رواية حكاية حب(الفصل الثاني عشر إلى الأخير) بقلم رنا سليمان | Complete Novel – Reading App

(١٢)
_اكدبي عليا وقوليلي انه كويس…….بلاش تقوليها يا رنا
_حاولت اني انقذه بس مقدرتش…….انا اسفة
_لا لا انتي اكيد بتهزري جدو……..جدو مش ممكن يسيبني وبعدين انا…….انا جيت علشان اصالحه مش معقول يمشي وهو زعلان مني لا هو اكيد كويس……..انتو بتعيطوا لية انا بقولكم هو كويس هو بس بيعمل كدة علشان يعرف غلاوته عندنا وهيقوم والله…….وبعدين انتي مش عارفه جدو يا تيتة هو دايما بيحب يهزر كدة

لقيتهم خارجين من اوضة العمليات ومخرجين العربية وهو عليها ومغطين وشه…….قربت منهم بسرعة واتكلمت بعصبية وانا ببعدهم عنهم

_انتو اية اللي خلاكم تخرجوه من جوا…….انتو فاكرين انه مات……..لا جدو كويس وهيقوم دلوقتي

قعدت جمبه علي الارض وشيلت الغطا من علي وشه وبدات اتكلم وانا دموعي بتنزل

_جدو قوم يلا……..انا جيت اهو عارف انك زعلان مني بس انا جيت و هصالحك وعُمري ما همشي تاني جدو انت وعدتني انك عُمرك ما هتسبني لية عايز تخلف وعدك ليا دلوقتي وتمشي علشان خاطري متسبنيش

قربت مني وقعدت جمبي علي الارض …….مسكت في ايدي ومسحت دموعي ب الايد التانيه وبدات تتكلم وهي بتحاول تتمالك نفسها قدامي

_جدك ارتاح يا اياد…….بقي في احسن مكان دلوقتي……..اللي بتعمله دا مش هيرجعه تاني……..ربنا رجع اخد امانته تاني ادعيله ان ربنا يرحمه ويغفرله
_بس هو مات وهو زعلان مني يا تيتة…….انا كُنت ناوي اصالحه والله …….كان يستني حتي لحد ما اصلحه
_الكلام دا مش هيفيد بحاجة دلوقتي يا اياد…….اللي بتعمله دا غلط انت لازم تكون اقوي من كدة…….مينفعش اللي انت بتعمله دا…….قوم يا حبيبي علشان انت وراك الدفن والعزا وحاجات محدش غيرك هيقدر يعملها ……..لازم تكون اقوي من كدة يا حبيبي

هزيت راسي ب حاضر ومسحت دموعي…….قومت من علي الارض ومشيت علشان اطلع تصريح الدفن واروح اشوفه لاخر مرة……….مش قادر اتخيل اني مش هشوفه تاني جدو كان اقرب حد ليا وهو اللي رباني بعد مُوت ابويا وانا صغير…….كُنت بحبه اوي ومكنتش ببعد عنه نهائي وهو كان اكتر حد بيحبني وبيخاف عليا هو وتيتة…….طول الوقت كُنا جمب بعض وعُمري ما كنت احب ابعد عنه……..يا ريتني فضلت هنا و مكنتش سافرت كُنت هبقي جمبه ومعاه يمكن كُنت هقدر اودعه ……..اذيته رغم حُبي ليه زي ما اذيت كل اللي حواليا…….احساس صعب عليا اوي وانا بودع اقرب حد ليا واللي فضلت بعيد عنه سنتين من غير ما اكلمه انا عُمري ما هسامح نفسي علي بُعدي هنا……..انا حقيقي تعبت من كُتر ما بأذي الناس وبكون سبب في تعبهم بس تعب جدو كان كبير ورغم اني عارف كدة بس مهتمتش وبعدت عنه و مهتمتش بخوفه وقلقه عليا لحد ما مات وانا بردو بعيد