرمت والله - ابدا لا يمكن ... انسي يا ماما اسرع احمد خلفها ثم امسك بها قائلا : - دلوقتي تعرفي عقاب اللي تزعل جوزها إيه حملها احمد ووضعها على الفراش ثم امتدت يده ليطفئ الأنوار لتغرق الغرفة في ظلام تام *************************** أمام باب الجناح الخاص بعلي ونورا وقفت نورا مترددة في الدخول فحثها علي قائلا: - إيه وقفتي عندك ليه ? فركت كفيها في توتر وقالت بخجل: - عايزة اطلب منك طلب بس بصراحة مكسوفة - لا يا ستي ما تتكسفيش عايزة إيه ? -اجابت بتردد: عايزاك تشيلني لحد جوه بدا عليه التذكر وهو يفرك جبهته بيده قائلا: - آه صحيح ده انا المفروض أشيلك ... معلش بقى أصلي أول مرة اتجوز بصراحة ابتسمت نورا وخفضت بصرها ارضا فاقترب منها علي وحملها إلى الداخل واغلق الباب خلفه ثم وضعها على الفراش وقال بإبتسامة : مبروك - الله يبارك فيك - يلا قومي غيري هدومك عشان نصلي سوا وبالفعل ابدل اللإثنان ملابسهما وانتهيا من أداء الصلاة ليحضر عامل الفندق العشاء بعدها بقليل ... - علي لنورا: العشا وصل لو كنتي عايزة تاكلي - هو انت مش حتاكل معايا ولا إيه ? - لا انا ماليش نفس انا مرهق وعايز انام ...كلي انتي بالهنا والشفا - لا انا خلاص مش عايزة ...أنا كنت حاكل بس عشان خاطرك اقترب منها علي وقبل جبينها قائلا: - خلاص تصبحي على خير ثم اتجه نحو الفراش وتمدد عليه واغمض عينيه إستعدادا للنوم بينما نورا تشيعه بنظراتها ولم يكن منها إلا ان قالت من وسط دهشتها: وانت من أهله يا علي ******************************** اشرقت شمس اليوم التالي ومرت بضع ساعات بعدها ونورا لا تزال نائمة بفراشها إلا أن استيقظت على يد تهزها برفق فتململت في فراشها وقالت دون أن تفتح عينيها: - أيوه يا حبيبي أنا قايمة آهوه...لتجد صوت أخر يجيبها قائلا: - لا يا حنينة أنا مش حبيبك ...فوقي كده وشوفي بتكلمي مين فتحت نورا عينيها ببطء لتفاجأبلبنى تجلس إلى جوارها علي الفراش فقالت دون أن تتخلص من أثار النوم: - لبنى...إيه اللي جابك هنا يا بنتي! هو علي فين اصلا...هو سافر وسابني ولا إيه? وضعت لبنى يدها على خدها وقالت ساخرة: - وفيها إيه يعني? هو سافر يقضي شهر العسل بتاعه دلوقتي وانت بقى براحتك لما تصحي إبقي روحي قضي شهر العسل بتاعك برضه اعتدلت نورا في فراشها وقالت بملل: - بطلي غلاسة بقى...ممكن اعرف انتي جاية ليه ع الصبح كده استطردت لبنى دون أن تفارق نبرة السخرية صوتها قائلة: - صبح! صبح مين يا برنسيسة ?بصي كده فالساعة شوفي الصبح اللي بتتكلمي عنه ده الساعة كام امسكت نورا بهاتفها ونظرت إلى شاشته ثم انتفضت قائلة بفزع: - ياخبر ابيض...معقولة أنا نمت كل ده ! دي الساعة داخلة على واحدة الضهر - ناموسيتك كحلي يا عروسة ... اتفضلي قومي خدي شاور والبسي وصلي عشان مانتأخرش على معاد الطيارة - طيب هو علي فين? - يعني حنكون خطفناه مثلا...اطمني مابنخطفش عرسان احنا... علي قاعد بره بيتفرج على التلفزيون ...انا جيت اشوفكوا صحيتوا ولا لسه عشان معاد الطيارة ..لقيته قاعد بره ولما سألتوا عليكي قال انك لسه نايمة وإنه مارضيش يصحيكي فدخلت أنا عشان اصحيكي - متشكرين يا ستي... انا قايمة آهوه عشان ماتزعليش نفسك حاولت نورا ان تنهض فامسكتها لبنى من ذراعها قائلة: - قوليلي الأول قبل ما تقومي ... عاملة إيه مع علي? - وانتي مالك يا حشرية...خليكي فحالك احسن - كده برضه يا ست نورا خنخبي على بعض من أولها كده - هو انا كنت سألتك عاملة إيه مع أحمد? - طب ماتسأليني وأنا اقولك ... عارفة يا نورا...أنا ماكنتش اعرف ان احمد طيب اوي كده وحنين اوي كده وبيحبني اوي كده وانا كمان بحبه اوي اوي كده شردت نورا قليلا في كلام لبنى ثم قالت بأسى: - آه... اصل هو وعلي أخوكي قرايب وصحاب ودفعة واحدة لازم يكون اتعلم منه - يعني انتي مبسوطة يا نورا ? - اكيد مبسوطة...مش اتجوزت الإنسان اللي بحبه يبقى لازم اكون مبسوطة - عارفة يا نورا وانا داخلة عندكوا كنت مكسوفة اوي ابص فوش علي أخويا كإني عاملة عملة...حتى قبل ما آجي قلت لأحمد كده قالي ماحدش احسن من حد تنهدت نورا ثم قالت بجدية: - باقولك إيه يا لبنى? انتي مش ملاحظة انك كده معطلاني ... اتفضلي بقى وانا حاخلص واحصلك انتهت نورا من إرتداء ملابسها وصلت مافاتها من صلوات ثم خرجت لتجد الجميع بإنتظارها ... حمل احمد وعلي الحقائب وانطلقوا جميعا في طريقهم إلى المطار ليستقلوا الطائرة المتجهة إلى مرسى مطروح **************************** -سامح: يعني إيه مش مسافرة...طب والتذاكر دي اعمل بيها إيه إن شاءالله? - نادية بتهكم: التذاكر دي تبلها وتشرب ميتها ... بيقولوا المية بتاعتها مفيدة اوي ... لكن أنا مش حاروح معاك فأي حتة - صدقيني يا نادية لو حتدخلي معايا فدور عند حتبقي انتي الخسرانة ...كفاية اللي عملتيه معايا إمبارح...أنا لسه ماعديتهوش - وأنا عملت إيه يعني ?أنا لسه ماعملتش حاجة - والله... مش كفاية انك روحتي نمتي لوحدك وقفلتي على نفسك وسيبتيني اكلمك من بره - ودي حاجة مضيقاك اوي? كويس انك قولتلي عشان ابقى اعملها علطول - انتي ناسية إنك مراتي دلوقتي يعني ليا عليكي حقوق اطلقت نادية ضحكة مدوية ثم قالت بتهكم: - حقوق! حقوق إيه يا ابو حقوق انت! انا بصراحة عمري ماشوفت بجاحة بالشكل ده ...انت مالكش أي حقوق عندي...حقك اللي انت بتتكلم عنه ده انت اخدته من زمان اوي من قبل حتى مايبقى حقك - لو عايزة تتكلمي فاللي فات أنا ماعنديش مانع بس صدقيني حتسمعي كلام مش حيعجبك ولا حتستحمليه ... ولازم تفهمي كويس ان اللي فات مالوش علاقة باللي جاي ...واسمعيني بقى كويس ...حقي أنا حاخده في الوقت اللي يعجبني بمزاجي يعني...وإبقي وريني كده حتمنعيني إزاي - لما تجرب حتبقى تشوف أنا حاعمل إيه - سامح بتحدي: بقى كده يا نادية...طيب وريني بقى حتعملي إيه اقترب سامح منها وشرع في فك أزرار قميصه فتراجعت للخلف وهو يتقدم نحوها حتى التصقت بالحائط...تمكن الخوف منها للحظات ولكنها أقسمت بينها وبين نفسها أن تقاومه حتى النهاية ...جذبها سامح من يدها واوقعها على الفراش وما ان اقترب منها حتى نشبت أظافرها في جسده العاري ليصرخ سامح متألما وهي تجري بعيدا عنه...نظر إلى الخدوش التي خلفتها أظافرها بجسده وصرخ فيها قائلا بإنفعال: يا بنت المجنونة ... طب ورحمة أمي ما أنا سايبك يا نادية وبعد معركة انتهت بالطبع لصالحه ارتدى سامح ملابسه وغادر المنزل بالكامل تاركا نادية تبكي بشدة وهي تجمع ليس ملابسها فقط وأنما تجمع أيضا شتات نفسها الممزقة وكرامتها الجريحة وهي تتوعد سامح بالإنتقام ...وربما كان ذلك حصاد ماجنته يداها ...أو بعضا مما أذاقه صفوت لصفية ليعود إليه ولكن في إبنته الحبيبة...فما أصعب أن ترتد علينا أفعالنا فيمن هم أحب لنا من أنفسنا ...إنهم بالطبع فلذات أكبادنا. ********************** على مقعدين متجاورين في الطائرة المتجهة إلى مرسى مطروح جلسا معا وقد تشابكت أيديهما ... ومال كل واحد منهما برأسه نحو الأخر يتحدثان بهمس بينما يعلو صوت ضحكاتهما ... بينما وعلى مقربة منهما جلس علي على المقعد المجاور لشباك الطائرة وقد انشغل بالنظر منه دون ان تحين منه إلتفاته نحو نورا الجالسة إلى جواره وهي تراقب احمد ولبنى والسعادة التي يبدوان عليها ...كانت تشعر بالسعادة من اجل ابنة عمها وصديقتها ولكنها لم تسع ابدا للمقارنة هذه المرة بين حالها وحال لبنى...ففي كل المرات السابقة لم تكن المقارنة ابدا في صالحها ********************** اسدل الليل ستائره السوداء على محافظة مرسى مطروح عندما وصل الجميع إلى الشاليه الذي يمتلكه صفوت والذي يتكون من طابقين...اختار احمد ولبنى الدور الأول للمكوث فيه بينما بقي علي ونورا في الدور العلوي ...واتفقا على أن يستريح الجميع قليلا من عناء السفر ثم يقضون سهرتهم معا على أن يخرجوا للتنزه في الصباح ...دخل احمد ولبنى إلى الغرفة الخاصة بهما ...اقنع احمد لبنى التي كانت ترغب بالخروج بالبقاء في الشاليه هذا المساء فوافقت على مضض فاقترب منها احمد قائلا بإبتسامة: - آهو كده تبقي انتي لبنى مراتي حبيبتي الشطورة الأمورة اللي بتسمع كلام جوزها حبيبها ابتعدت لبنى قليلا وقالت بتذمر: - إيه عايز إيه? انت مش لسه قايل انك تعبان وعايز تستريح من السفر - إخص عليكي يا لبنى...انتي مش عارفة ان انتي دوايا ولا إيه? رفعت حاجبيها وقالت في دهشة: لا يا راجل! - طيب جربي كده تاخديني فحضنك وتقوليلي سلامتك يا احمد يا حبيبي حتلاقيني خفيت علطول - لا يا راجل! - إيه يا لبنى انتي اتبرمجتي ولا إيه? إيه حكاية لا يا راجل دي ...عموما جربي كده وانتي تشوفي النتيجة بنفسك اقتربت منه لبنى ولفت ذراعيها حول رقبته وقالت بدلال: - وماله نجرب مش حنخسر حاجة ********************** بعد حوالي ثلاث ساعات كانت لبنى تجلس مع نورا بغرفتها بالطابق الأعلي بينما كان علي يجلس مع احمد بالأسفل ...قامت لبنى من مكانها ونظرت إلى نورا قائلة : - باقولك إيه...انا عايزة اشرب كابتشينو تشربي معايا? اومأت نورا برأسها موافقة : ماشي مافيش مانع - طيب أنا نازلة اعمله فالمطبخ تحت ورجعالك علطول اوقفتها نورا قائلة: - استني أنا جاية معاكي عشان اسليكي وانتي بتعمليه - اوك...يلا بينا نزلت الأثنتان الدرج واتجهتا إلي المطبخ لإعداد الكابتشينو فقالت لبنى لنورا بعد قليل: - باقولك إيه يا نورا...انا حاعمل الكابتشينو وانتي روحي اسألي علي واحمد لو يحبوا يشربوا حاجةهما كمان...عندك هما قاعدين فالليفنج مع بعض - ماشي يا ستي من عنيا خرجت نورا من المطبخ واتجهت إلى الغرفة التي يجلس بها كل من علي واحمد وما إن اقتربت من بابها وهمت أن تطرقه حتى تنامى إلى مسامعها صوت أحمد وهو يوبخ علي قائلا : - يا آخي اتقي الله ...دي بقت مراتك خلاص وليها عليك حقوق دلوقتي اشاح علي بيده قائلا بلامبالاة : - ماقدرتش وماحاولتش اصلا...وبعدين عادي يعني ...هما أي اتنين بيتجوزوا لازم يحصل بينهم حاجة من اول يوم..مش شرط يعني...وبعدين مش قلتلك حاضر خلاص . - تصدق يا علي...أنا زهقت من الكلام معاك... بيتهيألي إني لو بكلم لوح تلج كان زمانه اتحرك عن كده ...انا مش فاهم والله...لما أنا زهقت بس من مجرد الكلام هيا بقى تعمل إيه? الله يكون فعونها بصراحة - تصدق ان أنا اللي زهقت منك ومن اسلوبك المستفز ده - علي قولي بصراحة...انت لسه بتحب نادية وبتفكر فيها? - ياعم نادية إيه بس دي اللي حافكر فيها...نادية دي دلوقتي بقت ست متجوزة...واساسا نادية دي كانت فترة فحياتي وراحت لحالها...كل الحكاية إني طول عمري بتعامل مع نورا على إنها واحدة من إخواتي فجأة كده لقيت مفروض عليا إني احبها واتجوزها ...افهم بقى يا آخي توقف علي عن الكلام إثر سماعه لصوت إرتطام قوي بالأرض فخرج مسرعا هو واحمد ليجدا نورا وقد سقطت مغشيا عليها أمام باب الغرفة الذي ظلت واقفة امامه حتي استمعت إلى حديثهم كاملا ...شعر علي بالفزع عند رؤيتها على هذه الحالة فجثا على ركبتيه وحملها مسرعا إلى الأعلى وهو يصرخ باحمد قائلا : - اتصرف يا احمد وشوف دكتور بسرعة الله يخليك ************************ بعد عدة محاولات نجح علي ولبنى في إفاقتها ...وما إن فتحت عينيها حتى قالت لبنى بإرتياح: - الحمد لله آهي فاقت آهيه...حمدالله على سلامتك يا نورا...حاروح أنا بقى اطمن احمد خرجت لبنى من الغرفة فجلس علي إلى جوارها محاولا جعلها تتحدث...اما هي فكانت تنظر إلى الفراغ امامها دون ان ترمش عيناها حتى شعر علي بالقلق فاخذ يمسح على شعرها قائلا بقلق: - نورا عشان خاطري اتكلمي قولي أي حاجة ... إنشالله حتي تشتميني...بس بلاش تسكتي كده ابوس إيدك...طيب عيطي حتى ... انا كده حاموت من القلق عليكي شعر بحركة شفتيها فحثها قائلا: - ايوه يا نورا اتكلمي عايزة تقولي إيه ? انسابت دموعها في صمت ثم اغمضت عينيها وسحبت نفسا عميقا ثم قال بجدية ممزوجة بالأسى: - طلقني يا علي........ * الفصل الثامن عشر* إذهب كما تريد....... وامض كما تشاء لا تكثر الوعيد........ لا تتعب الجفاء إذهب...................إذهب كما تريد وامض..................وامض كما تشاء كم خلتني أزيد..........لليلنا الضياء لحلمنا السعيد..........فيضا من الهناء وكنت لي تشيد .........صرحا من الشقاء مانفعها الأساور..........والورد والمرايا ومخمل الستائر ..........يراقص الزوايا وصمتك المناور.............يسلبني صبايا وقلبك المغامر...............يسكنه سوايا خذ قصرك الجميل.............والجاه والبهاء والمرمر الأصيل................ووحشة المساء قنعت بالقليل..................،،الحب والوفاء ارتسمت معالم الذهول والصدمة علي وجهه ...فقد كانت هذه أخر كلمة يتوقع أن يسمعها منها في يوم من الأيام ...طلب منها أن تعيد تكرار كلمتها الأخيرة فأعادتها وبكل تصميم ثم مالبثت أن انهارت وأخذت تلكمه في صدره لكمات متتالية وهو يحتضنها خوفا عليها وهي تبكي وتشاهق صارخة به: - باقولك طلقني طلقني ...مش عايزة أعيش معاك ثانية واحدة ولا عايزة أشوف وشك حتى...انا لا يمكن اعيش مع بني ادم كداب زيك ... ظلت ذراعيه ملتفة حولها وهو يجيبها قائلا: - أضربيني كمان لو ده حيريحك بس عشان خاطري إهدي وماتعمليش فنفسك كده ...نورا أنا مش حاقدر أشوفك فالحالة دي - بس بقى بس كفاية كدب لحد كده - أنا كداب يا نورا? - كداب وغشاش كمان... انا لا يمكن أسمحلك تكدب عليا أكتر من كده...فاهم ولا لأ? أفاقت قليلا من تلك الحالة التي انتابتها لتجده يطوقها بذراعيه فدفعته بعنف بعيدا عنها ... وابتعدت هي الأخرى بدورها قائلة بضيق: - مش عايزاك تقرب مني تاني افهم ألجمته المفاجأة ألهذه الدرجة حقا لم تعد تطيقه ...سألها قائلا : - ياااه ...للدرجةدي مش طايقة حتى لمستي ...يا نورا والله أنتي فاهمة غلط...والله انا... لم تعطه الفرصة لإتمام كلامه فقاطعته قائلة بحدة: كداب ...انت كداب واي حاجة حتقولها حتبقى كدب...ولو ماخرجتش بره دلوقتي حاخرج أنا واسيبهالك - طيب خلاص إهدي وانا خارج آهوه خرج علي تاركا الغرفة واتجه إلى الأسفل حيث يوجد احمد ولبنى ...توجه بالحديث إلى لبنى قائلا برجاء: - لبنى عشان خاطري اطلعي اتكلمي معاها وحاولي تهديها ...أنا عارف انها بتحبك و بتسمع كلامك ...اطلعيلها عشان خاطري وتعالي طمنيني ربتت لبنى على يده وقالت محاولة طمأنته: - حاضر يا علي...بس انت إهدي بس وإن شاءالله كل حاجة هتبقي كويسة - دي عايزاني اطلقها يا لبنى... دي مش طايقة حتى انها تشوفني جذبه احمد من يده وقال بجدية: - تعالى بس يا علي اقعد ولبنى حتطلع تهديها وتتكلم معاها...اطلعي انتي يا لبنى صعدت لبنى إلى الأعلى ودخلت لتجدها جالسة على فراشها وهي تضم ركبتيها إلى صدرها وقد اندفعت في بكاء مرير ...جلست لبنى إلى جوارها واحتضنتها ثم اخذت تربت على ظهرها محاولة تهدئتها - خلاص يا نورا ...إهدي يا حبيبتي...إهدي عشان خاطري - نورا من بين دموعها: خليه يطلقني يا لبنى...خليه يطلقني أنا خلاص بكرهه ...بكرهه من كل قلبي...ربنا يسامحه على اللي عمله فيا...ياخسارة كل لحظة حبيته فيها ...لما هو بيحب نادية ما اتجوزهاش ليه? ولا عشان اللي حصلها مابقاش ينفع ...فقال بقى ان الموجود يسد وخلاص - لبنى بدهشة: هو إيه ده اللي حصلها? انتبهت نورا لكلامها فاسرعت تتدارك الموقف قائلة: - اقصد يعني انها طلعت بتحب سامح واتخطبتله ...طيب ليه كدب عليا وقالي إنه بيحبني...كان قالي الحقيقة وقتها كان حيبقي أهون عليا من إني أعرفها بالطريقة دي - صدقيني يا نورا...والله علي شال موضوع نادية ده من دماغه من زمان اوي حتى من قبل كتب كتابكوا ... هو حتى اللي قالنا إن نادية عملت اللي قتل حبها فقلبه بس ماقالش إيه هو رفعت نورا رأسها ونظرت إليها ثم قالت معاتبة : - أنا زعلانة منك انتي كمان على فكرة ...ومش انتي وبس ...انتي وخالتو سمية ولميا وكلكوا - واحنا عملنا إيه بس يا نورا? - عشان كنتوا عارفين إنه مش بيحبني وسيبتوني اتجوزه...هونت عليكوا للدرجةدي? - ماهي ماما كانت رافضة عشان كده بس علي اكدلها إنه عمره ما حيظلمك وقالها إنه متأكد إنه لما يقرب منك حيحبك وعشان كده وافقت فجأة انتبهت نورا لشئ ما في كلام علي( فجأة لقيت نفسي مفروض عليا إني احبها واتجوزها) ... فإذا كانت سمية ترفض الزيجة فمن الذي فرض عليه إذا أن يتزوجها ? نظرت إلى لبنى قائلة بشك: - يعني إيه لقى نفسه مفروض عليه إنه يحبني يا لبنى? ومين اللي فرض عليه إذا ماكانتش خالتو سمية ? فيه إيه أنا لسه ما اعرفهوش يا لبنى? اشاحت لبنى بوجهها حتى لا تلاحظ نورا ذلك الإرتباك في عينيها وقالت بتلعثم: - حيكون فيه إيه تاني يا نورا بس? صدقيني مافيش حاجة امسكت نورا بوجهها وادارته إليها وقالت بإصرار: - قسما بالله يا لبنى...لو ماخرجتي من الأوضة دي من غير ما تقوليلي اللي تعرفيه...لا حتبقي بنت عمي ولا عايزة أعرفك بعد النهاردة...اتكلمي يا لبنى وقوليلي مين اللي فرضني على أخوكي خفضت لبنى رأسها وقالت بأسف: - بصراحة كده يا نورا... عمي صفوت هو اللي طلب من علي إنه يتجوزك - نورا بصدمة: بابا! طب ليه? - ما اعرفش ...اللي اعرفه قولتهولك وخلاص ...عمي طلب منه وعلي وافق اغمضت نورا عينيها وتنهدت بحسرة قائلة: - برضه مصمم يظلمني للأخر ... ليه يفرضني عليه ويظلمني ويظلمه معايا ليه نفسي افهم? - شوفي يا نورا مش ده المهم دلوقتي...نورا انا حاكلمك بصراحة...أنتي عارفة كويس ان عمي صفوت لا يمكن يوافق على حاجة زي دي...ده غير إنه ماينفعش انكوا تتجوزوا إمبارح وتطلقوا النهاردة...وكمان ماتنسيش ماما وإيه اللي ممكن يحصلها لو سمعت خبر زي ده...انا مش حأقولك سامحيه عشان هو أخويا...لكن عشان أنا عارفة انك بتحبيه ... والحاجة اللي أنا بقيت متأكدة منها دلوقتي إنه هو كمان بيحبك... بس هو طول عمره مش بيحب يعمل حاجة غصب عنه عشان كده بيعاند نفسه - انتي بتضحكي عليا ولا على نفسك يا لبنى ? - لا يا حبيبتي أنا باقولك الحقيقة اللي شوفتها بعنيا من شوية...انتي لو تشوفي حالته بره عاملة ازاي كنتي اتأكدتي بنفسك من اللي باقوله ده...ده حيتجنن من لهفته وخوفه وقلقه عليكي . - نورا بتهكم: والمطلوب مني إيه بقى? اروح أقوله انا مسمحاك يا علي وماحصلش حاجة - لا يا نورا انا ماقلتش كده... شوفي يا نورا...اوعي تصدقي أي حد يقولك إن مافيش كرامة بين اتنين بيحبوا بعض ... اللي يحب حد لازم يحافظ على كرامته ويصونها...طيب عارفة الحب اللي أنا بحبه لأحمد ده كله... لكن لو فكر مرة إنه يدوس على كرامتي ...أنا كمان حادوس على قلبي ومش حاسمحله بكده...عارفة انتي مشكلتك مع علي إيه ? مشكلتك انك ضعيفة ادامه ...بتحبيه وبتخليه يحس بالحب ده من غير أي تعب او مجهود منه بالمقابل وبتتنازلي كتير عشان خاطره... أنا بقى عايزاكي ترجعيله بس بعد ما تحسسيه انك انتي الطرف الأقوى فالعلاقة دي ... تحسسيه إنه مابقاش فارق معاكي خلاص... وكويس انك طلبتي الطلاق منه...عايزاكي تعملي نفسك مصممة على موضوع الطلاق ده ... وساعة ماتحسي انه خلاص مابقاش قادر يستغنى عنك...ارجعيله وحبيه بس بكرامة يا نورا...وعشان خاطري ماتزعليش من كلامي ده...أنا باقولك كده عشان خاطرك انتي ...لازم الأول قبل ما تسامحيه تحاسبيه على اللي فات وماتعديهوش بالساهل كده ...فكري كويس فكلامي ده يا نورا...وصدقيني والله علي بيحبك ...وانا متأكدة إنه حييجي اليوم اللي يعترفلك فيه بده ... قلتي إيه يا نورا ? طال صمتها لفترة مما اعتبرته لبنى موافقة ضمنية على كلامها فاردفت قائلة: - نورا انا حانزل دلوقتي وابعتلك علي ...وزي ما اتفقنا ... بس باقولك إيه...ماتزوديهاش معاه اوي يعني...ماتنسيش برضه إنه أخويا ومايهونش عليا...انا بس عايزاه يعرف قيمتك كويس يا نورا...ويحس انك لو ضيعتي منه حيخسر حاجة كبيرة اوي ...عن إذنك بقي لما انزله وافهمه انك مصممة على الطلاق وان أنا ماقدرتش اأثر عليكي ******************************* كان علي يزرع الغرفة ذهابا وإيابا وهو يضرب كفيه ببعضهما في قلق ... نظر إليه احمد وقال متعجبا: - سبحان الله... اللي يشوفك دلوقتي وانت قلقان عليها كده...مايشوفكش وانت بتقول الكلام اللي نورا سمعته ده استدار إليه علي قائلا: - ماكنتش عارف إني بحبها كده...صدقني ماكنتش عارف حدق فيه احمد بدهشة ثم قال بلوم: - كان لازم يحصل مصيبة الأول عشان تعترف يعني - والله ما كنت عارف كده... ماحستش بده غير لما شوفتها فالحالة اللي كانت عليها من شوية دى ... لما قالتلي طلقني حسيت إني فعلا بحبها وإني مش عايزها تبعد عني...طيب فاكر لما قلتلي اكدب عليها...والله لما قولتلها كده ماكنتش بكدب... كنت حاسس إن الكلام ده طالع من قلبي فعلا - خلاص يا علي...حاول أنك تفهمها بهدوء وتستعيد ثقتها وحبها من تاني...حاول تعوض اللي فات يا علي ...واثبتلها انك بتحبها فعلا - تفتكر انها ممكن تسامحني يا احمد بعد اللي سمعته? - انا متأكد انها حتسامحك ...نورا قلبها كبير ...بس انت بقى لازم تستحملها فأي حاجة تعملها أو تقولها ...ماشي في هذه الأثناء كانت لبنى تهبط الدرج وقد رسمت خيبة الأمل على وجهها بإتقان..اقترب منها علي قائلا بلهفة: - ها يا لبنى عملتي إيه ? هزت لبنى رأسها وقالت بأسف: - للأسف يا علي مصممة على موقفها ورافضة أي مناقشة فالموضوع ده وبتقولي مش حأقبل غير بالطلاق - أنا لا يمكن اطلقها...أنا حاطلع اتكلم معاها واقولها إني بحبها صعد على مسرعا إلى الأعلى ودخل ليجدها على نفس الحالة ...ما إن رأته نورا حتى قالت بإنعال: - إيه اللي جابك هنا? مش قلتلك مش عايزة أشوفك - احنا لازم نتكلم يا نورا - احنا مابقاش في بينا كلام خلاص...مش باقي مابينا غير كلمة واحدة عايزة اسمعها منك وكل واحد فينا بعدها يروح لحاله ... واوعدك انك حتفضل برضه ابن عمي وابن خالتي مهما حصل ...ومافيش اي حد حيعرف أي حاجة وكفاية احمد ولبنى عارفين - يا نورا والله انا بحبك ومش عايز اطلقك ...ارجوكي اديني فرصة تانية اصلح فيها اللي عملته ...واوعدك انك مش حتندمي بعدها... يا ستي اعتبريني كنت أعمى وفتحت - اسمع يا علي ...انت ممكن تكون معذور عشان بابا هو اللي طلب منك تتجوزني...لكن مش معذور ابدا لإنك كدبت عليا ...انت ماتعرفش انت كنت بالنسبالي إيه يا علي? انت كنت الحلم اللي بقالي سنين مستنية اليوم اللي يتحقق فيه ... كنت بكرة اللي مااتخيلتش نفسي فيه غير وانا معاك ...كنت بالنسبالي البحر وانا السمكة اللي لو بعدت عنه ثانية حتموت ...شوف بقى لما كل ده ينهار فجأة كده والأقي نفسي بقيت حد مش مرغوب فيه فحياتك...صدقني يا علي السمكة أختارت انها تبعد عن البحر حتى لو فيه موتها اغمض عينيه وقال بألم: - ياه يا نورا كلامك ده بيوجعني اوي - معلش يا علي...ما انا ياما اتوجعت من قبلك ...مافيهاش حاجة لما تخليها عليك المرةدي - يعني مافيش أمل انك تسامحيني? - أرجوك طلقني بقى...كفاية كده انا تعبت - علي بإستسلام: خلاص يا نورا...طالما ده اللي حيريحك انا اوعدك إني حاطلقك - طيب ومستني إيه? - مش معقول يا نورا نطلق النهاردة واحنا فرحنا كان امبارح ... استني حتى شهرين تلاتة كده لحد ما نقدر نقنع اللي حوالينا اننا ما اتفقناش ونقدر نطلق بعدها - هو شهر واحد مش حاسمح باكتر منه... وبعده علطول نطلق - اللي تشوفيه يا بنت عمي *********************************** سامح: انا حاكلمك بصراحة يا نادية...أنا صحيح كان نفسي اوي إني اكسر غرورك ده وأشوف دموعك ادام عيني... بس بصراحة لما شوفتها صعبتي عليا... عرفت انك أضعف بكتير من الحالة اللي بتحاولي تصوري نفسك عليها...شوفي يا بنت الناس...احنا إستحالة نقدر نكمل مع بعض بعد كل اللي حصل بينا...وبصراحة اكتر أنا مش عايز مشاكل ووجع دماغ ...عشان كده انا ماعنديش مانع اطلقك زي ما انتي عايزة... إن شالله دلوقتي لو حبيتي...بس فكري فيها كويس كده...وشوفي إذا كان عندك إستعداد ترجعي لبيت أبوكي مطلقة تاني يوم جوازك ولا لأ...بيتهيألي انكوا عملتوا كل ده عشان الفضايح فمش معقول تفضحوا نفسكوا برضه فالأخر ... - نادية بإنفعال: آه يا ندل يا جبان يعني انت بتستغل الظروف -انا كده ولا كده مش خسران حاجة...انا راجل ماحدش حيتكلم عني نص كلمة لو اطلقنا دلوقتي...لكن الدور والباقي عليكي انتي اللي الناس حتقول اطلقت تاني يوم جوازها ليه...عشان كده انا حاعرض عليكي عرض كويس... هو شهر نقضيه مع بعض وبعدين نطلق وكل واحد يروح لحاله...فخلال الشهر ده ماحدش فينا ليه دعوة بالتاني...ولا كأننا عايشين مع بعض... وانا مش عايز منك حاجة...انتي اصلا مابقيتيش تلزميني...انا بس حبيت اوريكي إني أقدر أطولك فأي وقت ومافيش حاجة تقدر تمنعني عنك... وعموما شهر مش كتير يعني ... استحمليه بالطول ولا بالعرض...وانا اساسا حانزل الشغل مع بابا كمان كام يوم... يعني مش حتشوفيني كتير لإني حارجع على معاد النوم...بس باقولك إيه...مش معنى كده انك تدوري على حل شعرك وتعملي اللي انتي عايزاه...ماتنسيش انك ادام الناس مراتي برضه ... قولتي إيه بقى فالعرض ده ? صمتها كان دليلا على قبولها بالأمر الواقع فيبو ان كلام سامح به نسبة كبيرة من الصواب ...فكيف لها أن تعود إلى بيت أهلها مطلقة ولم يمر على زواجها سوى يوم واحد... لذلك فقد قررت ان تنتظر حتى يمر ذلك الشهر لتصبح حرة بعدها ******************************* بعد عودته من القاهرة بقليل كان يقف امام شقة صديقه الذي صمم على حضوره هذه الليلة رغم عودته متأخرا من حفل زفاف شقيق زوجته ...طرق الباب وانتظر قليلا حتى فتح له ورحب به مخبرا إياه بأنه قد احضر له مفاجأة تنتظره بالداخل...دخل وهو يقول متذمرا: - مفاجأة إيه بس يا فتحي? انا بايت فالقاهرة ولسه جاي من شوية وكنت عايز ارتاح - يا راجل اصبر بس... صدقني لما تشوف المفاجأة حتدعيلي - طيب يا سيدي خلصنى وقولي هيا فين المفاجأة دي أشار إلى احد الزوايا قائلا: - بص هناك كده وانت تشوفها نظر جمال إلى حيث أشار فتحي ليجد فتاة تجلس وقد ارتدت ملابس عارية تظهر اكثر مما تخفي فقال بدهشة: - مين دي يا فتحي? اقترب فتحي من الفتاة ولف ذراعه حول كتفيها قائلا: - دي سوسو صاحبتي اتعرفت عليها من الفيس - جمال وقد زادت دهشته: طب وانا مالي بيها يعني? -لا دي انت مالكش دعوة بيها... دي تخصني انا ... أنا جايبك عشان ميمي - ميمي مين دي كمان? - دي صاحبة سوسو وحتلاقيها مستنياك جوه فالأوضة - سوسو مين وميمي مين ...بيعملوا إيه دول هنا يا فتحي? ومستنياني ليه إن شاءالله? - وانا اللي باقول عليك كلك مفهومية وحتفهمها وهيا طايرة ...حيكونوا جايين ليه يعني يا أستاذ الأساتذة ...كلك نظر يا جيمي ادرك جمال ما يعنيه فتحي فصاح به قائلا بإنفعال: - استغفر الله العظيم...انت باين عليك اتجننت يا فتحي ...انا لا يمكن اعمل حاجة زي كده ...انا أخري اتفرج بس لكن اعمل كده ليه...انا راجل متجوز وعندي ست تحل من على حبل المشنقة ...إيه اللي يخليني ابص للستات الكسر دول...اذا كان ربنا حرمه على اللي ما اتجوزوش...اقوم انا اللي متجوز اعمل كده تحدثت الفتاة الجالسة إلى جوار فتحي قائلة بميوعة: - جري إيه يا توحة ...هو صاحبك خايف احسن ميمي تاكله ولا إيه? ثم اطلقت ضحكة عالية لير د عليها فتحي قائلا: - سيبك منه يا سوسو ...اصله بعيد عنك راجل متجوز ...ثم نظر إلي جمال وقال بتهكم: - ويظهر كده إنه خايف احسن ميس أميرة تمده فالطابور ادام العيال اقترب منه جمال وامسكه من تلابيب ملابسه صارخا فيه: - ماتحترم نفسك يا فتحي... ولازم تفهم كويس إني مابخافش من حد نظر له فتحي وقال بتحدي: - طب ما تثبت انك مش خايف ... يلا يا بطل...الملعب ادامك والجمهور واقف بيشجع وريني بقى الشطارة ...ولا انت حريف فالكلام وبس...غير كده بقى حابقى اتأكدت انك خايف فعلا ... والظاهر كده إني كنت مخدوع فيك...كنت فاكر راجل مخلص مابتخافش من حد... طلعت جبان وبتخاف من مراتك بادله جمال نظرته المتحدية وقال بجدية: - ماشي يا فتحي...أنا بقى حاثبتلك إني مابخافش من حد ابتسم فتحي قائلا بخبث: - آهو كده تعجبني دخل جمال إلى الغرفة فالتفت فتحي إلى الفتاة قائلا: - اتأكدتي ان كله تمام - ماتقلقش تلميذتك ...بس ما قولتليش يا فتحي...حتعمل إيه بالفيديو اللي حتصوره ده? - ودي برضه عايزة سؤال...طبعا حابعته لميس أميرة تسلي بيه نفسها فأي حصة فاضية كده ********************************* بتثاقل شديد فتح باب سيارته وجلس بداخلها مستندا برأسه على مقود السيارة وهو يبكي بحرقة ويلوم نفسه ... فإن كان لا يخشى زوجته فهل نسي أن له ربا يجب أن يخشاه اكثر من خشيته احدا من البشر...وكأنه شعر أن الدموع ربما تغسل ذنبه فسكب المزيد منها ...لم يكن لسانه يردد سوى جملتين فقط ( استغفر الله العظيم...منك لله يا فتحي)...شعر أنه بحاجة إلى أن يستمع إلى بعض من أيات القرآن الكريم لعلها تخفف عنه بعضا من إنقباض صدره وضيق نفسه...أدار مؤشر الراديو بسيارته على إذاعة القرآن الكريم ليأتيه صوت القارئ وهو يفتتح قراءة سورة النور ...كانت دموعه تزداد مع إستماعه للأيات إلى أن وصل إلى قوله تعالى( الزاني لا ينكح إلا زانية أو مشركة والزانية لا ينكحها إلا زان أو مشرك وحرم ذلك على المؤمنين ) ... شعر وكأن الدنيا قد توقفت من حوله فجأة...وكأن أذنيه صمت عن سماع أي شئ سوي هذه الأية ... اتسعت عيناه بشدة وخفق قلبه وهو يقول في ذهول: - معقول أميرة هيا كمان تكون......... * الفصل التاسع عشر* ربما كان من الأفضل لبعضنا أن يعترف بأخطائه أو إن شئتم فقولوا خطاياه...ويحاول أن يتوب عنها بدلا من إلقاء التهم جزافا على الأخرين... فها هي أميرة التي يظن بها زوجها ظن السوء والتي قرر أن يراقبها حتى يتخلص من شكوكه... تجلس في إنتظاره قلقة من غيابه حتى هذه الساعة ...تفكر في حالهما معا وفي ما آلت إليه حياتهما في الأونة الأخيرة ...وتتسائل عما يحمله المستقبل لهما ...تسترجع ذكريات الماضي عندما انتقل جمال للعمل بنفس المدرسة التي تعمل بها ...وكيف أعجب كل منهما بالأخر ذلك الإعجاب الذي تحول فيما بعد إلى حب كبير ... كان زوجها مضرب الأمثال في خلقه وإلتزامه ...ولكن ذلك كله تحول إلى النقيض منذ تعرف إلى ذلك المدعو فتحي ... قطع تفكيرها صوت هاتفها معلنا عن قدوم رسالة ...امسكت بالهاتف وهي تخشى أن تفتحها حتى لا تكون كسابقتها... فقد جاءتها من نفس الرقم المجهول الهوية...بعد تردد فتحتها اخيرا لتشعر بعدها أن قلبها يكاد يتوقف عن النبض ...لم تفق من صدمتها بعد حتى اعلن هاتفها الرنين لتجده نفس الرقم...بأيد مرتعشة فتحت الخط ليأتيها صوته الكريه قائلا بتهكم: - مش قلتلك قبل كده وانتي ماصدقتيش كلامي...ولا كان لازم يعني تشوفي بعنيكي عشان تصدقي وتعرفي مين عدوك ومين حبيبك - اميرة بحزم: انت مين وعايز مني إيه بالظبط ? - أنا معجب ..و.معجب من زمان كمان ... وبصراحة مستخسرك فراجل زي جوزك ده... مش مقدر قيمة النعمة اللي فإيده ... بيموت فالرمرمة نقول إيه بس - انت لو ماقلتش انت مين وعايز إيه دلوقتى حالا حاقفل السكة فوشك - ماقلتلك أنا معجب... وعايز إيه فأنا عايزك انت يا جميل... ولو بتحبيه وباقية عليه اوي يبقى تلحقيه قبل ما فضيحته تبقى بجلاجل ... اصل بصراحة انا ناوي انزله فيلم جامد اوي على اليوتيوب ...انتي حتي شوفتي مشهد منه ... مش عارف رأيك فيه بصراحة...بس أنا لسه عندي مشاهد تانية إنما إيه حتعجبك اوي ...نمرة تليفوني معاكي...فكري كويس فكلامي وانا مستني منك تليفون فأي وقت انا تحت أمرك ...لو ما اتصلتيش حاعرف انك كده مش بتحبيه ولا يفرق معاكي ...سلام يا قطة ********************** دلف علي إلى داخل الغرفة فوجد نورا تضع بعض الوسائد والأغطية على الأرض إستعدادا للنوم فنظر إليها قائلا بدهشة: - بتعملي إيه يا نورا ? أجابته نورا وهي تعيد ترتيب تلك الأشياء قائلة دون أن تنظر إليه: - بيتهيألي انت شايف أنا باعمل إيه - أنا شايف بس مش فاهم - حانام عندك مانع - حتنامي على الأرض ليه? - لإن زي ما انت شايف الأوضة مافيهاش غير سرير واحد ومافيش حتى كنبة انام عليها - طيب وليه ماتناميش على السرير? - لإنك حتنام عليه - وفيها إيه يعني ? - فيها انك تحمد ربنا إني وافقت إني انام معاك تحت سقف واحد... لكن اكتر من كده ماتحلمش انهت نورا عبارتها الأخيرة ثم تمددت على الأرض وسحبت الغطاء لتغطي به جسدها كاملا ...جلس علي مفترشا الأرض إلى جوارها وسحب الغطاء قائلا بهدوء: - نورا ...ماينفعش اللي انتي بتعمليه ده... وعموما يا ستي ...إذا كنتي مصممة تنامي بعيد عني يبقى اطلعي نامي انتي على السرير وأنا اللي حانام هنا على الأرض - ماتعملش نفسك قلبك عليا اوي - علي بضيق: لا حول ولا قوة الا بالله...برضه مش حايأس يا نورا مهما عملتي ...مش حايأس انك تسامحيني وتقبلي تكملي معايا مشوار حياتك - احنا مش خلاص اتفقنا على الطلاق ...لزومه إيه بقى الكلام ده ? - ومين قالك إني حاطلقك اصلا - يعني إيه ? هو لعب عيال ولا إيه? احنا مش كنا اتفقنا خلاص ...إيه اللي خلاك ترجع فكلامك ? امتدت يده لتمسح على شعرها بحنان قائلا بإبتسامة: - أنا قلت كده بس عشان تهدي ساعتها... لكن أنا عمري ما حاطلقك مهما عملتي دفعت نورا يده بعيدا عنها وقالت بضيق: - لو سمحت ابعد إيدك دي عني ... سبق وقلتلك إني مش طايقة حتى لمستك دي - أنا مش مصدق انك كرهتيني بالسهولة دي... معقول الحب يتحول لكره بالبساطة والسرعة دي - عادي جدا...لما يكون الطرف التاني مايستاهلش الحب ده يبقى لازم يتحول تنهد علي قائلا بأسى: - أنا مش فاهم انتي بتحاسبيني على إيه بالظبط? على مشاعر ماكانتش بإيدي واتخلصت منها قبل ما اتجوزك ... ولا على إني وافقت إني اتجوزك وشوفت انك حتكوني الزوجة المناسبة اللي اقدر اكمل معاها حياتي - لا ده ولا ده...انا بحاسبك على انك كدبت عليا لما سألتك إذا كنت بتحبني ولا لأ...وبعدين مين قال إني بحاسبك...انا بس باحاول اساعدك انك تتخلص من جوازة اتفرضت عليك - أنا عمري ماكدبت عليكي يا نورا ... انا لما قلتلك كده كنت حاسس الكلام ده فعلا... بس كنت باكدب نفسي ...واقول حبيتها امتى وازاي... وبعدين انتي غلطانة يا نورا...انتي ما اتفرضتيش عليا ولا حاجة...ده جواز يا نورا يعني عمربحاله حنقضيه مع بعض ...يعني لو ماكنتش موافق كنت قلت ده بصراحة لعمي - نورا بتهكم: عمر بحاله... انت باين عليك بتحلم - علي بإصرار: وماله...كل حاجة حلوة ابتدت بحلم ... وانا متأكد إنه حييجي اليوم اللي حلمي يتحقق فيه انهي علي جملته الأخيرة وتمدد على الأرض بجوارها ثم سحب الغطاء ليتدثر به فاعتدلت نورا في جلستها وقالت بدهشة: - انت بتعمل إيه? - علي بلا مبالاة: زي ما انتي شايفة...إذا كنتي انتي مش عايزة تطلعي تنامي جنبي أنا بقى حانزل أنام جنبك قامت نورا من مكانها واتجهت إلى الفراش وجلست عليه قائلة: - مش انت عجباك نومة الأرض دي...خلاص خليهالك ضحك على قائلا: شوفتي بقى خليتك تنامي على السرير ازاي برضه تمددت نورا على الفراش وأولته ظهرها حتى لا يرى تلك الإبتسامة التي ارتسمت على شفتيها ****************************** - علي بضيق: يا نورا عشان خاطري بلاش العند ده - اسفة مش عايزة اخرج معاك فحتة...مش عايزة اتفسح يا سيدي هيا الفسح كمان بالعافية عقد ذراعيه امام صدره وقال بنفاذ صبر: - يا نورا احمد ولبنى مستنيين تحت ...عايزاني أقولهم إيه بس? صمتت نورا برهة لتفكر ثم قالت بجدية: - ماشي أنا جاية معاك ابتسم علي فاردفت قائلة: - ماتفرحش اوي كده ...انا جاية بس عشان خاطر احمد ولبنى مش عشانك...حرام نضيع عليهم شهر العسل بتاعهم...هما مالهمش ذنب فحاجة ...مافيش داعي ننكد عليهم زفر علي بشدة ثم قال بمشاغبة: - وأنا اللي كنت فاكرك طيبة ... اتضح ان مافيش حد طيب فالزمن ده - والله إذا كان عاجبك اسرع يجيبها على الفور قائلا: - عاجبني يا ستي عاجبني... وإن جيتي للحق عاجبني اوي كمان ... بس يلا بينا بقى ****************************** كانت أميرة تجلس مع شقيقتها أمنية لتقص عليها تفاصيل ماحدث وهي تستمع إليها بإهتمام وذهول مما تسمع... انتهت أميرة من كلامها قائلة بحيرة: - قوليلي يا أمنية اعمل إيه واتصرف ازاي ... أنا خلاص دماغي قربت تنفجر من التفكير قاسمتها أمنية حيرتها وهي تجيبها قائلة: - والله ما أنا عارفة يا أميرة اقولك إيه? والمشكلة كمان ان احمد مسافر عشان كنت اقولك خلي احمد يتصرف معاه - يعني انتي رأيك أواجهه واطلب الطلاق ولا استنى شوية لحد ما اتأكد - والله يا أميرة قبل المكالمة اللي جاتلك دي كنت حاقولك طبعا لازم تواجهيه وتطلبي الطلاق وبدون تردد...لكن بعد المكالمة اقول المفروض تستني لما تتأكدي وتعرفي مين البني ادم ده وعايز منك إيه... مش يمكن يكون اللي شوقتيه ده مش حقيقي ويكون البنى ادم ده هو اللي مفبركة فعلا عشان يطلقك من جوزك - ولو كانت حقيقة فعلا ...اعمل إيه ساعتها? - تبقي ساعتها ماظلمتيهوش وتقدري تطلبي الطلاق زي ما انتي عايزة - انا حاتأكد بنفسي ان الكلام ده صحيح ولا لأ ... ولو طلع مظبوط يبقى ساعتها طبعا حاطلب الطلاق بس مش قبل ما أعرفه جزاء الخيانة إيه? لكن اللي انا خايفة منه ان البنى ادم ده ينشر الصور دي فعلا - ما اعتقدش انه ممكن يعمل كده...اصلا يبقى غبي فعلا لو عمل كده...انا اعتقد انها وسيلة ضغط عليكي مش اكتر...هو ممكن يفتكر انك ممكن توافقي على اللي هو عايزه عشان حتخافي من الفضايح ...لكن لو نزل الصور فعلا ... مش حيبقى عنده حاجة يضغط عليكي بيها....اعتقد إنه مش ممكن يعمل كده... - منك لله يا جمال عشان انت اللي حطتني فالموقف ده ... بس صدقني لو كان ده صحيح انا حاعرف ازاي اندمك عليه - أمنية بقلق: انتي ناوية على إيه بالظبط يا اميرة ? - اتأكد الأول وبعدين حتشوفي انا حاعمل إيه **************************** كان صفوت يجلس بغرفة مكتبه حين دخلت سكرتيرته تخبره بوجود شخص بالخارج يرغب في مقابلته دون وجود موعد مسبق . - ماقالكيش إسمه إيه? - لا يا فندم ...هو كل اللي قاله إنه يبقى صديق حضرتك وماشوفتوش من حوالي عشرين سنة ... ورفض يقول إسمه عشان عايز يعملها مفاجأة لحضرتك اخذ صفوت يفكر لبرهة في كينونة ذلك الصديق الذي لم يره منذ عشرين عاما حتى ابتسم فجأة قائلا: - معقول يكون هو ? نظر إلى السكرتيرة قائلا : - قوليله يتفضل لما نشوف هو مين... ولا اقولك انا جاي معاكي اشوفه مين - تحت أمر حضرتك خرجت السكرتيرة ثم تبعها صفوت ليجده جالسا وقد أولاه ظهره فقال محدثا إياه: - مين حضرتك? التفت الرجل قائلا بود: - ازيك يا صفوت ? علت ثغره إبتسامة عريضة وهو يقول بدهشة: - معقول اللي أنا شايفه ده ? سعيد شكري فمكتبي ... بالحضن يا سعيد....... * الفصل العشرون* قليلون هم في حياتنا أولئك الأشخاص الذين يظلون في ذاكرتنا مهما رحلوا أو ابتعدوا كان صفوت يجلس بغرفة مكتبه وإلى جواره سعيد يقص كل منهما على الأخر أخر أخباره ومستجدات حياته...حكى له صفوت كل ما مر به من أحداث طيلة العشرين عاما التي غابها سعيدا مهاجرا إلى أمريكا بعد رحيل زوجته ...بعد ان انتهى صفوت من حديثه تنهد سعيد قائلا بأسى: - إنا لله وإنا إليه راجعون... يعني عزت مات وصفية وكمان فردوس...الله يرحمهم جميعا أطرق صفوت برأسه وقال بتأثر: - ايوه الله يرحم الجميع .... وانا دلوقتي زي ماقلتلك بقى عندي بنتين... انت عارف نورا طبعا...ونادية بنت فردوس اكبر منها بسنة ... لو كنت جيت من تلت ايام بس كنت حضرت فرحهم الاتنين ... المهم قولي انت بقى ...إيه اللي رجعك مصر تاني فالوقت ده... ده اللي فمصر دلوقتي بيسيبوها ويمشوا يا راجل - والله حاجات كتير اوي يا صفوت. - قولي الأول إبراهيم ابنك أخباره إيه? - بخير الحمد لله... دلوقتي بقى راجل ومعاه دكتوراه في إدارة الأعمال كمان من امريكا - ماشاء الله...طيب وهو فين ماجاش معاك ليه عشان أشوفه ? - سيبته فالفندق مع أخته وقلت آجي أشوفك قطب صفوت جبينه في دهشة قائلا: - أخته! أخته مين? انت اتجوزت بعد مراتك الله يرحمها ? اومأ برأسه مؤكدا : - ايوه اتجوت أمريكية من أصل لبناني وخلفت بنتي سوزان وعندها دلوقتي 18 سنة - ربنا يباركلك فيها هيا وأخوها... بس هيا والدتها رجعت معاك برضه - سعيد بتأثر: والدتها ماتت الله يرحمها من كام شهر كده...وانا قولت ارجع مصر عشان ابعدها شوية عن ذكرياتها مع والدتها وكمان عشان تشوف بلدها وتتعرف عليها ... وإبراهيم هو كمان قررت إني أجوزه فقلت أرجع عشان أشوفله عروسة بنت بلده وهو كمان دي رغبته ...ونويت افتح شركة واخلي إبراهيم يتولي إدارتها وبمجرد بس مانخلص منها واوضاعنا تستقر حادورله على عروسة علطول ... واستقر بقى فبلدي واقضي الشوية اللي باقيين من عمري فيها ...والله يا صفوت الواحد مش بيحس بقيمة بلده إلا لما يبعد عنها - ربنا يديك طولة العمر يا سعيد...ياراجل ده أنا ماصدقت شوفتك بعد السنين دي كلها ...بس قولي بقى...نويت تفتح الشركة دي هنا فالقاهرة ولا فدمياط? - سعيد بحيرة: والله مش عارف يا صفوت...أنا كنت عايز افتحها فدمياط واستقر هناك وسط أهلي...لكن للأسف مش حينفع عشان سوزان بنتي حتدخل الجامعة الأمريكية هنا فالقاهرة...فلازم استقر هنا الفترة دي على الأقل لحد سوزان ماتخلص دراستها الأول وبعدين انقل الشركة لدمياط وارجع أعيش هناك...بس انا كان ليا عندك خدمة - انت تؤمرني يا سعيد... ده جميلك فرقبتي طول العمر - ياراجل وانا عملت إيه يعني? - انت ناسي انك كنت الشاهد التاني مع عزت اخويا على عقد جوازي من فردوس...يعني اللي انت عملته معايا ماعملوش معايا غير عزت أخويا - ياسيدي ربنا يديم المعروف... أنا بقى عايزك تشوفلي فيلا صغيرة كده أشتريها عشان اسكن فيها أنا وولادي ... وحتة ارض اعمل عليها الشركة ...قلت إيه ? - بس كده...غالي والطلب رخيص ...بالنسبة للفيلا دي أمرها سهل...وبالنسبة للشركة...فأنا اعرف شركة خسرانة وصاحبها عارضها للبيع وناوي يسافر...احنا ممكن نروح سوا ونتفاوض معاه وتشتريها منه...إيه رأيك بقى? أجابه سعيد وهو ينهض من مكانه إستعدادا للرحيل: - على بركة الله...اديني بقى نمرة تليفونك عشان ابقى اتصل بيك - انت رايح فين بس? - معلش انا مضطر أمشي عشان الأولاد وكمان مش عايز اعطلك ...اديني نمرة التليفون بس وانا حاتوكل على الله ...وبعدين احنا حنروح من بعض فين ? - ماشي...اعمل حسابك انك معزوم عندي على الغدا انت وولادك بس البنات يرجعوا من شهر العسل ...وانا حاتفق معاك على المعاد انصرف سعيد بعد ان تبادلا أرقام الهواتف ووعد منه بقبول دعوة صفوت على الغداء في منزله &&&&&&&&&&&&&&&&&&&&&& ما إن دخلت أميرة إلى منزلها حتى وضعت ابنتها في فراشها ودثرتها جيدا ثم جلست إلي جوارها واندفعت في البكاء...وبينما هي على تلك الحالة إذ فاجأها صوت هاتفها يعلن عن قدوم إتصال لم يكن بالطبع سوى من فتحي ... كفكفت دموعها سريعا وقررت البدء في تنفيذ ما عزمت عليه... أجابته وبكل هدوء قائلة: - نعم عايز إيه? - بيتهيألي ان اللي انا عايزه قولته يا جميل ولا انتي نسيتي ? ده أنا قولت اكيد فكرتي فالموضوع كويس فقلت اتصل واعرف ردك ? - أميرة بحزم: أيوه فكرت وموافقة على اللي انت عايزه لم يستطع إستيعاب ما سمعته أذناه منذ قليل فسألها مجددا فلم يجد منها سوي التأكيد على ما قالته مسبقا ولكنها أردفت قائلة: - بس بشرط واحد - انت تؤمر يا جميل وأنا عليا التنفيذ - مش قبل عشرة ايام ...حاتصل بيك بعدها واقولك حاقابلك فين ...وطبعا ماتنساش حتديني الشريط اللي عندك بعدها - كتير يا جميل وأنا صبري قليل . - هو ده شرطي الوحيد لو موافق يبقى اتفقنا ...مش موافق يبقى خلاص اللي يريحك - هو إيه اللي مش موافق... موافق طبعا وبالثلث كمان - ويا ريت ماتتصلش تاني بيا لحد مايعدوا العشر ايام - ماشي يا جميل... وانا مستني على نار الشوق... وربنا يقرب البعيد اغلقت أميرة الهاتف وهي تزفر قائلة بضيق: - ربنا ياخدك يا بعيد...بقى انت تعرف ربنا... ربنا يجيبك بالسلامة يا أحمد يا أخويا ويقدرني وأربي الحيوان التاني اللي حطني فالموقف ده ...ثم نظرت إلى ابنتها النائمة إلى جوارها وقالت بحزن : - ماحدش صعبان عليا ادك انتي يا حبيبتي... عارفة هو مابقاش يفرق معايا يتفضح ولا يروح فستين داهية حتي... بس فالأول وفالأخر اسمه باباكي والفضيحة حتطولك انتي كمان بعد قليل كان جمال يدلف إلى داخل المنزل وما ان سمعت أميرة صوت صرير الباب حتى امسكت بهاتفها ووضعته على أذنها وتظاهرت بالحديث والضحك حتى دخل جمال الغرفة فاغلقته سريعا ووضعته إلى جوارها...نظر إليها جمال بريبة وقال بشك: - كنتي بتكلمي مين فالتليفون ? - أميرة بلامبالاة: كنت باكلم أمنية حاكون بكلم مين يعني? - وقفلتي ليه أول ما شوفتيني ? - عادي...المكالمة خلصت فقفلت ...فيها حاجة دي? لم تعجبه طريقتها في الحديث ولكنه تجاهل ذلك وهو يسألها قائلا: - وبتكلمي أمنية ليه? مش المفروض انك كنتي عندها ولسه جاية ... ولا ماخلصتوش كلام كل ده? ولا انتي ماكنتيش عندها اصلا? نزعت أميرة حجابها ووضعته إلى جوارها وامسكت بإحدي خصلات شعرها تلفها حول إصبعها وتمددت على الفراش وهي تهز قدميها قائلة بلا مبالاة: - أصل فيه حاجة مهمة نسيت أقولها عليها وأنا عندها فقولت اتصل بيها...ثم سرعان ما اعتدلت في جلستها وقالت بجدية صارمة: - وبعدين إيه نظام خدوهم بالصوت اللي انت داخل عليا بيه ده...كل ده عشان ماأسألكش كنت فين امبارح ورجعت وش الفجر وكل يوم بتخرج تروح فين وماترجعش قبل نص الليل ...ولا انت خلاص اخدت على كده? - والله انا راجل واعمل اللي انا عايزه طالما مش باعمل حاجة غلط ? - أميرة بتهكم: وانت بقى متأكد انك ما بتعملش حاجة غلط ? - جمال بقلق: تقصدي إيه? عقدت ذراعيها امام صدرها وقالت بجدية: - اسمعني كويس... الكلام ده من هنا ورايح مايمشيش معايا...انا حانام فالأوضة دي هنا مع بنتي لحد ما تعرف ان الله حق وتبطل اللي بتعمله ده ...اما بقى لو فضلت مصمم عليه فالبيت كله مايلزمنيش ... ولازم تعرف كويس أن أي حاجة غلط بتعملها لازم تتردلك ... ومافيش حاجة بتضيع عند ربنا ضيق عينيه قائلا بحيرة: - انتي تقصدي إيه بالكلام ده? - انا مش حاقولك غير حاجة واحدة... عفوا تعف نساؤكم يا حضرة المربي الفاضل خرجت أميرة وتركت جمال مصدوما وقد اتسعت عيناه مما سمع ... شعر بأن كلماتها زلزلت كيانه فما كان منه إلا ان قال بذهول: - يا وقعتك السودة يا أميرة... استغنيتي يا أميرة وعايزة تنامي لوحدك وكمان بتقوليها فوشي كده عادي عفوا تعف نساؤكم ... هو اللي فبالي حيطلع صح ولا إيه? لا ده انا اقتلك واشرب من دمك كان كلامها مجرد محاولة لأن تغرس بذور الشك في قلبه ولم تكن تدري ان تلك البذور قد زرعت من قبل وانها فقط ترويها بكلماتها لتكبر وربما يحين قريبا أوان الحصاد &&&&&&&&&&&&&&&&&&& انقضى الأسبوعان سريعا وعاد احمد ولبنى إلى دمياط بينما عاد على ونورا إلى القاهرة ... دلفت نورا عبر باب الفيلا لتستقبلها دادة أمينة تلك المرأة الطيبة والتي تحبها نورا كثيرا وتشعر بأنها تشبه والدتها الراحلة كثيرا في طيبتها وحنانها الذي تغدقه على الجميع بدون مقابل ... استقبلتها بالتهاني والأحضان ... كما هنأت ايضا علي الذي صعد إلى غرفته ثم تبعته نورا لتجده قد أخذ دشا سريعا وقام بتبديل ملابسه إستعدادا للذهاب إلى الشركة ... جلست على طرف الفراش وظلت تراقبه وهو يقف أمام المرأة ويمشط شعره ثم قالت بجدية: - ياه للدرجةدي كنت كاتمة على نفسك ...اول ما وصلنا كده لبست وخارج انتبه علي إليها فوضع الفرشاة من يده ثم ذهب ليجلس بجوارها قائلا: - ليه بتقولي كده يا نورا? انابس كنت رايح الشركة أسلم على عمي واشوف أخبار الشغل إيه... لكن لو انتي عايزاني أفضل معاكي وماروحش خلاص مافيش مشكلة ...وعمي كده كده حاشوفه لما يرجع ان شاءالله - لا براحتك...وانا حاعوز منك إيه يعني? امتدت يده لتمسك بيدها فسحبتها سريعا فقال بتأثر: - مش كفاية كده بقى يا نورا ? - هو إيه ده اللي كفاية ? زفر بشدة ثم قال بضيق: - اللي احنا فيه ده مش كفاية ... حنفضل كده لحد امتي ? أجابت ببرود قائلة: - لحد ما نطلق...ولو زهقت ممكن تطلقني دلوقتي وتخلص عادي يعني . قام من مكانه وقال بإنفعال: - يووه... هو كل شوية طلقني طلقني ... احنا بقالنا أسبوعين متجوزين سمعتها فيهم كام مرة منك ... ثم جلس إلى جوارها مجددا وقال بهدوء: - انتي عايزة توصلي لإيه يا نورا? حب وقلتلك بحبك... إعتذار واعتقد اني إعتذرت بما فيه الكفاية ...ناقص إيه تاني عشان ننهي الوضع السخيف اللي احنا فيه ده ? - مش ناقص غير انك تطلقني - انا ماشي قبل ما افقد أعصابي اكتر من كده غادر علي الغرفة وترك نورا خلفه تتمتم قائلة: - يا خوفي يا علي احسن تزهق وتعملها بجد &&&&&&&&&&&&&&&&&&&&& في المساء كان على يجلس مع عمه يتجاذبان أطراف الحديث حيث كان صفوت يخبره عن عودة صديقه من الخارج وعن تلك الدعوة التي وجهها إليه صفوت على ان تكون بعد أسبوع من الآن والتي اوكل إلى نورا مهمة التحضير لها لتخرج في صورة تليق بأقرب أصدقائه ...كانت نورا قد استأذنت لتصعد إلى غرفتها ثم تبعها علي بعد فترة الذي استأذن عمه ليخلد إلى النوم...صعد علي الدرج إلى الأعلى وطرق باب الغرفة لكنه لم يجد ردا ففتح الباب ودلف إلى الداخل فلم يجد نورا ...طرق باب الحمام الملحق بالغرفة ولكنها لم تكن موجودة هنا ايضا... ساوره شعور بالقلق عليها...ترى أين ذهبت وقد استأذنت لتصعد للأعلى منذ مدة ... اتجه إلى الحمام واخذ دشا دافئا وارتدي ملابس النوم وخرج ليبحث عنها بحذر شديد خشية ان يراه عمه فيعلم انها ليست بالغرفة ...اتجه اولا إلى غرفتها السابقة وطرق الباب ثم فتحه ليجدها مستغرقة في النوم ... وقف إلى جوار الفراش يتأمل ملامحها وهي نائمة ... كانت ملامح الأسى مرتسمة على وجهها بوضوح...كم يكره نفسه في تلك اللحظة لأنه كان سببا في حزنها ...كانت أشبه بالأميرة النائمة التي تنتظر قبلة الأمير لتعيد إليها الحياة ... فلم يبخل الأمير بها عليها ....لتستيقظ نورا بعدان شعرت به واستمعت إلى صوت تنفسه الغير منتظم ... فتحت عينيها لتجده قريبا منها إلى هذا الحد ...فانتفضت من مكانها وقالت بفزع: - انت بتعمل إيه هنا ? ازدرد علي لعابه ثم سألها بدوره قائلا: - المفروض أنا اللي أسألك السؤال ده... انتي اللي بتعملي إيه هنا ? - زي ما انت شايف نايمة - ونايمة هنا ليه ... مش احنا برضه لينا اوضة ننام فيها ولا إيه? - لا معلش انا مرتاحة هنا اكتر اجابها قائلا بنفاذ صبر: - بطلي شغل العيال ده يا نورا لو سمحتي... يقول إيه عمي لما يشوفنا وكل واحد فينا نايم فاوضة لوحده واحنا بقالنا أسبوعين متجوزين - بضيق اجابته: يقول اللي يقوله ...مش هو السبب فاللي احنا فيه دلوقتي - اجابها بتذمر: مش حنضيع الليل كله نتجادل على حاجة مفروغ منها ...اتفضلي قومي يلا عقدت ذراعيها امام صدرها وقالت بإصرار: - وانا قلت اللي عندي مش قايمة يعني مش قايمة لم يجد جدوي من المناقشة معها فمال بجسدها نحوها وحملها بين ذراعيه متوجها إلى غرفتهما وهي تحاول التخلص من قبضته التي احكمها عليها جيدا وتقول بإنفعال: - باقولك نزلني يعني نزلني ...انت اتجننت ولا إيه ? ايه اللي انت بتعمله ده ? رفض على الإنصياع لرغبتها واستمر في طريقه نحو الغرفة ليفاجئ بعمه الذي كان يسير في الردهة الموصلة بين الغرف متجها نحو غرفته ... كفت نورا عن المقاومة بينما تجمد علي مكانه وشعر بالحرج والإرتباك الشديدين فنزع يديه اللتان كانتا تحملانها بحركة لا إرادية لتسقط نورا أرضا وهي تئن متألمة ...ظل علي متجمدا في مكانه وهو ينظر إلى نورا الملقاة ارضا ...ابتسم صفوت لهذا المشهد الذي يراه أمامه ثم دخل غرفته دون أن يعلق ...جثا علي على ركبتيه بجوار نورا ليعتذر لها قائلا: - أنا اسف اوي يا نورا والله ماكانش قصدي...مش عارف أقولك إيه...أنا فجأة لقيت عمي ادامي اتلبخت واتكسفت ومابقتش عارف اعمل إيه وضعت نورا يدها خلف ظهرها وهي تتألم قائلة: - آه يا ضهري...انا مش فاهمة والله ... لما انت مش اد الشيل بتشيل ليه بس ? شعر بالقلق من أجلها فقال بجدية: - نورا لو فيه حاجة بتوجعك اوديكي للدكتور ...انا اسف اوي والله أجابته قائلة بهدوء: - مافيش داعي تتأسف...جت سليمة الحمد لله ماحصلش حاجة - انتي متأكدة - مش اوي يعني ... اصلي حاسه ان رجلي بتوجعني شوية ومش عارفة إذا كنت حاقدر ادوس عليها ولا لأ - طيب استني اشيلك اوديكي الأوضة عشان ترتاحي فالسرير وضعت نورا يدها امام وجهها وقالت برجاء: - لا متشكرة اوي لحد كده...انت بس اسندني وانا حامشي لحد هناك ...عشان كمان اطمن ان ماحصلش فيها كسر ولا حاجة لف علي ذراعه حول خصرها وامسك بذراعها ووضعه خلق رقبته ثم اسندها حتى وصلت للفراش ثم وضعها عليه واطمن على خلو قدمها من أي إصابات أو كسور ودثرها جيدا بالغطاء ونام إلي جوارها بعد ان أطفأ انوار الغرفة &&&&&&&&&&&&&&&&& منذ ان خرج من المدرسة التي يعمل بها وهو يقود سيارته هائما على غير هدى...قد تمكن الشك من عقله إلى ابعد حد... لكن قلبه يرفض تصديق ذلك ويحدثه بأنها بريئة دون شك... ولكن شيطانه مايلبث ان يوسوس إليه بأنه كم من النساء يخفين حقيقتهن خلف قناع من البراءة ... لقد بدأ منذ عشرة أيام في مراقبتها ولا يوجد مايؤكد شكوكه... تذهب في الصباح إلى عملها بعد ان تترك ابنتها عند أمها .... ثم تعود إلى المنزل وإن خرجت فإما لزيارة شقيقتها أو للذهاب للسوق ...تسير حياتها طبيعية لا شئ فيها يستحق التوقف عنده ... ولكنها لابد ان تكون مذنبة ...فهكذا قال الله تعالى في قرآنه الزاني لا ينكح إلا زانية ... فهل يصدق أفعال زوجته ويكذب كلام ربه والعياذ بالله... فجأة قفزت إلى ذهنه فكرة... راقت له تلك الفكرة فعزم على تنفيذها ...هذا ماسيقطع الشك باليقين لديه...إما ان تكون زوجته مذنبة فينتقم منها شر إنتقام...وإما بريئة فيعتذر منها على كل مابدر منه في حقها ويطلب منها الصفح والغفران ... قاد سيارته نحو أقرب مسجد ثم اوقفها امام باب المسجد ودخل ليتوضأثم جلس في إنتظار أداء صلاة العصر ...وما إن انتهى من أداء الصلاة وغادر المصلون بعدها حتى توجه نحو إمام المسجد الذي وجده رجلا تبدو على ملامحه السكينة والوقار وطلب منه ان يتحدث معه في أمر هام على ان يبقى طي الكتمان...فوافق الشيخ بكل ترحاب ليجلس جمال إلى جواره ويقص عليه كافة التفاصيل دون ان يخفي شيئا ودموعه تسبق كلماته حتى انتهى قائلا: - والله العظيم انا ندمان على اللي عملته ده وتوبت لربنا وقررت اقطع علاقتي بالبني ادم ده خالص...بس الشك حيقتلني مش قادر اصدق ولا اتخيل ان مراتي تعمل كده ...وفنفس الوقت من ساعة ماسمعت الأية دي وانا خلاص حاتجنن تنهد الرجل قائلا بتأثر: - لا حول ولاقوة إلا بالله العلي العظيم... قولي يا ابني انت بتشتغل إيه? رمقه جمال بدهشة متعجبا من سؤاله ولكنه اجاب قائلا: - انا باشتغل مدرس تاريخ - ومراتك بتشتغل إيه? - مدرسة إنجليزي فنفس المدرسة اللي باشتغل فيها - طيب والمدرسة اللي انت شغال فيها دي يا ابني مافيهاش مدرس تربية دينية أو حتى مدرس لغة عربية ? - جمال بدهشة: اكيد فيها طبعا - طيب مافيهاش مكتبة ? - لازم طبعا يكون فيها - طيب يا ابني... مافكرتش قبل ما تراقب زوجتك وتعذب نفسك الفترة دي انك تسأل زميلك مدرس التربية الدينية او اللغة العربية عن التفسير الصحيح للأية ...او تدخل المكتبة وتمسك احد كتب التفاسير وتقرى التفسير بنفسك أو تعمل زي ماعملت دلوقتي كده بس من وقتها نكس جمال رأسه وقال بأسف : - مش عارف مافكرتش ليه فحاجة من دول...يمكن عشان كانت حاجة واحدة بس هيا اللي شاغلة تفكيري ومستحوذة عليه فماكانش عندي فرصة افكر فغيرها - شوف يا ابني... الأية اللي انت سمعتها المقصود بالنكاح فيها هو الجماع وليس الزواج... يعني معناها ان الإنسان الزاني لا توافق على مشاركته جريمة الزنا إلا امرأة زانية مثله...لكن المرأة الحرة الشريفة لا يمكن انها توافقه على ارتكاب مثل هذا الفعل ...وهناك وجه تاني للتفسير وإن كان الأول اقوى منه بيقول ان الشخص اللي بيرتكب جريمة الزنا إذا ما عرف عنه ذلك وانتشر أمره بين الناس فلن توافق على الزواج به إلا امرأة سبق واتت نفس الفعل ... فهمت يا ابني. لم يدر جمال بما يجيبه او ماذا يقول ...لم يستطع سوى ان يتوجه نحو القبلة ويسجد لله شاكراثم رفع رأسه و.ظل يحمد الله ودموعه تنهمر على وجهه كالمطر ثم استغفر ربه علي ظنه السيئ بزوجته وقرر ان يتوجه إليها مسرعا طالبا منها ان تسامحه على كل مافات ...لم ينس قبل ان يغادر ان يشكر الشيخ الجليل على مافعله معه ثم انصرف مسرعا إلي بيته ودخل ليجد زوجته وهي تخرج من غرفة نومها وتجر خلفها حقيبة ملابس كبيرة الحجم بعد ان علمت بعودة احمد فجمعت ملابسها في الحقيبة وكانت في طريقها لتغادر متجهة إلى منزل والديها بعد ان تركت ابنتها هناك ولم تذهب لإحضارها بعد عودتها من المدرسة هذا اليوم ...نظر إليها جمال قائلا بدهشة: - رايحة فين يا أميرة ? اجابته أميرة دون إكتراث: - رايحة عند ماما...احمد خلاص رجع من مرسى مطروح - انتي رايحة تباركيله هو ومراته يعني ? طيب وواخدة هدومك معاكي ليه ? - عشان مش ناوية ارجع هنا تاني - ليه ? انا مش فاهم حاجة - عشان انت حتطلقني - اطلقك ليه يا أميرة ? ماتفهميني فيه إيه ارتسمت على جانب فمها إبتسامة ساخرة قبل ان تجيبه قائلة: - افهمك يا جمال...عشان انا ماقبلش إني اكمل حياتي مع راجل زاني زيك اتسعت عيناه بشدة وقال بخفوت: - انتي عرفتي? - اميرة بسخرية: ايوه عرفت وكنت ناوية اطلب الطلاق منك من ساعة ماعرفت...بس قلت لازم الأول ادفعك تمن خيانتك...كنت عايزاك تحس ان انا كمان باخونك عشان تعرف الخيانة طعمها عامل ازاي...الغريبة اني ماقدرتش اعمل كده ولو بالكدب... مش عارفة انت ازاي جالك قلب فعلا تعمل كده بجد - انتي عرفتي منين? - هو ده كل اللي يهمك عرفت منين - ردي عليا يا أميرة ...عرفتي منين مين اللي قالك............. * الفصل الحادي والعشرون* ألقت عليه نظرة ساخرة قبل ان تفتح هاتفها على أخر رسالة جاءتها من فتحي وقالت بتهكم: مش انت عايز تعرف انا عرفت منين...اتفضل شوف بنفسك ...مدت أميرة يدها بالهاتف إلى جمال الذي أخذه ثم شرع في قراءة الرسالة ... رفع بصره إليها قائلا بدهشة: إيه ده يا أميرة...معناها إيه الرسالة دي ومين اللي باعتها ? رمقته أميرة بسخرية ثم قالت بجدية: اللي باعتها صاحب الرقم ده ...هو مين بقى انا ماعرفش ...تحب تشوف الرسايل اللي بعتها قبل كده...وتسمع كمان المكالمات اللي تمت بيني وبينه اصلي مسجلاها كلها...لم تمهله أميرة حتى يجيبها فاخذت تسمعه المكالمات تباعا ثم انتقلت إلى الرسائل ليصرخ جمال الذي كان يستمع إليها في ذهول: الحيوان والله لأدفعه التمن غالي ... هيا دي أخرة إني أمشي وراك واسمع كلامك يا فتحي الكلب انت... رايح تفضحني عند مراتي وتهد بيتي بعد ماخليتني اعمل اللي عملته ... وكل ده عشان طمعان فمراتي...إن ماوريتك يافتحي مابقاش أنا امتدت يدها إلى الحقيبة لتجرها مرة أخري وهي تقول بتهكم: والله دي حاجة تخصك انت وهو...أنابقى ماليش دعوة...أنا ماشية وعايزة ورقة طلاقي توصلني فأسرع وقت ...وبنتك تقدر تيجي تشوفها وقت ماتحب اسرع جمال إلى الحقيبة وحاول أن يأخذها لتتشبث بها أميرة بقوة ...استجاب جمال لمقاومتها فترك الحقيبة وحاول أن يمسك بيدها التي تتشبث بالحقيبة فاسرعت تسحب يدها قائلة بإشمئزاز: إيدك دي ماتحطهاش عليا مرة تانية . أخذ يقول بإستجداء: أميرة عشان خاطري إديني فرصة تانية... والله العظيم انا كنت جاي عشان اعتذرلك وأقولك نفتح مع بعض صفحة جديدة وإني حابطل كل الحاجات اللي كانت بتضايقك مني وحابعد عن الزفت اللي اسمه فتحي ده خالص...اوعدك إني ارجع جمال اللي حبتيه واتجوزتيه... بس عشان خاطري ماتسيبنيش أميرة بتأثر: انت لا يمكن تكون جمال... انت مجرد مسخ مشوه من جمال اللي انا اتجوزته...أنا حاولت معاك كتير وإديتك أكتر من فرصة ... حتى الرسايل دي أول ما بدأت توصلني طنشتها وقلت أسيب المركب تمشي ... المشكلة إن المركب برضه ماقدرتش توصل للبر برغم كل اللي عملته ...ولو رجعت من مكان ما بدأت حترجع خسرانة كتير اوي يا جمال ... تفتكر بعد اللي عملته أنا ممكن أقدر أعيش معاك ولا ابص فوشك حتى من غير ما افتكر خيانتك وتجرأك على حرمات ربنا حاول أن يدافع عن نفسه فقص عليها كيف حدث ذلك وكيف استطاع فتحي أن يستدرجه فقالت بتأفف: عذر أقبح من ذنب يا أستاذ يا مربي الأجيال ... ماكنتش خايف مني ماشي...لكن ماخوفتش كمان من ربنا ... مافكرتش ان ده ممكن يتردلك ... تقدر تقولي حتعمل إيه فالفيديو اللي معاه واللي بيهددك بيه ...تقدر تقولي مين من أولياء الأمور حيأمنك تاني على ولاده وبناته ...بنتك مافكرتش فيها لو حد عرف باللي عملته ...مافكرتش انها حتعيش موصومة طول عمرها بسبب أب أناني مافكرش غير فرغباته وجري ورا نزواته وبس... للأسف انت فوقت متأخر اوي ... ياريت تحاول تلحقه وتاخد منه الفيديو يمكن تقدر تنقذ اي حاجة... أما انا بقى... فأنا حامشي ومش حاقولك غير كلمة واحدة قبلها ... ربنا يسامحك على كل اللي عملته معايا امسك جمال بيديها يقبلهما وهو يقول ببكاء وقد أغرقت دموعه وجهه : عشان خاطري يا أميرة سامحيني...أنا مستعد لأي عقاب منك غير إنك تسيبيني وتطلبي الطلاق ... طب أقولك على حاجة...خليكي نايمة فأوضة روضة زي ما انتي... لحد ماتحسي انك خلاص سامحتيني ...بس بلاش تمشي يا أميرة ... طب بلاش عشان خاطري عشان خاطر روضة يا أميرة...يعني روضة ماتستاهلش انك تتنازلي عشانها . دفعته أميرة بعيدا عنها واتجهت نحو باب المنزل قائلة: ومافكرتش فيها ليه وانت بتعمل اللي عملته ولا انا بس اللي مطلوب مني أفكر فيها خرجت أميرة واغلقت الباب خلفها فجلس جمال خلفه وضم ركبتيه إلى صدره وظل يبكي ويتمتم قائلا: ماتسيبنيش يا أميرة ...ثم توقف فجأة عن البكاء ونظر إلى الفراغ أمامه قائلا بإصرار: والله لأدفعك تمن اللي عملته ده غالي اوي يا فتحي...ثم خرج هو الأخر متجها إلى منزل فتحي &&&&&&&&&&&&&&&&&& كان احمد يتحدث إلى أميرة قائلا بإنفعال: كده برضه يا أميرة كل ده يحصل من غير ما تقوليلي...انا مش سألتك قبل كده وقولتي انكوا كويسين ...ليه خبيتي عليا يا أميرة? نكست أميرة رأسها وقالت بأسى: كان عندي أمل إنه يرجع عن اللي بيعمله ده ... ولما وصلت لكده قلت خلاص مافيش فايدة ماقدرتش استحمل اكتر من كده...سيبت البيت وطلبت الطلاق منه... لكن هو بيقول انه تاب ورجع عن اللي بيعمله وعايزني افتح معاه صفحة جديدة...بس انا خلاص كرهته ومابقتش طايقة حتى أشوفه ادامي. جلس احمد إلى جوارها وربت على كتفها قائلا بحنو: طيب هدي نفسك بس واللي انتي عايزاه انا حاعملهولك...بس بلاش تعيطي عشان خاطري انتي عارفة إني ماقدرش أشوف دموعك انتي بالذات ...اقترب منها احمد وضمها إليه فوضعت رأسها على صدره وأجهشت في البكاء وهو يمسح على شعرها قائلا بحنو: خلاص يا أميرة إهدي بقى عشان خاطري ... بعد فترة استطاعت اخيرا ان توقف سيل الدموع المنهمر من عينيها فرفع احمد وجهها إليه وقال بجدية: أميرة قوليلي بصراحة...انتي فعلا خلاص مش عايزاه ولا صعبان عليكي نفسك بعد اللي عمله أجابت قائلة بتأثر: عايزني ارجعله يا احمد بعد خيانته ليا احمد : أميرة ... أنا مش عايز غضبك لنفسك عشان خيانته يكون اكبرمن غضبك عشان انتهك حرمات ربنا وعمل كبيرة من الكبائر . أميرة: سواء كان كده أو كده ينفع بعدها إني أرجعله يعني? أحمد : أميرة يا حبيبتي... التائب من الذنب كمن لا ذنب له ...يعني هو لو تاب فعلا وندم على اللي عمله يبقى كإنه ماعملش حاجة ... أما بالنسبة لإنك مش قادرة تشوفي وشه دلوقتي فتقدري تاخدي وقتك لحد ماتحسي انك سامحتيه ونسيتي اللي عمله ...إن شالله تاخدي سنين على ماتقدري تسامحيه... وياستي فرصة إنه شغال معاكي فنفس المكان عشان تراقبيه كويس وتقدري تعرفي إذا كان اتغير فعلا ولا لأ أميرة : ده انا كنت بافكر إني أقدم طلب نقل من المدرسة عشان مش عايزة أشوفه فيها أحمد : لا يا أميرة ما انصحكيش بكده... ممكن تاخدي اجازة لحد أعصابك ماتهدي وبعدين تروحي حدقت فيه أميرة ثم قالت بدهشة: معقول يا احمد انت اللي بتقول كده ...ده انا كنت فاكراك أول واحد حتشجعني على الطلاق أحمد بجدية: إن أبغض الحلال عند الله الطلاق يا أميرة... وماتنسيش ان فيه بينكوا بنت حرام تتاخد بذنب أبوها... فكري كويس فكلامي ده ولو حسيتي انك مش حتقدري تعملي كده... انا حاروحله واخليه يطلقك ...ومافيش حد حيجبرك انك تعيش مع واحد انتي مش عايزاه ... خلاص يا أم روضة اتفقنا أومأت برأسها موافقة فاردف قائلا بإبتسامة: يلا نامي انتي وارتاحي وماتفكريش فحاجة دلوقتي ... تمددت أميرة في الفراش فدثرها جيدا ثم طبع قبلة علي جبينها وخرج واغلق الباب خلفه &&&&&&&&&&&&&&؛&&&&& ما إن فتح الباب بعد سماعه لصوت الرنين حتى فؤجئ بلكمة قوية استقبلها وجهه ليترنح على أثرها ويسقط أرضا ليدخل جمال ويغلق الباب خلفه ثم يقترب منه ويمسكه من تلابيب ملابسه وهو يستعد لإعطائه لكمة أخري لكن فتحي وضع يده أمام وجهه وقال بتوسل: ابوس إيدك يا جمال إديني فرصة بس اتكلم معاك لم تؤثر كلماته في جمال الذي ظل يمسكه من ملابسه وهو يصيح قائلا بإنفعال: بقى انت تعمل معايا كده ...انا تستغفلني وتخليني أمشي وراك زي المغيب وتصورني وتبعت الفيديو لمراتي ...وفالأخر تطلع بتعمل كل ده عشان طمعان فمراتي ... ده انت نهايتك حتكون على إيدي النهاردة اسرع فتحي يجيبه قائلا: مافيش داعي تضيع نفسك عشاني انا كده ولا كده انتهيت خلاص وربنا يستر عليك انت كمان ومايكونش جرالك اللي جرالي ...وإن كان على الفيديو أنا حادخل أجيبهولك من جوه وكل اللي عايزه منك انك تسامحني ... سامحنى يا جمال وادعيلي والحق نفسك قبل ما يجرالك اللي جرالي نظر إليه جمال بشك قبل أن يقول: لعبة جديدة بتلعبها معايا دي أفلت فتحي نفسه من قبضة جمال ثم قال بإنكسار: ابدا والله يا جمال...اقعد بس وانا حاحكيلك المصيبة اللي أنا فيها جلس جمال ثم قال بنفاذ صبر: اتفضل قول وخلصني بس لو طلعت لعبة منك ماتسألنيش عن اللي حاعمله فيك بعدها تنهد فتحي ثم قال بأسى: قبل ما أقولك على المصيبة اللي انا فيها احب أقولك ان انت السبب إني فكرت فمراتك او حاولت اعمل اللي عملته جمال متعجبا: إزاي بقى ان شاءالله? فتحي بجدية: انت اللي كنت دايما بتتكلم عنها ادامي وبتحكيلي عنها حاجات خلتني اتعلق بيها وافكر فيها لدرجة اني روحت استنيتها يوم ادام المدرسة لحد ماشوفتها وسألت وعرفتها ...وبعدها خططت ونفذت عشان أفوز بيها ...كنت بحرضك عشان تعمل كل الحاجات اللي ممكن تكرهك بسببها وتخليها تبعد عنك ...كنت باقولك الستات ماتجيش غير بالعين الحمرا عشان تقسى عليها وتعاملها وحش ... بس ماكنتش اعرف اللي مستنيني جمال بترقب: اللي هو إيه بقى ? &&&&&&&&&&&&&&&&&&& في الصباح كان واقفا أمام المرأة يرتدي سترته إستعدادا للذهاب إلى عمله حين تململت فى فراشها وفتحت عينيها ببطء لتجده أمامها ... انتبه إلى إستيقاظها فالتفت إليها قائلا بإبتسامة : صباح الخير عاملة إيه دلوقتى ? كويسة ولا لسه فيه حاجة بتوجعك ? أجابت قائلة بجدية: صباح النور... انا كويسة الحمد لله ...ثم اردفت قائلة بتردد: هو أنا ممكن اطلب منك طلب ? رمقها بنظرة تحمل مزيجا من الدهشة والفرح قبل أن يقول : ياريت ...ده أنا نفسي تطلبي مني أي حاجة نورا بإمتنان: متشكرةاوي....انا بس كنت عايزة أروح النهاردة لخالتو سمية أشوفها عشان وحشتني اوي هيا ولميا علي بإبتسامة.: بس كده... انا اساسا كنت حاقولك اعملي حسابك عشان نروح نسلم عليهم النهاردة ...روحي انتي وانا حارجع من الشركة على هناك ونبقى نروح سوا نورا : ماشي حاستناك هناك بس ياريت ماتتأخرش &&&&&&&&&&&&&&&&&&&& استيقظ من نومه على صوت رنين جرس منزله...فتح عينيه ليجد نفسه قد نام على الأرض التي جلس عليها يبكي بعد عودته من منزل فتحي ... اسرع يجيب الطارق ثم ذهب إلى الحمام ليغسل وجهه وعاد ليفتح الباب ليجد احمد واقفا قبل أن يقول بصرامة: السلام عليكم ورحمة الله رد عليه السلام وهو يشير إليه بالدخول فدخل احمد قائلا: كويس إني لقيتك كنت خايف تكون لسه مارجعتش من المدرسة اغمض عينيه وهو يتذكر أحداث الأمس ثم قال بأسى: انا ماروحتش المدرسة اصلا النهاردة وتقريبا مش حاروح تاني احمد بدهشة: اشمعنا يعني? حاول تغيير الموضوع فقال : اتفضل اقعد ...تحب تشرب إيه? جلس احمد قائلا:انا مش جاي أضايف ... انا جاي أقولك ان أميرة طالبة الطلاق ...انت بقى ناوي على إيه? خفض رأسه وقال بحزن وهو يشيح بوجهه بعيدا :وانا موافق اطلقها نظر إليه احمد قائلا بدهشة: ياااه بالبساطة دي ... يظهر إني غلطت لما فكرتك ان لسه فيه امل فيك وكان صعبان عليا البنت المسكينة اللي حتتشرد مابينكم...بس معلش واضح اني غلطت فالعنوان...فعلا انت لازم تطلق أميرة لإنك ماتستاهلش واحدة زيها... انا ماشي وحابقى اتصل بيك لأخر مرة عشان نحدد معاد تجيب المأذون وتيجي عشان تطلق ...انهي احمد كلامه والتفت مغادرا تهاوى جمال إلى اقرب مقعد وشرع في البكاء وهو يضع يديه أمام وجهه قائلا بهستيرية: انت مش عارف حاجة يا احمد مش عارف حاجة ...انا خلاص انتهيت يا احمد انتهيت استدار احمد ليصبح في مواجهته وقال متعجبا: أمرك غريب فعلا...منين موافق انك تطلقها بالبساطة دي ومنين بتعيط عشان باقولك كده ...وإيه حكاية انا انتهيت دي كمان ? من بين شهقاته أجاب قائلا: انت اصلك ماتعرفش المصيبة اللي انا فيها يا احمد احمد بقلق: مصيبة إيه دي كمان ? رفع رأسه ونظر إلى احمد قائلا: فتحي يا احمد... فتحي عنده إيدز ...ومش بعيد يكون جالي أنا كمان ..... &&&&&&&&&&&&&&&& كانت سمية منهمكة في تحضير الطعام بالمطبخ حين سمعت صوت رنين جرس الباب ... طلبت من لمياء التي كانت تساعدها أن تذهب لتفتح ... تركت لمياء مابيدها ثم فتحت الباب لتجد ها نورا ...احتضنتها بفرحة ولهفة وهي تقول: ازيك يا نورا...حمدالله على السلامة يا حبيبتي والف مبروك اجابت نورا بإبتسامة وهي تدلف إلى الداخل: الله يبارك فيكي يا حبيبتي... أخبارك إيه يا لميا وأخبار خالتو سمية إيه? أشار إليها لمياء لكي تجلس ثم قالت : احنا كويسين الحمد لله ... دي خالتو سمية نفسها اوي تشوفك وبتقول انك وحشتيها اوي ...ثم اخذت تنادي والدتها بصوت عال قائلة: ياماما ياماما تعالي شوفي مين عندنا خرجت سمية من المطبخ مسرعة وهي تجفف يديها قائلة : مين يالميا? وما إن رأت نورا حتي فتحت ذراعيها لها قائلة بإبتسامة: تعالي يا حبيبتي وحشتيني اوي حمدالله على السلامة اسرعت نورا ترتمي في أحضانها وتضمها قائلة: وحشتيني اوي يا خالتو ووحشني الحضن ده اكتر مازحتها سمية قائلة : يابكاشة...يعني عايزة تفهميني انك ما استغنيتيش عن الحضن ده بحضن تاني أجابتها نورا وهي تدفن وجهها في صدر سمية: برضه حضنك انت حاجة تانية يا جميل...عارفة يا خالتو وانا فحضنك ده باحس ان ماما الله يرحمها لسه عايشة... ربنا يخليكي ليا يا حبيبتي ابعدتها سمية عنها ونظرت إلى عينيها المترقرقة بالدموع وقالت بقلق: مالك يا نورا? هو على مزعلك ولاحاجة يا حبيبتي? اشاحت بوجهها وهي تجيبها قائلة : لا ابدا يا حبيبتي بالعكس... ده انا وعلي كويسين اوي مع بعض ...لو مش مصدقاني اسأليه حتى لما ييجي . سمية: طيب يا حبيبتي انشالله دايما وانتوا كويسين ...على فكرة انا عملالك النهاردة كل الأكل اللي بتحبيه واللي علي بيحبه ضيقت عينيها وقالت بدهشة: هو انتي كنتي عارفة اننا جايين النهاردة? امسكتها سمية من يدها وقالت بجدية: تعالي نقعد بس الأول وانااقولك... جلسا معا على احد الأرائك ثم استطردت سمية قائلة: ماهو علي كلمني النهاردة وقالي انكوا جايين وبعدين انتوا مش وصلتوا امبارح يبقى اكيد جايين النهاردة عشان تسلموا علينا اخذت نورا تساعد سمية ولمياء في تحضير الطعام حتى عودة علي من عمله وتناول الجميع الطعام معافي جو من البهجة والسرور ثم استأذن علي ليصحب نورا إلى المنزل فطلبت منه سمية ان يتبعها إلى غرفة نومها...دخلت سمية الغرفة فتبعها علي وقال بلهفة : خير يا ماما فيه حاجةيا حبيبتي ? سمية:قولي يا علي بصراحة ...انت ونورا كويسين? علي بإبتسامة:ما احنا زي الفل ادامك آهوه... ولا انتي مش واخدة بالك سمية: طيب الحمدلله يا ابني ...خلي بالك منها يا علي دي يتيمة وغلبانه طمأنها علي قائلا: ماتخافيش عليها يا ماما... صدقيني انا دلوقتي بقيت بحبها اوي ... وعايزها تفضل جنبي لأخر لحظة فعمري ... انا بس عايزك توصيها هيا عليا ...عشان هيا اللي مزعلاني ومغلباني كمان تنهدت سمية وقالت في إرتياح: الحمد لله اني عشت وشوفت اليوم ده علي بمشاغبة: كان نفسك اوي تزعلني للدرجة دي ابتسمت سمية قائلة: ياابني ماقصدش...بس هيا نورا بتعرف تزعل حد ابدا علي بمرح : آه ياني يا اللي ماحدش حاسس بيا فالبيت ده ...خلاص يا ستي حقك عليا انا الغلطان...نورا دي ست البنات ارتحتي كده? سمية برجاء:عقبال ما اشيل ولادكوا يارب انت واختك علي : باقولك ايه ياماما ...ماتيجي تدعي الدعوة دي بره ادام نورا احسن قطبت جبينها وقالت في دهشة: اشمعنا يا ابني مش فاهمة علي بإرتباك: لا يا حبيبتي ماتاخديش فبالك... يلا تصبحي على خير بقى جميل انتهى الجميع من السلام على بعضهم البعض واصطحب علي نورا منصرفين في طريقهم إلى الفيلا مع وعد بتكرار الزيارة قريبا &&&&&&&&&&&&&&&&& كان احمد جالسا على فراشه وهو يسترجع تفاصيل لقائه بجمال والحوار الذي دار بينهما " فلاش باك" احمد بصدمة: انت متأكد من الكلام ده يا جمال جمال بأسى: ايوه يا احمد...هو قالي انه من فترةكان حاسس بشوية تعب والدكتور طلب منه تحاليل ولما راح عشان يجيبها فالمعمل قالوله مش قبل اسبوعين مع انها ما تاخدش اكتر من يومين...اتضح بعد كده انهم كانوا شاكين فيها فبعتوها القاهرة عشان تتحلل هناك فمعامل وزارة الصحة واتاكدوا فعلا من النتيجة وامبارح راح يستلمها وعرف اللي فيها وعشان كده لما روحتله كان منهار واداني الفيديو بمنتهى البساطة وقالي اعمل تحليل انا كمان عشان اطمن اخذ احمد يضرب كفيه ببعضهما قائلا : لا حول ولا قوة الا بالله...آدي أخرة المشي البطال ...لكن قولي ...المرض ده عادة مابيتنقلش من مجرد علاقة عابرة كده بتحصل لأول مرة ...هو صاحبك ده متعود على النوع ده من العلاقات? نكس رأسه وهو يجيبه قائلا: ايوه...اصله مش متجوز ومقضيها كده علطول نظر إليه احمد قائلا بشك: طيب وانت? اسرع يجيبه قائلا: لا والله العظيم يا احمد... دي كانت اول وأخر مرة مسح احمد على وجهه وقال بضيق: استغفر الله العظيم... انت لازم تقوم دلوقتي معايا عشان تروح تعمل تحليل وتقطع الشك باليقين جمال : خايف يا احمد...خايف يكون عندي فعلا احمد: مافيش حاجة اسمها خايف انت مش حتفضل عايش كده على أعصابك ...وبعدين زي ماقلتلك عادة المرض مش بيتنقل من اول مرة ويمكن ده من رحمة ربنا عشان يدي فرصة للي بيعمل كده عشان يتوب ويرجع عن اللي بيعمله ده... اللي انا خايف منه ان الفيروس يكون مش بيظهر فالتحليل غير بعد فترة معينة وساعتها مايظهرش حتي لو كان موجود جمال: لا من الناحية دي اطمن... فتحي قالي ان الدكاترة قالوله ان الفيروس ده بيبان بعد دخوله الجسم بيوم واحد ...اصل انا كمان كنت خايف من كده عشان كده سألته احمد: كويس اوي...يبقى تقوم معايا دلوقتي حالا عشان تعمل تحليل... وبعد النتيجة ماتظهر نشوف حنعمل إيه جمال: وحافضل طول الأسبوعين دول قاعد كده على أعصابي لحد نتيجة التحليل ماتظهر احمد: اعتبره عقاب من ربنا على الذنب اللي انت عملته بس ياريت تيجي على اد كده جمال بإمتنان: انا متشكر اوي يا احمد بجد انا لو ليا أخ ماكانش حيهتم بيا كده احمد: انت من يوم ما اتجوزت اختي وانا بعتبر نفسي اخوك لكن انا مش قادر افهم كان عقلك فين لما صاحبت إنسان زي ده واخلاقه بالشكل ده جمال: ان شاءالله يكون عندي فرصة اصلح اللي عملته بس انت إدعيلي يا احمد... لكن لو لاقدر الله طلعت فعلا مريض ساعتها حاطلق أميرة فورا ...انا لازم اتحمل نتيجة غلطتي احمد: طيب يلا بينا مش عايزين نضيع وقت اكتر من كده جمال بإستسلام: حاضر يا احمد اللي تشوفه &&&&&&&&&&&&&&&&& كان صفوت يحادث نادية في الهاتف قبل يوم واحد من زيارة سعيد وأبنائه ليطلب منها الحضور بصحبة سامح لكنها رفضت متعللة بالتعب ورغم محاولاته إلا انهاأصرت على الرفض ليرضخ صفوت لرغبتها في النهاية ويغلق الهاتف معها وهو يتمتم قائلا بقلق: صوتك كل مرة بيقلقني اكتر من المرة اللي قبلها... ياترى فيكي إيه يا بنت فردوس..... رواية وصية صفية. بقلم منال أم إبراهيم مرجان.

مقالات ذات صلة

رواية لقاء في القطار(الفصل السادس عشر إلى الرابع والعشرون) بقلم الكاتبه جوجو | New Episode – Read Online

رواية مقيدة بأصفاد مخملية(الفصل الحادي عشر إلى الأخير)بقلم سارة نيل | Complete Novel – Reading App

رواية المطارد(الفصل العاشر إلى السابع عشر) بقلم أمل نصر | Dark Fiction Series

رواية لست فقط حبيبي(الفصل الحادي عشر إلى الثامن عشر) بقلم نونه | New Episode – Read Online

حب تحت القيود(3) بقلم سحر الفيروز | Romance Drama Series

رواية نرجسي(الفصل الأول إلى الثاني عشر)بقلم روزان مصطفى | New Episode – Read Online

اترك تعليقاً إلغاء الرد