رواية وادي النسيان(الفصل الحادي والعشرون إلى الثامن والعشرون) بقلم شاهندة | New Episode – Read Online
قالت جليلة بهدوء:
نامت خلاص.
ثم نظرت إليه فى عتاب ظهر فى نبرات صوتها وهي تقول:
بس لما إنت قلقان عليها أوى كدة ياعزيز..كنت بتضايقها ليه بكلامك؟
قال عزيز بحزن:
خايف عليها ياجليلة..مش عايزها تمشى ورا قلبها وفى الآخر يضيعها زي ما ضيع مامتها قبل كدة.
قال جليلة:
لا جورية تبقى سهيلة يا عزيز ولا خالد زي فريد.
نظر عزيز إلى عينيها قائلا:
بس نفس الحكاية بتتكرر أدامى..نفس القصة ونفس الأحداث..وخايف تنتهى بنفس المصير.
قالت جليلة :
وتفتكر باللى إنت عملته نهيت الحكاية ..انت بس أجلت أحداثها ..الحكاية واضحة زي الشمس..قدر ونصيب..مش هنقدر نتدخل فيه..ولا نمنعه.
قست عينا عزيز وهو يقول بصرامة:
لأ همنعه..صدقينى همنعه..ما أنا مش هقف أتفرج عليها وهي بتضيع منى زي ما ضاعت سهيلة قبلها..المرة دى هقف قصاد القدر وهتحداه كمان.
ثم تركها وإبتعد تتابعه بعينيها قائلة بأسى:
أستغفر الله العظيم..مفيش فايدة..عزيز هيفضل عزيز ومش هيتغير..فوقى بقى ياجليلة وإقضى على الأمل اللى جواكى..إعترفى إنك خسرتى فى رهانك مع نفسك على إنك ممكن تغيريه..إعترفى إن مش بس جورى النهاردة اللى خسرت حبها..إنتى كمان خسرتى الأمل..لأول مرة تحسيها..وللأسف مش هتكون آخر مرة.
********************
جلس خالد على أقرب مقعد له..فلم تعد قدماه قادرتان على حمله.. يقول بصوت مصدوم:
ليلة..أختى أنا عندها كانسر..طب إزاي؟
جلس فراس بجانبه قائلا بحزن:
لما أغمى عليها النهاردة وجبتها على المستشفى ..طلبت من الدكتور يعملها كل التحاليل والأشعة الل ممكن تطمنى عليها..ونتيجة التحاليل طلعت وساعتها الدكتور صدمنى بالخبر..من وقتها وأنا مش عارف أعمل إيه..عايز أجرى عليها وآخدها فى حضنى وأطمنها إنى معاها وجنبها وفى نفس الوقت مش قادر أواجهها بحالتها..ولا أقولها عن مرضها..خبر زي ده محتاج أقرب حد ليها يقولهولها..ملقتش أدامى غيرك ..إنت وبس اللى ممكن تكلمها.
نظر خالد إلى وجه فراس وهو يقول بضياع:
أقولها إيه بس ؟أقولها إنها مريضة بأبشع مرض ممكن يصيب إنسان..أقولها إنها هتعانى من آلام تفوق إحتمال البشر..أقولها إنها ممكن تموت وتروح مننا فى عز شبابها ..إزاي بس عايزنى أصدمها بالكلام ده؟
ربت فراس على يد خالد قائلا:
عشان ليلة مبتحبش فى الدنيا أدك..عشان إنت سندها وأقرب حد ليها..عشان ليلة مش هتتقبل الخبر ده غير منك إنت..إنت وبس ياخالد.
